Read Sangtam Naga EZEKIEL 47 Bible Online

EZEKIEL 47 - Sangtam Naga bible

EZEKIEL 47

¹Nyitsarüba tsünü Amübükuh trahtri lang tsü Ih thali norocho. Trahtri lanü kih pohcheh Amübükuh lang lahpi nyüchürolang pohtsicho. Hütsü amübükuh kihjinglang pohkinü pohcheh bholu kihjinglang tsü khu pohtsicho.

²Abinü Ih amübükuh müdüm la tsünü kihkulang tbükhüm tsü khu no chürocho ko nyüchürolang piba tbükhüm tsü no mükangcho. Kihjinglang tbükhüm te tsü yongna khüdu pohcho.

³Nyitsarüba tsünü abi akihsing dongnü nyüchürolang tsü khehap hajar khüdu kii jowücho ko I te hütsüba yongkhi tsü khu kehnung yocho. Kih tsü I jingnah du thsacho.

⁴Hütsüpü abinü apa khehap hajar khüdu kihcho, ko kih tsü I mükhoh chihcho. Adesü khehap hajar khüdu kii jowücho ko kih tsü I kihrüm chii kürocho.

⁵Abinü adesü khehap hajar khüdu alaa kihcho, ko adelü kih tsü sohrapü Ihnü mükehchehcho. Hütsü wekhunung chah khu kehnunglü sohracho.

⁶Abinü I te yocho, “Nyitsarü tsurü, hiri apüm longi thrahbülung.” Hütsüpü nyitsarüba tsünü yongkhi bekhüm lang tsü thali Ih norocho,

⁷ko Ihnü hütsü chihde kihbekhüm khüu-khüulang singdong khütang yacho.

⁸Abinü I te yocho, “Hiba kih hi nyüchüro lih khu pohre ko Asü Kihdi lang pohwüre. Hütsü Asü Kihdi la pohyohde, hütsüba kihdi mihkih tsü kih amüsengnü mülihjüre.

⁹Yongkhi tsü khüdederü pohwonang, kanglungrü ko nguh lang dhüre lire. Yongkhi tsünü Asü Kihdi kih tsü müthseng kangsohre ko hütsü khüdederü pohwonang, hütsünü akang hirojüre.

¹⁰Engedi Kihnatung lanü Eneglaim Kihnatung chii, kihbekhüm la tsü ngurangrü linung, ko hütsüla arüh yojeh tbhünung. Hütsüla Mediteranean kihdi la licho nguh lang papa doi linung.

¹¹Ta kihbekhüm ayung la liba kihting ko changtphü zehba kih tsülü amüthseng mükangnung. Arühlü mih chüroji kangnung.

¹²Yongkhi bekhüm anyüdinglang tsü atsunung chixinung singdong lüpcho linung. Arüh ava tsü khodesü mümükunung, ko arüh chah singsih tsü müsikanung. Choo mükhu arüh chahnü singsih asih sihnung, tunüo arüh tsü Amübükuh lanü pohchehba kihnü xahre. Singdongti tsünü atsunung jünung, ko arüh ava tsü nyitsarü kyangnung la bichinung.”

¹³Amichahba ABÜDONGBAnü yocho, “Ahung dhüre khyang, Josef hung khyang nohlüm anyüh jonü changta jünung alih ko luhrü tsü hiroh-i linung.

¹⁴Ihnü nührü jümürü te hiba lih hi arüh khyang jünung yuchüm nyengchoko; ade hi nührü yola along lanü changtaang.

¹⁵“Kihkulang luhrü tsü nyüchüro langthring Mediteranean kihdi lanü Hethlon yangdi, Hamath Lang, Zedad yangdi,

¹⁶Berotha ko Sibraim yangditi (arüh tsü Damaskas yanglih ko Hamath yanglih nyüh kahla lile), ko Tikon yangdi (Hanran District luhrü la lile) chii wü lile.

¹⁷Hütsüta kihkulang luhrü tsü nyüchürolangthring Mediteranean lanü Enon yangdi chii, kihkulang Damaskas ko Hamath lih te rühta lile.

¹⁸“Nyüchürolang luhrü tsü Damaskas ko Hanran nyüh lanü kihjinglang Israel nyüzüdulang ko nyüchürolang Gilead ko Asü Kihdi lang chah Tamar chii Jordan tsü luhrü kang lile.

¹⁹“Kihjinglang luhrü tsü Tamar lanü kihjing-nyüzüdulang Kadesh Meriba kih chii, ko kihku-nyüzüdulang tsü Ijiprü luhrü ayung Mediteranean kihdi chii licho.

²⁰“Nyüzüdulang luhrü tsü Mediteranean-nü rühpü lile ko kihkulangnü tuwü nyüzüdu Hamath Lang chii licho.

²¹“Hiba lih hi nührü tsutpurü yola changtaang;

²²hi nührü arühtoh lih thsanung. Nührü yola liba shuparü ko hila tsuzarü khyangsü nührü changtade arüh nohlüm jehsohng. Arüh tsü Israelrü shutsakhung roh-i bichieng ko Israel yola arühsü alih nohlüm nengdang zii thsadhengba la tsü zehsohng.

²³Shuparü müipi tsü arüh sürü te liyaro arüh nohlüm la tsünü ngunung. Ih, Amichahba ABÜDONGBAnü choko.”