Read Sangtam Naga EZEKIEL 48 Bible Online

EZEKIEL 48 - Sangtam Naga bible

EZEKIEL 48

¹Kihkulang luhrü tsü nyüchürolang Mediteranean Kihdi lanü Hethlon yangdi, Hamath Lang, Enon yangdi ko Damaskas ko, Hamath yanglihti kahla luhrü tsü chiinü licho. Ahung müipi alih nohlüm khüdu nyüchürolang-nyüzüdu lahpi lanü Mediteranean kihdi chii kihkulangnü kihjinglang chii achung hiroh-i: Dan Asher Naftali Manase Efraim Reuben Juda

⁸Anyüuba nohlüm tsü pathsa nguchi nengdang yohpüng. Hütsü kihkunü kihjinglang chii, adilang lutri dhüre-anyühpü achangsho ko ashenglangsü nyüchürolangnü nyüzüdu chii ahungti khyang jücho doi tsü. Hiba müdüm la Amübükuh tsü linung.

⁹Hiba nohlüm alongshung la, ashenglang lutri dhüre-anyühpü achangsho ko adilang lutri dhüre pathsa ABÜDONGBA khyang müsacheh khasah yohpüng.

¹⁰Hiba Amüsa müdüm lanü bebürüti nohlüm khüdu ngunung. Arüh nohlüm tsü nyüchürolangnü nyüzüdulang chii lutri dhüre-anyühpü achangsho, ko kihkulangnü kihjing chii lutri münga. ABÜDONGBA Amübükuh tsü hiba müdüm alongshung la linung.

¹¹Hiba Amüsa müdüm tsü Zadok chahnü trahchocho bebürüti nengdang linung. Arühnü aparü Israel yola zeh amütsa münguchi, ko Levirü roh-i müthsapü, yuje cho Ih dikehcho.

¹²Hütsünü Levirü lichah chungkeh pathsa müdüm tsü arüh khyang jünung, ko hütsü apüm tenü Amüsauba thsanung.

¹³Levirü khyangsü bebürü khyang jüba kihjinglang pathsa müdüm tsü jünung. Hütsüsü nyüchürolangnü nyüzüdulang chii lutri dhüre-anyühpü achangsho ko kihkunü kihjinglang chii lutri münga linung.

¹⁴ABÜDONGBA khyang müsacheh pathsa khasah jüba müdüm tsü apüm tenü atsauba linung ko hütsüla tusü inung mahkhang mülihtanung mahkhang sütesü mülihjünung mükoh. Hütsü Amüsa ko ABÜDONGBA yo.

¹⁵Nying liba müdüm, lutri dhüre-anyüh ko achangsho tsülü Amüsa mah, hütsülü apa thsütah la bichinung kohle. Hütsüla li arühnü alih tsü bichinung kohle.

¹⁶Yangdi tsü hütsü long la linung, ko hütsü mükangmüla apümlang khehap hajar müyüpü thsih münga thsanung.

¹⁷Yangdi tsü mükangnü apümlang khehap thsih anyüpü dhünyang adukah linung.

¹⁸Yangdi tsü külüp-pü Amüsa müdüm la kihjinglang anyingcho lih tsü nyüchüro ko nyüzüdulang lutri anyüpü achangsho tsü yangdi la lirünü luh kang bichinung kohle.

¹⁹Tu hung lanü nye, sürü ro yangdi la tsü liro, arühnü hütsü luthsanung kohle.

²⁰Hütsüta hiba pathsa yohpüba müdüm la akihchocho ayohrüta mükyah tsü apümlang lutri dhüre-anyühpü achangsho, ko hütsü yangdinü mükuhchocho mükyah zehnung.

²¹Amübükuh zehba hiba müdüm nyüchürolang ko nyüzüdulang, bebürü lih, Levirü lih ko yangdi ko anyingcho tsü Yangthsaba lih thsanung.

²²Hütsü nyüchürolangthring nyüchüro luhrü ko nyüzüdulangthring Mediteranean Kihdi chii, ko hütsü kihkulang Judarü lihnü ko kihjinglang Benjamin lihnü rühsah lile.

²³Hiba pathsa lih kihjinglang, anyingcho ahung müipinü nyüchürolang luhrü lanü Mediteranean kihdi chii kihkunü kihjinglang chii hiroh-i chungnü alih nohlüm khüdu-khüdu ngunung: Benjamin Simeon Isakar Zebulun Gad.

²⁸Gad hung khyang jüba kihjinglang, luhrü tsü nyüzüdu-kihjinglang Tamar lanü Kadesh chii, ko kihku-nyüzüdulang Ijiprü luhrü lanü Mediteranean kihdi chii linung.

²⁹Amichahba ABÜDONGBAnü yore, “Israelrü khyang alih tsü arüh yo thsanung hütsüroh-i tsü changtajüng.”

³⁰Jerusalem yangdi la züdunung tbükhüm dhüre-anyüh linung. Tbü müyü müipi tsü khehap hajar müyüpü thsih münga, ko tbükhüm asang-sang zehnung, arüh neng tsü ahung nengla dsinung. Kihkulang tbükhümti neng tsü Reuben, Juda ko Levi; nyüchürolang tbü la tsü Josef, Benjamin ko Dan; kihjinglang tbü la tsü Simeon, Isakar ko Zebulun; ko nyüzüdu lahpi tbü la tsü Gad, Asher ko Naftali.

³⁵Yangdi tbü müyüdinglang amükang tsü khehap hajar dhüre-keh. Ade tinü yangdi neng tsü, “ABÜDONGBA—HILA—LILE!” pü dsinung.