Read Sangtam Naga EZEKIEL 5 Bible Online

EZEKIEL 5 - Sangtam Naga bible

EZEKIEL 5

¹ABÜDONGBAnü yocho, “Nyitsarü tsurü, noh akoh khüdu hirung ko hütsünü nü benbüh ko nü kuva hehpehng. Ko kuva tsü ahosing lanü houng ko chang asang kang changnahng.

²Yangdi betiba tsü thümde, nohlüm asang la khüdu yangdi la tsü trüpm. Nohlüm khüdu nü yangdi mihlang wüde nü nohnü hütsü khanahng. Anyingcho nohlüm khüdu tsü nyübong la shuu pehng, ko I nohshengnü hütsü iichinung.

³Kuva tsü azikyah nying, ko hütsü nü shüyo la müthsükehng.

⁴Adesü hütsü lanü azikyah khyüchehng, michang la tsayohchüng ko tahpehng. Hütsüri lanü Israel yucho apümlang michang tsü tru tsinung.”

⁵Amichahba ABÜDONGBAnü yocho, “Jerusalem chah dheng. Ihnü abükyü tsü yanglihtinü mükangtipü alimih long la yohpüre.

⁶Ta Jerusalemnü I yuzeng nyümko ko aparü yuchoti tenü alaa amütsaba, ko mükangmüshü tenü yocho münyiba ngusohko. Jerusalemnü I amülaba ko I yuzeng thsongliko.

⁷Ade Jerusalem, Ih, Amichahba ABÜDONGBAnü tu yoro hütsü nyieng. Nührünü I yuzeng ko I amülaba münyicho khu nührü mükang liba yuchoti tenü alaa I zichürosohre. Nührünü aparü yuchoti yangthsa bichiko.

⁸Hütsünü Ih nührü rorüh-epü Ih, Amichahba ABÜDONGBAnü yore. Ihnü nührü chah yuchotinü ngunungthsa yukhanung.

⁹Nührünü Ihnü thrünyicho apüm nguchichonü, Ihnü khodesü münguchicho ko münguchinung khüdunü Jerusalem khingchinung.

¹⁰Hütsü khu, Jerusalem la tpurünü arüh tsuzarü tsunung ko tsuzarünü arüh tpurü tsunung. Akang nyingrü apüm Ihnü apümlang shupishuzasoh khingchinung.

¹¹“Hütsünü, Ih akang Tsingrang lide hi Amichahba ABÜDONGBA yu nührünü amünyi ko athrünyinung apüm nguchi I Amübükuh münyijücho ngang, Ihnü yanglilüm mülipü nührü kingthrümnung.

¹²Nührü müyurü nohlüm asang la khüdu yangdi la thsangnang ko yangkongnü sünung; nohlüm khüdu yangdi mihlang nohshengnü kingthrümnung; ko nohlüm khüdu tsü Ihnü nyübong la shuu pehnung ko nohshengnü arüh iichinung.

¹³“I longmünyüpde I rihlong ko zii nührünü müdhenung. Hiri apüm tikehde, nührü yuje müchochonü Ih, ABÜDONGBAnü nührü te chotachoepü müdhenung.

¹⁴Nührü mükang liba yuchoti lanü alahkhurü atümungnü nührü chah naking hingkehjo ashu lanü mürinung.

¹⁵“I rihlong chüro nührü khingchide, nührü mükang liba yuchoti drümüyangnung. Arühnü nührü chah thrünyi dhengnung ko münyüjünung.

¹⁶Ihnü nührü tsuyongnung chixiba yatinung ko nührü kongsohnung. Tbüdeng akohnü nührü chah kyacho kyo, ayangchonü nührünü thsa müdhenung.

¹⁷Nührü tsuzarü kyüsehnung ko Ihnü yangkong ko rangmü kanglungrü müthehnung, ko nührü kyüsehnung dhsara, shühkhatoh ko khata müthehnung. Ih, Amichahba ABÜDONGBAnü choko.”