Read Sangtam Naga EZEKIEL 6 Bible Online

EZEKIEL 6 - Sangtam Naga bible

EZEKIEL 6

¹ABÜDONGBAnü I te chota yocho:

²“Nyitsarü tsurü, Israel azong lang lahpi dheng ko arüh te I yusi young.

³Israel azongti te ABÜDONGBA yu nyinung young, Ih, Amichahba ABÜDONGBAnü azongti, akhangti, lungkoh ko angahti te tu yoro: Kyothri mübüba müdümti thsangnyangjünung Ihnü nohsheng müthehnung.

⁴Bholu mapnahjünung ko müchiji tahji bholu thsangnyangjünung. Hütsüla lirü arüh bholu bete tsünü kyüsehnung.

⁵Ihnü Israelrü me tsü shupishuza pehnung; arüh rühlungrü bholu mükang shuu pehnung.

⁶Israelrü bholu ko kyothriti apüm zangzang mapnahjünung, arüh müchiji tahji bholu lohnahjünung, ko arühnü külüpcho changpehjünung nengdang, arüh yangditi apüm changjünung.

⁷Apümlang nyitsarüti kyüsehnung, ko anyingrünü Ih, ABÜDONGBAepü müdhenung.

⁸“Kingthrümba lanü Ihnü arüh khürü tsichehsohnung ko yuchoti lanü shupishuzasoh

⁹arüh yangtsi la linung. Hütsüla arühnü Ih lümchehnung ko Ihnü arüh khingchicho ko ashah khyüsohcho müdhenung, tunüo arüh yudsi müliba lasihnü Ih thrüchahchü pehcho ko I tenü kyothri du tsü mürucho. Ko arühnü amünyi ko athrünyinung nguchi nguchichonü arühnü arühbürü wahnung.

¹⁰Hütsüde arühnü Ih ABÜDONGBA ko Ihnü müzahsohba tsü arahkheh mah pü müdhenung.”

¹¹Amichahba ABÜDONGBAnü yocho, “Nü kheh hamching! Nü jing mükhyuching! Israelrünü athrünyinung ko amünyi apüm nguchicho ngang züde traang. Arüh khata, yangkong ko thsaranü sünung.

¹²Ashu la lirüsü thsangnang sünung; jingte lirüsü khata la kyüsehnung; anyingrü kongseh sünung. Arühnü I rihlong chürocho apüm müdhenung.

¹³Me tsü kyothri ko bholu mükang shuu pehnung, akhang müipi chah, azong müipi chah, singdhülüm ko langsingdong pohki ko arühnü arüh kyothri te kangmübü trüpba müdüm apüm la shupishuza pehnung. Hütsüde apümnü Ih ABÜDONGBAepü müdhenung.

¹⁴Ho, Ihnü I kheh müyungchünung ko arüh limih changjünung. Israelrü liba khüdusü müpehjüpü, Ihnü kihjinglang lipilih lanü kihkulang Ribla yangdi chii adeng kangsohnung. Hütsüde atümungnü, Ih, ABÜDONGBAepü müdhenung.”