Read Sangtam Naga EZEKIEL 7 Bible Online

EZEKIEL 7 - Sangtam Naga bible

EZEKIEL 7

¹ABÜDONGBAnü I te chotacho.

²Abinü yocho, “Nyitsarü tsurü, Ih, Amichahba ABÜDONGBAnü Israel lih nengdang hi achangka thsanung!

³“Israel, achangka chihko. I rihlong nühnü müdhenung, tunüo nü nguchi ngang Ihnü nü yu khare. Nüh athrünyinung nguchi apüm mülih Ihnü nü khyang thali jünung.

⁴Ihnü nüh müditpangnung mahkhang yanglilüm müngusohnung. Nüh athrünyinung nguchi ngang Ihnü nüh khingchinung, hütsüde nühnü Ih, ABÜDONGBAepü müdhenung.”

⁵Amichahba ABÜDONGBAnü hi yore, “Nü chah achangba khüdu khanglang khüdu tsehle.

⁶Hi apüm khuko. Hi achangka. Nüh changkako.

⁷Nührü alih la lirü nengdang achangka tsü role. Lümdhama chah khu azong amüsa müdüm la thsüti mülinung becho shündhün lile.

⁸“Tunyah mülipü nührünü I rihlong müdhenung. Nührü nguchi ngang Ihnü nührü yu khare ko nührü athrünyinung nguchi apüm mülih Ihnü nü khyang thali jünung.

⁹Ihnü nüh müditpangnung mahkhang yanglilüm müngusohnung. Ih, ABÜDONGBA, ko nührü khingchiba tsü Ihnü-epü müdhenung, athrünyinung nguchi nengdang Ihnü nührü khingchinung.”

¹⁰Israel nengdang achangba nyümong tsü chihle. Shüh khatoh tsü bholole. Müthsehba tsü akhang chihko.

¹¹Shüh khatohchonü alaa amütsa chürosohre. Arüh yo, arüh kuthsi, bholoba mahkhang arüh ahechi tusü münyingnung.

¹²Becho chihko. Shithsaphülehba tusü mülinung nyümong chihko, tunüo nyitsarü müipi chah Tsingrangba akhingchi ronung.

¹³Shithsaphülehrü süsü abi kohshacho thali ngunungthsa kutsüp mülinung, tunüo Tsingrangba rihlong tsü nyitsarü müipi chah lile. Münyirü süsü münyingnung.

¹⁴Rühti mehre, ko atümung rungnümre. Ta sünüsü khatalang müwüre, tunüo Tsingrangba rihlong tsü nyitsarü müipi chah ronung.

¹⁵Yanglong la khata, ko kukhi la thsangnang ko yangkong lile. Sü yangdi khu chüdunang abi khata la tsü sünung, ko sü yangdi la linang abi thsangnang ko yangkongnü chihnung.

¹⁶Khürü angah lanü mümüdhrü drümüyangcho kyo azonglang tsicheh tsinung. Arüh apümnü arüh münyi nengdang longrinung.

¹⁷Nyitsarü müipi kheh remüzehpehnung, ko arüh mükhong dhridhrinung.

¹⁸Arühnü müyahshü müpinung ko apümlang dhridhrinung. Arüh thah hehpehnung, ko arüh atümung ashah khyünung.

¹⁹Arühnü yanglong la arüh hon ko taripi sehnyeh kyo pehnung, tunüo ABÜDONGBAnü abi rihlong tungkehjüde, hon ko taripinü arüh mükhümchonung. Arüh longxonung mahkhang mi jengnung nengdang hiri mübichichehnung. Hon ko taripinü arüh amünyi shitpahsohcho.

²⁰Khüdupilü arüh atsah tsa thsidilung nengdang müthseh licho, ta arühnü hütsüri tsü athrünyinung kyothri külüpnung la bichicho. Hütsü khu ABÜDONGBAnü arüh kuthsi tsü arüh nengdang amüthohba khüdu kangsohcho.

²¹ABÜDONGBAnü yore, “Ihnü shuparü khyang arüh kengchosohnung ko yuzeng thsangnyangrünü arüh kuthsi apüm khyünung ko münyijünung.

²²I Amübükuh münyijüde ko fühkhohrünü hütsü rohphoh züdu münyijüde, Ihnü mümüdronung.

²³“Lüpcho lümdhama la lile; alih tsü amapsehrünü jeng lile ko yanglihti shühkhatohnü jeng lile.

²⁴Ihnü hila amütsauba yanglih noronung ko Ihnü arüh khyang nührü kuh khyüsohnung. Ihnü yuchoti khyang nührü mübüji müdüm münyisohde, nührü yola akurahrüti müsi mülahba changnung.

²⁵Achangba tsehle. Nührünü yangtsa yangchinung ko khodesü müngunung.

²⁶Achangba khüdu khanglang khüdu, ko yusi amütsa khainü tungkehjo pohyohnung. Nührünü azikehrü te arüh müngucheh youngpü kihchinung. Bebürünü müyurü te tu ayonung mülinung, ko azirütinü thsüchinung tu mülinung.

²⁷Yangthsabanü me tranung, Yangthsaba tsurünü alongdi mülipehnung, ko müyurü adrüchonü dhridhrinung. Nührü nguchi ngang Ihnü nührü khingchinung, ko nührünü aparü yukhacho kyo Ihnü nührü yukhanung. Hütsü khu Ih ABÜDONGBA epü nührü te müdhesohnung.”