Read Sangtam Naga EZEKIEL 8 Bible Online

EZEKIEL 8 - Sangtam Naga bible

EZEKIEL 8

¹Ihrü yangtsi la licho kang dhüroh, choo dhüroh ko nyümong müngau la, Juda lanü yangtsirü azirüti I yola I kuhla pümcho. Dhrongyengnü Amichahba ABÜDONGBA zii I chah rocho.

²Ihnü tsungmüsu dhengde, adrünung nyitsarü kyo müngucheh la tsü ngucho. Kihrüm ajinglang afü tsü michang kyocho, ko kihrüm lanü athahlang tsü asehcho imüyeng kyocho.

³Kheh kyo abinü müyungcho I kuva lanü rangcho. Hütsüpü hiba müngucheh la tsü Tsingrangba nbünü Ih nyübong la dhimüsu Jerusalem lang nowücho. Abinü Tsingrangba rihlong chürosohba kyothri liba, Amübükuh kihku lahpi ayonglangba trahtri lang tsü Ih nowücho.

⁴Hütsüla Ih Chebar Yongkhi shündhün lide Ihnü nguba kyosangnü Israel Tsingrang licho müdhesohba ahechi tsü ngucho.

⁵Tsingrangbanü I te yocho, “Nyitsarü tsurü, kihkulang dheng.” Ihnü dhengcho, ko trahtri shündhün bholu te tsü Tsingrangba rihlong chürosohba kyothri tsü Ihnü ngucho.

⁶Tsingrangbanü I te yocho, “Nyitsarü tsurü, tikeh yaba tsü münguo? Hila Israelrünü athrünyinung nguchinü I Amüsa müdüm lanü alaa ashu-u iipehba tsü dheng. Hi tenü alaa ashahnung nguchiti nühnü ngunung.”

⁷Abinü kekhüm trahtri lang Ih nowücho ko züdi la akhi khüdu ngusohcho.

⁸Abinü yocho, “Nyitsarü tsurü, züdi hi map-phoung.” Ihnü hütsü map-phohcho ko trahtri khüdu ngucho.

⁹Abinü I te yocho, “Züdung ko athrünyinung nguchiti tsü dheng.”

¹⁰Achotsü Ihnü züducho ko dhengcho. Züdi tsü mürü yahthri ko apa amümüsa kanglungrü ko Israelrünü mübüba kohroti thrahchonü lüptpah licho.

¹¹Hütsüla Shafan tsurü Jazania zeh Israelrü langnürüti nyühre licho. Arüh müipi müchiji tahsing khüdu-khüdu bicho, ko müchiji la tsünü mikhu phung licho.

¹²Tsingrangbanü I te tsingdhengcho, “Nyitsarü tsurü, Israelrü langnürütinü rangnü tu nguchiro münguo? Arüh apümnü kuh khüdu la kyothrinü jeng yohpüpü hütsü mübüre. Arüh amütangnung tsü: ‘ABÜDONGBAnü ihrü müdhengre! Abinü ihrü yucho pehjüko.’ ”

¹³Hütsüpü ABÜDONGBAnü I te yocho, “Arühnü hi tenü alaa athrünyinung nguchicho nühnü ngunung.”

¹⁴Abinü Amübükuh kihkulang tbükhüm lang tsü Ih nowücho ko khingkurütinü Tammuz tsingrang metra pümcho I te ngusohcho.

¹⁵Abinü tsingdhengcho, “Nyitsarü tsurü, hütsü münguo? Nühnü adesü alaa athrünyinung nguchi ngunung.”

¹⁶Hütsüpü abinü Amübükuh ayonglang Ih no züducho. Hütsüla Amübükuh trahtri shündhün, lang ko bholu nyüh kahla nyitsarü mükyüpü münga-o pümcho. Arühnü mübüji lang khang pipü nyüchürolangthring mükhukeh nyü chüro yaba tsü mübo licho.

¹⁷ABÜDONGBAnü I te yocho, “Nyitsarü tsurü, hütsü münguo? Hiri Judarünü nühnü nguba athrünyinung nguchiti nguchicho ko yanglih apümlang shühkhatoh chürosohcho dunülü arüh long münyüpre. Mah, arühnü ro Amübükuh tsatsa la hütsüri tsü nguchi I zii alaa chürosohre. Dheng, arühnü amütsauba nguchi Ih mükhimüngure.

¹⁸Arühnü I rihlong müdhenung. Ihnü arüh müditpangnung ko yanglilüm müngusohnung. Arühnü tasenü züde I te kihchinung, ta Ihnü arüh te münyinung.”