Read Sangtam Naga EZEKIEL 9 Bible Online

EZEKIEL 9 - Sangtam Naga bible

EZEKIEL 9

¹Hütsüde Tsingrangbanü züde Ihnü yuchicho, “Hila rung, yangdi khingchinungrüti. Nührü thsunohrü bipü rung.”

²Hütsüdenü, Amübükuh kihku lahpi dongkhu trahtri langnü nyüh dhüroh, arüh müipi thsunohrü bipü rocho. Arüh yola nyüh khüdu anana shü khyüpü athrahnung lango bipü zehcho. Ko arüh apüm ro imüyeng bholu te tsü yacho.

³Hütsüde Cherubim aqo kehba kanglungrü liba müdüm la tsünü Israel Tsingrang ahechi tsü chürocho ko Amübükuh trahtri lang tsü wücho. ABÜDONGBAnü anana shü khyüba te dsi yocho,

⁴“Jerusalem yangdi bong wüng ko longri thsangthsi lirü müipi kikhang chah yangdi la athrünyinung nguchi apüm nguchicho ngang amüdhethsa tühjühng.”

⁵Ko Tsingrangbanü aparü te hita yocho Ihnü yuchicho, “Abi khanglang yangdi tung iiwüng, ko kyüsehng. Süsü tünyingpü; süsü tüchomang.

⁶Azarü azirü, dhreza lazarü, atpati ko tsuzarüti apüm kyüsehng. Ta kikhang chah amüdhethsa kehrü sü chahsü kheh tüthah. Amübükuh hilanü dikehng.” Achotsü hütsürila yarü azirüti chahnü dikeh kyüsehmüsucho.

⁷Tsingrangbanü arüh te yocho, “Amübükuh tsü münyijüng. Kekhüm tsü menü jengsohng. Nguchimüsung!” Achotsü arühnü yangdi la tsü nyitsarü kyüsehnung dikehcho.

⁸Kyüseh yade, hütsüla I müleng yacho. Ihnü alih la I romih hapkehpü züdecho, “Amichahba ABÜDONGBA, Nühnü Jerusalemrü te wahchonü Israel la nying lirü apüm kyüsehnung do?”

⁹Tsingrangbanü lalingcho, “Israel ko Judarü tsü adrünung münyinü mülangko. Arühnü yangdi apümlang mapseh amünyi shitpahko ko arüh thsamehchonü Jerusalem jengko. Ih, ABÜDONGBAnü arüh yucho thrüchahchüpehko ko Ihnü arüh müngurepü arühnü yore.

¹⁰Ta Ihnü arüh müchomangnung; arühnü aparü chah nguchicho kyo Ihnü arüh chah nguchinung.”

¹¹Hütsüde anana shü khyüba tsü thali ro ABÜDONGBA te yocho, “Nühnü mülacho kyo Ihnü nguchiko.”