Read Sangtam Naga DANIEL 1 Bible Online

DANIEL 1 - Sangtam Naga bible

DANIEL 1

¹Juda la Jehoiakim yangthsacho kang asangu la, Babylon yangthsaba Nebukadnezarnü ro Jerusalem mahcho.

²ABÜDONGBAnü abi khyang Yangthsaba Jehoiakim kohsohcho ko amübükuh kohro khyüsohcho. Abinü khürü rang abi yola Babylon la abi tsingrang amübükuh yang nowücho, ko arohchocho kohro tsü amübükuh la yohpücho.

³Yangthsabanü abi pohki ayingba Ashpenaz te yangtsirü Israelrü yolanü yangthsarü hung ko adirü nahlanü dhrezarü khürü throchehnung yuzeng jücho.

⁴Arüh tsü yangthsaba kuhla dikehchehnungthsa, trungdrong atsa, athsehthsa, asithsa thoh akoh ko afü la achomükeh thsanungbae. Arüh te Ashpenaznü Babylonrü yu thrahnung ko khinung donung.

⁵Arüh khyang nyümong mükhu yangthsaba tsuyongba tüptinung yuzeng jücho. Hütsüta kang asang nyichosoh kangpü arüh tsü Yangthsaba bete noronung.

⁶Athrochehrü yola tsü Daniel, Hanania, Mishael ko Azaria zehcho, arüh apüm Juda hung lanü.

⁷Ayingthsabanü arüh khyang neng asi: Belteshazar, Shadrak, Meshak ko Abednego jücho.

⁸Danielnü Yangthsaba tsuba tsang ko yongba yongkha tsuyongnü apu jangjang mümünyinung dhrongchehcho, hütsünü abinü Ashpenaz te abi tronung kihchicho,

⁹ko Tsingrangbanü Ashpenaz lasih la Daniel müi lümsohcho.

¹⁰Ta abinü Yangthsaba drüchonü Daniel te yocho, “Nührü khyang tu tüptinung hütsü Yangthsabanü yuzeng jüko, ko nüh tsü aparü kyo müngukhang, abinü Ih mapsehnung.”

¹¹Achotsü Danielnü wü Ashpenaznü abi ko abi shangrüti nyahnung yohpüba anyahrü te tsü yocho,

¹²“Ihrü nyümong dhüre düzodheng, ihrü khyang himütrung du tüpm ko kih du tieng.

¹³Hütsüpü aparü Yangthsaba tsuyongba tsurü dhrezarü te ihrü müjangta dheng, ko nühnü tsacho ihrü nengdang nguching.”

¹⁴Achotsü abinü arüh hütsüta nyümong dhüre düzodhengnung nyengchocho.

¹⁵Nyümong pisade, Yangthsaba tsuyongba tsuyongrü tenü arüh re azehba ko shulu atsaba ngucho.

¹⁶Achotsü hütsütinü abinü arüh khyang Yangthsabanü jücho mülih himütrung du tüpcho.

¹⁷Tsingrangbanü hiri dhrezarü müyü khyang yura ko sohlümba lümlong la amüdhe ko anyicheh jücho. Hütsü chah lahkeh, abinü Daniel khyang müngucheh ko melang müchehnung lümlong jücho.

¹⁸Yangthsabanü zengjücho kang asang changkade, Ashpenaznü dhrezarüti atümung Nebukadnezar yanglang nowücho.

¹⁹Yangthsabanü arüh atümung te chotacho ko aparü atümung tenü Daniel, Hanania, Mishael ko Azaria alongsüu ngucho. Hütsünü arüh tsü Yangthsaba dikehba la züducho.

²⁰Yangthsabanü tu tsingdhengnang mahkhang tu khiyu chüronang, abi yanglih apüm la amongrü mahkhang azikehrü tenü dhürepinü hiri müyü tsünü atsau yochehcho.

²¹Ko Daniel tsü Yangthsaba dikehba la Persia Yangthsaba Cyrusnü Babylon mah yingcheh licho.