Read Sangtam Naga DANIEL 11 Bible Online

DANIEL 11 - Sangtam Naga bible

DANIEL 11

¹Ih tronung ko khümnung tsü Abi du.

²Ko ade Ihnü nü te yuje tsü yonung.” Riwürü tsünü yocho, “Persia la adesü yangthsarü asang chüronung, ko müyüuba tsü, aparü atümung tenü aliu thsanung. Abi tase ko alicho chah dümpipü abinü Greek yangdi khyangchinung.

³“Hütsüpü akurah yangthsarü khüdu chüronung. Abinü yanglih arangcheh michah thsanung ko abi thsanyücho thsanung.

⁴Ta abi chichah abi yanglih müyü kang changnahnung. Aparü hung lanü abi mülih thsanung ta abi roh-ilü arüh tase mülinung.

⁵“Ijip Yangthsaba tase azeh thsanung, ta, abi pohki athsarü khüdu abi tenü re azeh-u kangnung ko yanglih adiu michah thsanung.

⁶Kang adrong lipü Ijip Yangthsabanü Syria Yangthsaba te yangtsa külüp atsulatpü khyüsohnung. Ta yangtsa tsü nyahli mülinung ko abükyü, anii atsuzarü ko abükyü yola wüba kulirüti atümung kyüsehnung.

⁷Tunyah mülipü, abükyü tsutpurü khüdu yangthsarü kangnung. Abinü Syria Yangthsaba mahnung ko arüh roshengvi khu züdunung, ko arüh kohchehnung.

⁸Abinü thali Ijip lang arüh tsingrang kyothriti ko hon ko taripi kohroti hiwünung.

⁹Yangtsa kang anyahli lipü Syria Yangthsabanü Ijip mahnung, ta abi shehlinungthsa kangnung.

¹⁰“Syria Yangthsaba tsurütinü khata nengdang küdangnung ko rothsarü adrong nübülungnung. Arüh yola khüdunü kihmülüm roh-i wü arorüh roshengvi benung.

¹¹Zii chüro Ijip Yangthsabanü Syria Yangthsaba nyüm khatanung ko abi rothsarü mülung arangcheh tsü kohnung.

¹²Abinü kohcho ko rothsarü khütang kyüsehcho nengdang müthsehnung, ta abinü ledelü mükohnung.

¹³“Syria Yangthsabanü thali wü akhudi tenü rothsarü mülung adiu rungnümnung. Akyang rode, abinü amülung adiu ko thsunohrü akükyüde thali wünung.

¹⁴Hütsüde nyitsarü adrongnü Ijip Yangthsaba nyüm yanung. Ko Daniel, nührü yucho lanü axahrü khürünü arühnü müngucheh ngucho khunü nyüm yanung, ta arüh kohchehnung.

¹⁵Ko Syria Yangthsabanü ro betinung ko atbüticho yangdi khüdu mahchehnung. Ijip rothsarütinü mükhatapehnung; arüh yola athrungrüti mii re müzeh kangpehnung.

¹⁶Hütsüta Syriarü rothsarünü athsanyücho thsa arüh chah nguchinung. Abinü Anyengchocho Lih la tsü yanung ko hütsü abi tase pohki linung.

¹⁷“Syria Yangthsabanü abi rothsarü apüm no chitanung lümchung külüpnung. Hütsüpü arorüh yanglih kohnung khyanglangnü, abinü abi te yangtsa külüp atsulatpü khyüsohnung; ta abi lümchung tsü akoh müngunung.

¹⁸Hütsüpü abinü yuchoti kihdi lanü mahnung ko arüh adrong kohnung. Ta shuparü langnürü khüdunü abi kohnung ko abi mütsa tsü changkasohnung; ajüje abinü Syria Yangthsaba tüzümükhüm tsü changkasohnung.

¹⁹Yangthsabanü apu lih la roshengvi yang thali wünung, ta abi kohchehnung, ko abi nengdang hütsü achangka thsanung.

²⁰“Abi khangte yangthsarü apa khüdu chüronung, ko abinü yanglih likehnung shulüm müyurü chahnü alihmüthsü dhri sehchinung abi pohki athsarü khüdu müthehnung. Tunyah müli, hiba Yangthsaba tsü aranglangnü mapsehnung.”

²¹Riwüba tsünü mütozah yocho: “Anyüuba Syria Yangthsaba tsü nyitsarü amütsa yangthsanung mülengba khüdu thsanung, ta dhrongyengnü ro rahdunü tase tsü khyünung.

²²Sünü abi nyüm yanang, Amungthriba Bebürü thsanye süsohnung.

²³Yangtsa külüp abinü aparü yuchoti kihyochünung, ko abi yucho azikyah la du yangthsanye, abi alaa rezeh-u kangnung.

²⁴Abinü yuva müjüpü azehzang yanglih khüdu mahnung ko abi jümürü sünüsü münguchicho nguchi nguchinung. Hütsüta abinü amahchocho kohro tsü abi hehnehthsarü khyang changta jünung. Abinü roshengvi benung lümchung külüpnung, ta abi bekhyah tsü khiranung.

²⁵“Abinü müsi mülah Ijip Yangthsaba te khatanung arothsarü mülung amülah küdangnung, ta abinü rothsarü mülung amülah ko tase azeh nüpü khatanung rungnümnung. Ta Ijip Yangthsaba tsü kihyochünung ko akoh müngunung.

²⁶Abi shündhün liba athürütinü abi changsohnung. Abi rothsarü khütang süsohnung, ko arüh kohchehnung.

²⁷Hütsüde yangthsarü anyüh tsü tsingthsang khüdu chah tsunung, ta arüh lümchung tsü amütsa, ko khüdunü khüdu te arahkheh chonung. Arühnü lümcho mütikehnung, tunüo akyang tsü mah-e.

²⁸Syria Yangthsabanü abinü mahchocho kohro hipü kuh lang thalinung, ko Tsingrangba müyurü yudsi yangthsa tsü thsangnyangjünung lümnung. Abinü abi thsanyücho thsanung ko apu lih lang thalinung.

²⁹“Akhanglang abinü thali Ijip mahnung, ta hilalü amülongdicho tikehnung.

³⁰Romanrünü kihkuh lanü abi nyüm khatanung ronung ko hütsünü abi drümüyangnung. “Hütsüde abinü rihlong chüro thalinung ko Tsingrangba müyurü yudsi yangthsa changjünung müküpnung. Abinü hütsüba yudsi yangthsa pehjürüti yu nyinung.

³¹Abi rothsarü khürünü Amübükuh münyijünung. Arühnü lede kangmübü jüba yatinung ko Athrünyinung adrünung nguchi dikehnung.

³²Yangthsabanü hütsüba yudsi yangthsa pehjürü arahkhehnü kihcho abi trosohnung, ta Tsingrangba yu nyirünü arüh te khatanung.

³³Asithsa müyurü langnürütinü adrong te arüh lümlong changtanung. Ta azachah nengdang arüh khürü khata la kyüsehnung, khürü tahseh süsohnung ko khürü kengchopü arangyoh la yohpünung.

³⁴Hütsüta kyüsehtade, arüh adrong arühbürü jingchonung khyanglangnü arüh yola zehnye Tsingrangba müyurütilü atroba aikyah ngunung.

³⁵Asithsa langnürü khürü kyüsehnung, ta hi khu müyurü müsachehnung. Hiba hi Tsingrangba azengtacho akyang mürode lidu linung.

³⁶“Syria Yangthsabanü athsanyüchothsa nguchinung. Abinü tsingrangti tenü, ko Akohba Tsingrang tenü mii abi adiuepü tüzümükhümnung. Abinü hütsüta Tsingrangbanü abi mükhingchide nguchinung. Tsingrangbanü abinü chungcho akyokyo tsü nguchinung.

³⁷Yangthsabanü arüh jümürünü mübüba ko khingkurünü müiba tsingrang tsü mükhichinung. Ajüje, abinü tsingrang apüm mükhichinung, tunüo abinü hütsüri apüm tenü abi adiuepü lümnung.

³⁸Hütsü müli abinü roshengvi nyahyehba tsingranguthring dhichinung. Abinü arüh jümürünü khodesü mübo mürocho tsingrang khyang hon, taripi, thsidilung ko apa jiyüti jünung.

³⁹Abi roshengvi khümnung, abinü shuparü tsingrang mübürü bichinung. Sürünü abi tsü yangthsarü adiubaepü khyüchoro, arüh dhichinung, amichahba nguchiti jünung ko alih jiyü jünung.

⁴⁰“Syria Yangthsaba nengdang bekhyah achangka chihde, Ijip Yangthsabanü abi mahnung, hütsütade Syria Yangthsabanü nyübong kari, kuri ko kihkuh adrong bichi abi tase apümnü khatanung. Abinü kihmülüm kihnü kyo yanglih adrong mahnung.

⁴¹Abinü Anyengchocho Lih mii mahnung ko hajarnü hajar kyüsehnung, ta Edom, Moab ko anyingcho Amonrü tsichehnung.

⁴²Khode abinü yucho hütsüri tsü mahnang, Ijip mii müpehjünung.

⁴³Abinü Ijip lanü ranglicho kuthsi hon, taripi ko apa thsidi kuthsi hitsinung. Abinü Libya ko Ethiopia mahnung.

⁴⁴Hütsüde nyüchüro ko kihkulangnü roba yusi tsünü abi drüsohnung, ko abinü khütang rihlong chüro khata nyitsarü adrong süsohnung.

⁴⁵Abinü kihdi ko azong nyüh kahla Amübükuh kuphi la tsü Yangthsaba shükuh thsanung. Ta abi hütsüla atrorü süsü mülipü sünung.”