Read Sangtam Naga DANIEL 12 Bible Online

DANIEL 12 - Sangtam Naga bible

DANIEL 12

¹Ariri jengki khyüba riwüba tsünü yocho, “Hütsütade, nü müyurü nyahba adiuba riwürü Maikal chüronung. Hütsüpü, yanglih thripü mütikehdhengcho athsangthsi shikhe khüdu ronung. Hütsüba bekhyah rode, Tsingrangba vakha la aneng thrah liba nü yanglih la müyurüti atümung khümchonung.

²Asürü kanglinung: khürü müchangkaba akang lang, ko khürü müchangkaba achangba lang wünung.

³Asithsa langnürüti ning chah kyo hechinung. Ko sürünü adrong amüsaba kangsohcho arüh chenghi kyo lede vinung.”

⁴Abinü I te yocho, “Ko ade, Daniel, vakha tsü khangting ko limih müchangde nengdang shingtieng. Hütsüde adrongnü atikehcho tsü nyichehnung müküpnü arüh bekhyah amükang la pehnung.”

⁵Hütsüde nyüh anyüh yongkhi bekhüm khüu khüulang ya Ihnü ngucho.

⁶Anyüh yola khüdunü yongkhi munglang yaba riwüba te tsü tsingdhengcho, “Hiri anyemüyangnung achangka chihnung khüdoi nyahlinung?”

⁷Riwürü tsünü akheh anyüding ninglangthring dhimüsu müchangkaba Tsingrangba nengla yuchümcho. Abinü hita yo Ihnü yuchicho, “Hütsü kang asang pü achangsho linung. Tsingrangba müyurü dhsümthsecho changkade, hiri apüm tikehnung.”

⁸Abinü yocho Ihnü yuchicho, ta Ihnü hütsü münyichehcho. Hütsünü Ihnü tsingdhengcho, “Ta ABÜDONGBA, hi apüm khüta changkanung?”

⁹Abinü lalingcho, “Daniel, nüh ade tsieng, tunüo achangka nyümong mürode yu hiri rang yohpünungbae.

¹⁰Nyitsarü adrong müsachehnung. Amütsarünü münyichehnung ta arüh mütsa du linung; asithsarü dunü nyichehnung.

¹¹“Nyümong müthe kangmübü zahsohba nyümongtinü, hütsü athrünyinung adrünung, tikehba nyümong lanü nyümong hajar khüdu thsih anyüpü kuhre thsanung.

¹²Sürünü 1,335 nyümong pisa yuje cho linang arüh amüwanung!

¹³“Ko nüh Daniel, achangchi yuje cho lieng. Khang nüh sünye, achangka nyümong la nü jiyü khyüchonung nüh kangchehli ronung.”