Read Sangtam Naga DANIEL 3 Bible Online

DANIEL 3 - Sangtam Naga bible

DANIEL 3

¹Yangthsaba Nebukadnezarnü hon-nü kyothri khüdu athsenglang khehap rohre, ko adilang khehap dhüroh külüpcho, ko Babylon yanglih khüdu Dura ngah la hütsü yohpücho.

²Hütsüpü yangthsabanü abi pohki adirüti atümung yangthsarüti, governorti, chitungrüti, Commissionerti, kuthsi müshorüti, yukharüti, yukharü chitungrüti ko yanglihti la athsarüti atümung shimükhongnung yuzeng jücho. Arüh tsü Yangthsaba Nebukadnezarnü külüpba kyothri müsachehba la zehnung dsicho.

³Khode adirüti hiri atümung tsü müsachehba nengdang shibülung kyothri bete tsü yacho,

⁴züdenü yu khüdu yocho “Limih yanglih, ahung ko yucho atümung!

⁵Khode nührünü rühti, honglilah, ko tbenglah yuva papa yuchinang, nührünü mükhukeh Yangthsaba Nebukadnezarnü külüpcho hon kyothri tsü mübüng.

⁶Ko sünü mükhukeh hütsü mümübonang, abi tsü michang miloh la tsü dhiyohchünung.”

⁷Hütsüta, arühnü tbenglah yuva tsü yuchiyeng, limih yucho apümnü mükhukeh Yangthsaba Nebukadnezarnü külüpba hon kyothri tsü mübücho.

⁸Hütsüde Babylonrü khürünü Jihudarü mülangjünung thsatsa khyücho.

⁹Arühnü Yangthsaba Nebukadnezar te yocho, “O Yangthsaba, nüh kutsüp lieng!

¹⁰Nüh Yangthsabanü tbenglah khithsa tsü dikehyeng, nyitsarü müipinü mükhukeh hon kyothri tsü mübünung yuzeng jücho

¹¹ko sünü mükhukeh hütsü mümübonang michang la dhiyohchünung.

¹²Ade, nühnü Babylon yanglih michah yohpüba, Shadrak, Meshak ko Abednegorünü nüh adibong yuzeng münyi. Arühnü nü tsingrang mümübü ko nühnü külüpba kyothri te mümükhukehre.”

¹³Hütsü khu, Yangthsaba rihlong chürosohcho ko arüh asang tsü abi yang noronung yuzeng jücho.

¹⁴Abinü arüh te yocho, “Shadrak, Meshak, Abednego, Nührünü I tsingrang mümübü ko Ihnü külüpba kyothri te mümükhukehreba tsü yuje mah-o?

¹⁵Hütsüeko ade, rühti, honglilah ko tbenglah yuva papa yuchiyeng, nührünü mükhukeh kyothri tsü mübübae. Nührünü münyikhang, hütsüdenü michang-miloh la tsü rangyohchünung. Nührü khümchonungthsa apa tsingrang lilepü nührünü lümrü do?”

¹⁶Shadrak, Meshak ko Abednegorünü lalingcho, “O Adibong, ihrünü ihrübürü mükhümnung.

¹⁷Ihrünü mübüba Tsingrangnü lümkhang michang ko nü tase lanü ihrü khümchonung kohle.

¹⁸Ta Abinü ihrü mükhümcho nye, ihrünü nü tsingrang mümübünung ko nühnü külüpba hon kyothri te mümükhukehnung.”

¹⁹Hütsüde Nebukadnezarnü Shadrak, Meshak ko Abednego te rihlong chürocho. Achotsü abinü abi nyitsarüti te michang tsü lede tenü dhünyehpinü alaa adhsau thsanung yuzeng jücho.

²⁰Hütsüpü abinü abi rothsarü yola re azeh-uba khyang arüh asang tsü rahpü michang mihloh la tsü dhiyohchünung yuzeng jücho.

²¹Achotsü arühnü arüh jengki ajeng fükhüm, ko jengki kuthri ko apa apüm khyüpü rahcho ko michang mihloh la tsü dhiyohchücho.

²²Ko Yangthsabanü michang tsü alaa thsa thsasohnung yuzeng jüchonü, adhiwürü anyahrüti tsü mihmülenü trüpcho.

²³Hütsüta Shadrak, Meshak ko Abednego, arahshüshünü mihloh long la longyohcho.

²⁴Nehdunü Nebukadnezar nyeka tsungmüsucho. Abinü abi pohki adirüti te tsingdhengcho, “Ihsanü nyüh asang du rahpü mihloh la dhiyohchücho mahrü do?” Arühnü lalingcho, “Ho, Yangthsaba.”

²⁵Abinü tsingdhengcho, “Khang tuepü Ihnü nyüh müyü michang la rachi nguro? Arüh mürah ko arüh tu thsakeh müngure ko amüyüuba tsü ninglang riwürü kyo ngure.”

²⁶Achotsü Nebukadnezarnü michang mihloh trahtri yang küdupü züdecho, “Shadrak! Meshak! Abednego! Amichahba Tsingrang dikehrüti! Chürung!” Ko hütsüdenü arüh chürocho.

²⁷Yangthsarüti governorti, arüh chitungrü ko Yangthsaba pohki adirüti atümung michangnü mütahrü arüh asang tsü dhengnung shibülungcho. Arüh chah anbüh mii mümüru, arüh jengki mütah ko arüh chah mikhu mii müxümcho.

²⁸Yangthsabanü yocho, “Shadrak, Meshak ko Abednego Tsingrang neng seing! Abinü ariwürü mütheh Abi dikehrü ko Abi chah longlangrü hiri nyitsarü khümchoko. Arühnü arüh Tsingrang pehpü aparü tsingrang te mükhukeh mümübünung arüh akang mii khangcho.

²⁹“Ade Ihnü yuzeng jüre: Limih, ahung ko yucho khürünü Shadrak, Meshak ko Abednego Tsingrang mükhimüngukhang, abi khanahnung ko abi kuh sehnyeh kangjünung. Hi kyo khümchonungthsa apa tsingrang müle.”

³⁰Ko Yangthsabanü Shadrak, Meshak, ko Abednego arüh asang Babylon yanglih la amungthri jingkih la dhikehcho.