Read Sangtam Naga DANIEL 5 Bible Online

DANIEL 5 - Sangtam Naga bible

DANIEL 5

¹Romang khüdu Yangthsaba Belshazarnü adirüti nyüh hajar khüdu nengdang thsüti arangcheh külüpcho, ko arühnü müjang yongkha yongcho.

²Arühnü yong pümde, au Nebukadnezarnü Jerusalem Amübükuh lanü hiroba hon ko taripi shing ko mütpah-tbhü, Yangthsaba ko abi adirüti, anitpürüti ko ashümrütinü hütsüri lanü yongnung nengdang hironung yuzeng jücho.

³Hütsütade tsünü hon shing ko tbhü tsü hirocho ko hütsüri lanü arüh atümungnü yongkha yongcho

⁴ko hon, taripi, imüyeng idhsenü külüpcho tsingrang nengsecho.

⁵Dhrongyengnü nyitsarü kheh khüdu chüro khütang vi yaba dsidong bete amünohcho züdi chah tsü thrahnung dikehcho. Ko kheh tsünü thrah yade Yangthsabanü ngucho.

⁶Aromih pha-a kangcho ko khura drümüyangchonü amükhong mii dhridhricho.

⁷Hütsüde abinü khürünü wü rahzikehrü, amongrü ko ningmüchehrü noronung yocho. Khode arüh norocho, Yangthsabanü arüh te yocho, “Sünü athrahcho hi khicheh I te adüzü yochehnang, yangthsarü jengki anyahrüm khümsohnung, ahong la hon lah lahsohnung, ko I yanglih la tase asanguba kangsohnung.”

⁸Yangthsaba pohki asithsamüdherü rocho, ta arüh sünüsü hütsüba athrahcho tsü mükhihchehcho mahkhang abi te hütsü adüzü müyochehcho.

⁹Khura lümtpahnahchonü Yangthsaba Belshazar alaa aphah-u kangcho, ko abi pohki adirütinü tu nguchinung lüm la mürocho.

¹⁰Yangthsaba ko abi adirüti yuva yuchi yangthsalatpü atpanü thsüti khyo yaba kuhla tsü züducho. Abükyünü yocho, “O Yangthsaba, nüh kutsüp lieng! Khura lümlong tpanah dro tüli.

¹¹Nü yanglih la Amüsa Tsingrang nbü kehrü nyüh khüdu lile. Nüu chichah abi chahnü lümlong atsa, amüdhe ko anyichehba ngu licho. Hütsünü nüu Yangthsaba Nebukadnezarnü amüchehrü, azikehrü, amongrü ko ningmüchehrü, atümung michah ayingba kangsohcho.

¹²Abi chah melang changnah yonung, arangyu yochehba ko lümdhama kyangsohba ko asithsa lümlong kehle; hütsüeko Belteshazar dsiba Daniel dsinung müthehng, ko abinü nü te hiri apüm adüzü yonung.”

¹³Hütsüde tsünü Yangthsaba yanglang Daniel norocho, ko Yangthsabanü abi te tsingdhengcho, “Uwanü Juda lanü noroba Jihudarü yangtsirü Daniel tsü nüh mah-o?

¹⁴Nü chah Amüsa Tsingrang nbü ko asithsamüdhe lümlong licho Ihnü yuchiko.

¹⁵Asithsamüdherü ko rahzikehrüti athrahcho hi khisohnung noroko, ta arühnü adüzü tsü müyocheh.

¹⁶Ta nühnü rang liba adüzü rangcheh yorepü Ihnü yuchire. Nühnü athrahcho hi khichehkhang, ko hütsü adüzü I te yochehkhang, yangthsarü jengki anyahrüm khyüsohnung, nü hong la hon lah lahsohnung, ko I yanglih la nüh asanguba tase linung.”

¹⁷Danielnü lalingcho, “Nü jiyü tsü nüpu nengdang yohpüng mahkhang khürü khyang jüng. Ihnü nüh adibong te athrahcho tsü khiyonung ko hütsü adüzü yonung.

¹⁸“Amichahba Tsingrangnü nüu Nebukadnezar tsü yangthsarü arangcheh khüdu kangsohcho ko abi khyang adi ko ahechi jücho.

¹⁹Abi dirachonü limih, ahung ko yucho apümnü abi drücho, ko dhridhricho. Abinü kyüsehnyükhang kyüsehcho, lisohnyükhang lisohcho. Abinü lümkhang dhichicho, mahkhang ashah khyüsohcho.

²⁰Ta abi müthseh, hongzi, ko türütseh kangchonü, abi Yangthsaba pümji lanü khyümüicho ko abi ahechi changpehcho.

²¹Nyitsarü yolanü abi iipehcho, ko alümlong kanglungrü kyo kangsohcho. Abi kanglungrü yola licho, misüpung kyo zanu tsucho, ko jungchah yingkihnü leh yüpcho. Achangka la abinü limih yanglih apüm akohba Tsingrangnü nüchire ko abinü jünyürü khyang hütsü jürepü nyengchocho.

²²“Ta nüh, abi tsurünü, hiri apüm müdhepü azikyah mükangre.

²³Nühnü ninglangrü Abüdongba nyüm nguchire ko Abi Amübükuh lanü shingtbhürü khyüchehko. Ko nüh, nü pohki adirüti nü nitpürüti, ko nü ashümtinü hütsüri lanü yongkha yongre, ko tu münguba ko müyuchiba ko tusü mümüdheba hon, taripi, imüyeng idhse, sing, ko lungnü külüpcho tsingrang nührünü sere. Ta nühnü Tsingrangba sünü nü akang ko asü nü nguchi apüm nüchiro Abi müdhichire.

²⁴Hütsünü yu hiri thrahnung Tsingrangbanü kheh tsü müthehcho.

²⁵“Thrah liba tsü hi: “MENE, MENE, TEKEL ko PARSIN!

²⁶Adüzü tsü hi: MENE—khidhengko, Tsingrangbanü nü yanglih nyümong khidhengko ko changkasohko;

²⁷TEKEL—ho-dhengko, ahosing lanü ho-dhengko ko müking;

²⁸PERES—changnahko, nü yanglih changnahko ko Mediarü ko Persiarü khyang jüko.”

²⁹Hütsütade tsünü Belshazarnü akulirü te, Daniel khyang yangthsarü jengki anyahrüm khyüsohnung ko ahong la hon lah lahsohnung yuzeng jücho.

³⁰Hütsü romang tsünü Babylon Yangthsaba, Belshazar tsü kyüsehcho;

³¹ko kang rohrepü anyüh azirü Mediarü Dariusnü yanglih tsü khyücho.