Read Sangtam Naga DANIEL 6 Bible Online

DANIEL 6 - Sangtam Naga bible

DANIEL 6

¹Dariusnü abi yanglih apüm nengdang governor thsihpü mükyü thronung dhrongchehcho.

²Hütsü chah lahkeh, abinü governorti dhengyehnung ko Yangthsaba nguchi dhengyehnung Daniel ko aparü nyüh anyüh throchehcho.

³Tunyah mülie aparü adhengyehrü ko governorti tenü Daniel nguchi akoh-u dhengchehcho. Abi tsü alahcheh-u thsachonü, Yangthsabanü yanglih apüm michah abi yohpünung lümchung licho.

⁴Hütsüde aparü adhengyehrü ko governortinü Daniel nguchi la mülang rangnung müküpcho, ta Danielnü thsameh mahkhang yuje mücho tusü münguchichonü arühnü mükohcho.

⁵Achotsü arühnü arüh-e arührü chotacho, “Abi yudsi yangthsa lahpinü mahkhang, Ihsanü Daniel mülangjünung lang pa tu müngunung.”

⁶Achotsü arühnü Yangthsaba yanglang wünü yocho, “O Yangthsaba Darius, nüh kutsüp lieng!

⁷Nü yanglih la yangthsarüti ihrü apüm adhengyehrü, governorti chitungrü ko aparü adirüti apümnü Yangthsabanü yuzeng khüdu jübaepü betrümko. Nyümong sangre Yangthsaba chah khu sünüsü tu tsingrang mahkhang sütesü tu mükihchinung yuzeng jüng. Sünü yuzeng hi thsangnyangnang kihkhünying kuhla rangyohnung.

⁸Hütsüeko nüh adibongnü hiba yuzeng jüng, ko sain thsaang, ko hütsü Mediarü ko Persiarünü mümülichichehba yuzeng kangnung.”

⁹Achotsü Yangthsaba Dariusnü yuzeng la tsü sain thsacho.

¹⁰Khode yuzeng la tsü sain thsako pü Danielnü yuchicho, abinü kuh lang wücho. Abi kuh amunglang chongsah khüdu la, Jerusalem lang pipü nyübongkhi khürü licho. Hütsüla, abi yah roh-i, khangthru liba nyübongkhi te tsü abinü nyümong la asangpi mükhukeh Tsingrangba te dangkhidangnangcho.

¹¹Khode Daniel rorütinü abi dangkhidangnangcho rangchehcho,

¹²Daniel mülangjünung Yangthsaba yanglang arüh apüm müjang wücho. Arühnü yocho, “O Yangthsaba, nyümong sangre nü chah khu sünüsü tu tsingrang te mahkhang sütesü tu mükihchinung, mahkhang kihkhünying kuhla rangyohchünung pü yuzeng külüp nühnü yuzi müthsacho do?” Yangthsabanü lalingcho, “Ho, mülihchinung mükohba Mediarü ko Persiarü yuzeng adrengdreng khüdu jüko.”

¹³Hütsüde arühnü Yangthsaba te yocho, “Juda lanü yangtsirü nyüh khüdu Danielnü, nü jengreng müdrüre ko nü yuzeng münyire. Abinü lede nyümong la asangpi dangkhidangnangre.”

¹⁴Yangthsabanü hi yuchide, abi mükünyangcho ko Daniel khümchonung abinü kohcho lang yangchicho. Abinü maanü abi khümchonung müküpdhengcho.

¹⁵Hütsüde nyitsarüti tsünü thaliro Yangthsaba te yocho, “Mediarü ko Persiarü yuzengnü Yangthsabanü sain thsapü yuzeng mülihchinung mükoh pü nüh adibongnü müdhele.”

¹⁶Achotsü Yangthsabanü Daniel rangnung yuzeng jücho ko abi kihkhünying kuhla rangyohchücho. Abinü Daniel te yocho, “Nühnü hidoi yochonyi dikehba Tsingrangnü nüh khümchoung.”

¹⁷Sünüsü Daniel mükhümchosohnung, kangdi kuh khi bekhüm la lung khüdunü niiticho, ko lung chah tsü apu ko abi adirüti yo ashingtisingnü shingticho.

¹⁸Hütsüpü Yangthsabanü akuhlang thalicho, ko tu mütsuyongpü ko tu müchotapü müyüpmüso aromang tsü khusohcho.

¹⁹Nyangnyü khüu mütoh Yangthsabanü shemüsupü kangdi kuh lang tsü dhsüthsa wücho.

²⁰Abinü hütsü chihyeng züde dsicho, “Daniel, Akang liba Tsingrang dikehrü! Nü Tsingrangnü kangdi bekah lanü nüh mükhümcho-o?”

²¹Danielnü lalingcho, “O Yangthsaba, nüh kutsüp lieng!

²²I Tsingrangnü abi riwürü müthehnü kihkhünying be khangtijücho, hütsünü arühnü Ih mülehrohpejü. Tunüo Ih achomükeh ko nü jingte tu müthsameh pü Abinü müdhele.”

²³Hütsüde Yangthsaba dira künyangcho ko kangdi kuhla tsünü Daniel nüchehnung yuzeng jücho. Achotsü arühnü abi nüchehcho ko arühnü abi chah tu aiha müngucho, tunüo abinü Tsingrangba chah yudsicho.

²⁴Hütsüpü abinü Daniel mülangjürü atümung rangnung yuzeng jücho, ko abinü arüh tsü arüh nitpürü ko tsuzarüti zeh kihkhünying kuhla tsü dhiyohchücho. Arüh tsü züdu ajongnah mii müchih-e, kihkhünyingti tsünü arüh chah tsohkeh arüh rüh mii mütrehnahcho.

²⁵Hütsüpü Yangthsaba Dariusnü limih la yanglih, ahung ko yuchoti apüm te hi thrahcho: “Salüm!

²⁶I yanglih la lirüti atümungnü Daniel Tsingrang drüng ko jengreng jünung Ihnü yuzeng jüre. “Abi akang liba Tsingrang, ko Abinü müchangkapü thsanung. Abi yanglih khodesü müchangnung, ko Abi zii müchangkanung.

²⁷Abinü khümchore ko iichore; Abinü ninglang ko alih la anyemüyangnung ko thsayahiya nguchire. Abinü kihkhünyingnü mükahsehnung lanü Daniel khümchoko.”

²⁸Hütsüta, Darius chichah ko Persiarü Cyrus chichah Daniel künyang licho.