Read Sangtam Naga HOSEA 10 Bible Online

HOSEA 10 - Sangtam Naga bible

HOSEA 10

¹Israel tsü asihnü mütsenglüpba shükusih kyo licho. Arüh alaa pungrohiroli, arühnü bholu alaa du külüplicho. Arüh lihnü amüwa alaa chürosoh li, arühnü mübüba amüsa lung tsü alaa atsau külüplicho.

²Nyitsarünü sürü lasih akhürah liro arüh münyi ngang ade thsanungbae. Tsingrangbanü arüh bholu ko amüsa dongdi thsangnyangjünung.

³Tunyah mülipü hiri nyitsarünü, “Ihrünü ABÜDONGBA müdrücho ngang ihrü Yangthsaba müle! pü yonung. Ta Yangthsarü khüdunü ihrü shulüm tu nguchichehnung?”

⁴Arühnü adeng züderü arahkheh nyengchorü ko amii müliba yangtsa külüpre. Axücho luh la müyüh kehba za chicho kyo yuje tsü arahkheh kangko.

⁵Samaria yangdi la lirütinü drünung ko Bethel la hon misüpung chahcho nengdang meshünung. Arüh ko bebürü sürünü kyothri dikehcho, arühnü hütsü nengdang tranung. Kyothri chah ahechi khohpehjüde arühnü tranung.

⁶Arühnü Assyria lang yangthsaba khyang kyothri tsü hiwü jiyünung. Hütsüta nguchicho ngang Israel wahnung ko ashah khyünung.

⁷Abükyü yangthsaba tsü kih michah singtang kyo hitsinung.

⁸Israelrünü kyothri mübüba Aven khang chah amübükuh tsü thsangnyangjünung. Arüh bholu michah tsü zeng ko za chinung. Nyitsarünü akhang azong te, “Ihrü tsungtieng ko ihrü haptieng” pü yonung.

⁹ABÜDONGBAnü yore, “Israelrünü Ih nyüm Gibea lanü amünyi shitpahcho ade yingcheh müzahre. Hütsünü Gibea la chitanü arüh iiphünung.

¹⁰Ihnü hiri amünyi nyitsarüti hi mahnung ko khingchinung. Arüh nyüm yuchoti tsungphung khüdu thsanung ko arüh münyi khütang ngang arüh khingchinung.

¹¹“Khüdupilü Israel tsü misü athsühi manyehnung rungnüm rahsehcho kyocho. Ta adelü Ihnü atsah atsa ahong la tsü nguchi alaa müküp nguchisohnung hongzih yohjünung. Ihnü Juda khyang axüsing tphahsohnung ko Israel khyang mükheh dümsohnung.

¹²Ihnü yocho, ‘Nüpu nengdang alih asi xüng, Amüsaba khyüm, ko Ih mübücho ngang amüwa xanung. Ade Ih nührü ABÜDONGBA yang ximülanung bekhyah, ko Ihnü ro nührü michah amüwa mükhakehjünung.’

¹³Ta hütsü mülih nührünü amünyi khyümcho ko hütsü xacho. Nührünü arahkheh shucho singsih nührünü tsucho. “Nührünü nührü nyübong kuri ko rothsarü sühdi chah longlangchonü,

¹⁴nührü yang khata ronung, ko nührü roshengvi apüm thsangnyangjünung. Hütsü Yangthsaba Shalman-nü khata la Betharbel thsangnyangjüba, ko khingkurü azarüti kyüsehkhangba nyümong kyo linung.

¹⁵Bethelrü, nührü chah hütsüta tikehnung, tunüo nührünü adrünung amünyi shitpahcho ngang. Khata dikehyeng, Israel Yangthsaba sünung.”