Read Sangtam Naga HOSEA 11 Bible Online

HOSEA 11 - Sangtam Naga bible

HOSEA 11

¹ABÜDONGBAnü yore, “Israel azade Ihnü müicho ko I tsurü roh-i Ijip lanü nüchehcho.

²Ta Ihnü abi alaa dside, abi alaa I tenü za tsire. I nyitsarünü Baal mübücho; arühnü kyothri khyang axümlichi tahcho.

³Ta Israelrü tsehnung doba tsü Ih thsacho. Ihnü I nyitsarü I khehla wüpcho, ta Ihnü arüh xükümchehcho arühnü mümüdhe.

⁴Ihnü arüh Ipu yanglang müinü norocho. Ihnü dhimüsu Ipu müchüp chah ngakehsohcho; Ihnü mükhurangpü arüh kangchehcho.

⁵“Arühnü Ih yang ximülanung thsonglicho, hütsü ngang arüh Ijip lang thalinung, ko Assyriarünü arüh michah yangthsanung.

⁶Arüh yangdi la khatanung ko yangdi tbükhüm thsangnyangjünung. Hütsünü I nyitsarüti changjünung tunüo arühnü arüh tsacho du nguchire.

⁷Arühnü I tenü za tsinyüre. Arüh hong la zehba hongzih shulüm arühnü züdenung, ta sünüsü hütsü müpehjünung.

⁸“Ihnü nührü khüta pehjünung, Israel? Ihnü nührü khüta thrüchachüpehnung? Ihnü Adma thsangnyangjücho kyo nührü changjodhengcho do? mahkhang Zeboim kyo bichicho do? I lasihnü hütsü münguchisohnung! Nührü nengdang I amüi tsü dirale.

⁹Ihnü I zichüro nührü mükhingchinung; Ihnü Israel thali müchangjünung. Tunüo Ih Tsingrangba ta nyitsarü mah. Ih Amüsa la nührü te lile, I zichüro nührü yang müronung.

¹⁰“Ihnü arüh rorüh chah kangdi kyo rengkeh jüde, I nyitsarünü Ih iironung. Arühnü nyüzüdu langnü Ih yangchi shang ronung.

¹¹Arühnü Ijip langnü uza kyo, ko Assyria langnü mümüdhrü kyo tsaya ronung. Ihnü thali kuh yang arüh noronung, Ih, ABÜDONGBAnü choko.”

¹²ABÜDONGBAnü yore, “Israelrünü arahkheh ko thsüyohchübanü Ih mükangtiko, ko Judarünü I longlangba ko Amüsa Tsingrang nyüm adesü nyümre.