Read Sangtam Naga HOSEA 12 Bible Online

HOSEA 12 - Sangtam Naga bible

HOSEA 12

¹Israelrünü anyangnyünü ma nguchicho lüpcho tsü amii müle ko athsangnyang du. Arüh yola thsüyohchüba ko shühkhatohba alaa zikehre. Arühnü Assyriarü te yangtsa külüpre ko Ijiprü te shithsabhülehre.”

²ABÜDONGBAnü Judarü nyüm mülangjüba khüdu hironung; Israelrünü nguchicho nengdang abinü arühsü khingchinung. Arühnü nguchicho aleng Abinü arüh khyang jülinung.

³Arüh jümürü Jakobnü arüh amung Esau te atpa mila lidenü khatamüsucho; Jakob zipü abinü Tsingrangba te khatacho,

⁴ko abinü riwürü khüdu te khatacho ko kohcho. Abinü tranü amüwa chingcho. Ko Bethel la Tsingrangbanü ro Ihsa jümürü Jakob te chotacho.

⁵Hiba hi ABÜDONGBA Akohba Tsingrang, ABÜDONGBA anengnü dsi Abi mübünungbae.

⁶Hütsüeko ade, Jakob chahnü trahchochoti, nührü Tsingrang chah longlang ko abi yang ximülang. Yocho nyieng ko yuje choung, ko nührü Tsingrangnü nguchinung rangcho ying.

⁷ABÜDONGBAnü yore, “Israelrü tsü Kananrü kyo yuje mücho; Arühnü arahkheh ahosing bichi alihrü arühnü kihyochüre.

⁸Arühnü, ‘Ihrü alirü, ihrü suro atsaepü yore. Ko ihrü yuje mücho alirü kangcho sünü mülang jünung mükoh.’

⁹Ta Ih ABÜDONGBA Tsingrang Ijip lanü nührü nüchehbongnü, nührü akhulang lipilih la shükuh la licho kyo kangsohnung.

¹⁰“Ihnü azikehrü te chode müngucheh adrong jücho, ko arüh khu müyurü khyang amüzahnung yu jüko.

¹¹Ta Gilead la kyothri mübürü ko sürünü mübüro arüh sünung. Gilgal la misüpung kangmübü jüko, ko hütsüla bholu tsü rangmü kang lungsüh kangnung.”

¹²Ihsa jümürü Jakob tsü Mesopotamia lang rang tsicho, hütsüla anitpü khyünung nengdang bürü dikeh santi nyahjücho.

¹³ABÜDONGBAnü Ijip la ayurü suro lanü Israelrü khümchonung azikehrü mütheh arüh xükümsohcho.

¹⁴Israelrünü ABÜDONGBA khütang wahsohcho; arüh thsamehcho ngang asünung lengcho. Arühnü ashah hirojücho nengdang ABÜDONGBAnü arüh khingchinung.