Read Sangtam Naga HOSEA 14 Bible Online

HOSEA 14 - Sangtam Naga bible

HOSEA 14

¹Nührü ABÜDONGBA Tsingrang yang thalieng, Israelrü. Nührü münyinü nührü jing müthi khüluko.

²ABÜDONGBA yang thalieng, ko akihchiba khi Abi te nührü amübü thsasohng: “Ihrü mülang apüm pehjüng ko ihrü kihchicho nyieng, ko ihrünü nyengchocho kyo ihrünü Nüh senung.

³Assyriarünü khodesü ihrü mükhümchonung ko rothsa kuritinü ihrü mütsungtinung. Ihrünü khodesü kyothri tenü ihrü tsingrangbaepü müyonung. O ABÜDONGBA, tu chah mütsikehrü te Nühnü chomang.”

⁴ABÜDONGBAnü yore, “Ihnü I müyurü nüli ronung. Ihnü I lasih apümnü arüh müinung; arüh te adelü zii müchüro.

⁵Israelrü te akung lih la Ih tsing kyo linung. Yungpi kyo arüh pinung; Lebanon sing kyo arüh ara ranung.

⁶Arüh ara asinü akang linung, ko olive sing kyo atsah atsa linung. Arüh Lebanon la cedar kyo axümlichinung.

⁷Thali arüh I tsungtiba pohki linung. Arüh tbü la chisicho kyo zinung ko shükusiluh kyo zehzangnung. Arüh Lebanon yongkha kyo adangchi thsanung.

⁸Israelrünü adelü kyothri nengdang du münguchinung; Ihnü arüh dangkhidangnang lalingnung ko arüh xükümnung; Lede müyah liba singdong kyo, Ihnü arüh tsikehsohnung; Ih arüh amüwa dong.”

⁹Sürü lümlong liro arühnü hi nyichehng ko sürünü münguchehro hi müdheing. ABÜDONGBA lang tsü yuje ko Amüsarünü hütsü bichire, ta münyirü hütsü la müthikehre.