Read Sangtam Naga HOSEA 2 Bible Online

HOSEA 2 - Sangtam Naga bible

HOSEA 2

¹Hütsüeko Israelrü, “Tsingrangba müyurü” ko “ABÜDONGBAnü müibarüti dsibülung.”

²I tsurüti, kihchieng, nü tpa tsü I nitpü mahnye, ko Ih anii mahnye. Abükyü te nahtrahnaxeng ko mabomashi lanü zahnung kihchieng.

³Abükyünü münyikhang, asuro nyümong roh-i Ihnü ajengki khohjünung. Ihnü abükyü akungse lih kyo kangsohnung, ko axochonü süsohnung.

⁴Ihnü atsurüti chah müchomangnung; arüh ashahmükeh nahtrahnaxenglarü tsurüe.

⁵Abükyünü yocho, “Ihnü I müitarü kuh lang wünung, arühnü I khyang tsuyongnung kih, shü, tuji ko yongkha jünung.”

⁶Hütsünü abükyü lang yatinung zengnü tbü tbünung ko züdi chungtinung würe.

⁷Abükyü müirü khanglang iishangnung ta mü-iiphünung. Abükyünü arüh yangchinung ta müngunung. Hütsüde abükyünü yonung, “Ihnü I nii ahiba yang thalinung, Ih ade tenü akhudi atsauba thsako.”

⁸Abükyünü Baal mübüde bichiba tsuyongnung, yongkha, olive tuji, ko hon ko taripi apüm jüba tsü Ih-epü khodesü mümüdhe.

⁹Hütsüeko mamüki la Ihnü tsuyongba ko yongkha, ko Ihnü jüba shunbüh shü ko ajengpa shü khyülinung.

¹⁰Ihnü abükyü müitarü betenü ashü khohjünung, ko sünüsü I rihlong lanü abükyü mükhümchochehnung.

¹¹Ihnü abükyü choo ko kang la künyangtaba thsüti, amünyümong müzehba, ko mübü lahpi shibülungba apüm zahsohnung.

¹²Abükyü te müitarünü jüchoba shükusih kih ko ngurüsih thsangnyangjünung. Ihnü abükyü shükusiluh ko singsihyo lipilih kangsohnung ko rangmü kanglungrünü hütsü thsangnyangjüsohnung.

¹³Abükyünü Ih nbüchüpü Baal mübücho ko amüitarü khanglang wünung thsidi lah yohpü wüba shikhe shulüm Ihnü abükyü khingchinung.

¹⁴Hütsüeko Ihnü abükyü thali lipilih lang nowünung; hütsüla Ihnü amüi yunü kihchonung.

¹⁵Ihnü abükyü shükusiluh thali jünung ko Chongcha Ngah tsü alongdi trahtri kangsohnung. Hütsüla abükyünü Ijip langnü rode azade nguchicho roh-i I te lalingnung.

¹⁶Hütsüde thali abükyünü I te I nii pü dsinung, adelü abükyünü I te Baal pü müdsinung.

¹⁷Ihnü khodesü abükyü khyang Baal neng müdangchisohnung.

¹⁸Hütsütade I müyurü mülerohpejüsohnung Ihnü rangmü kanglungrü ko uzati te azengchotaba külüpnung. Ihnü alih lanü khata thsunohrü, nohsheng ko singthsalu apüm khyümüipehjünung, ko I müyurü atbachi ko yangtsa la lisohnung.

¹⁹Israel, Ihnü nüh I nitpü kangsohnung; Ih yuje ko yujecho linung; Ihnü nü te müthrehba amüi ko yanglilüm ngusohnung ko nüh lede I yo kangsohnung.

²⁰Ihnü I anyengchocho yohpünung ko nüh I yo kangsohnung, ko nühnü Ih ABÜDONGBA roh-i bichinung.

²¹Hütsüde Ihnü I müyurü Israelrünü kihchicho lalingnung.

²²Ihnü alih khyang tsing rosohnung, ko alihnü fürü, shükusih ko olive sihsohnung.

²³Ihnü I müyurü lisohnung ko zehzang kangsohnung. Ihnü “Mümüiba, ko I Nyitsarünü mah, pü yobarüti te, amüi ngusohnung. Ihnü Nührü I müyurü pü ko arühnü, Nüh ihrü Tsingrang, pü yonung.”