Read Sangtam Naga HOSEA 4 Bible Online

HOSEA 4 - Sangtam Naga bible

HOSEA 4

¹Hiba lih la lirü nyüm ABÜDONGBAnü mülangjüba khüdu lile. Abinü tu yoro, Israel, nyieng: “Alih la longlangba ko amüi müle, ko nyitsarünü Ih Tsingrangepü mümüdhe.

²Arühnü nyengchore ko thsangnyangre; arühnü arahkheh chore, mapsehre, führe ko nahtranahxengre. Yuzeng thsangnyangba alaa, ko mapsehba khüdu khanglang khüdu zire.

³Hütsünü alih kungpehnung, ko hütsüla liba lüpcho sopehnung. Kanglungrü ko uzati apüm ko ngu miinü sünung.”

⁴ABÜDONGBAnü yore, “Müyurü süsü tümülangjü mahkhang tükhata, ta I longmüsüba tsü nührü bebürü nyüm lile.

⁵Ama atsingse nührünü thsamehre, ko azikehrü nüsü nührü du kyo nguchire. Ihnü nührü atpa, Israel changjünung.

⁶I müyurüti mülangjüko tunüo arühnü Ih mümüdhe. Nührü bebürünü Ih mümüdhe ko I adoba mükhyücho, hütsünü Ihnü nührü mükhyüchore ko nührü tsurüti I bebürü müthsasohnung.

⁷“Nührü bebürü alaa kangli, alaa du Ih nyüm amünyi shitpahre, hütsünü nührü adhichi ashah kangsohnung.

⁸I müyurü amünyi khu nührü likehre, hütsünü nührünü arüh amünyi alaau shitpahsohnyüre.

⁹Nührüsü müyurü roh-i du khingchinung! Ihnü nührü khingchinung ko nührü thsamehcho ngang hisohnung.

¹⁰Nührünü nührü nohlüm mübü tsunung, ta yang du linung. Nührünü amüwa tsingrangti mübünung, ta tsuzarü mülinung, tunüo aparü tsingrang khanglang wünung nührünü I tenü zacho.”

¹¹ABÜDONGBAnü yore “Yongkha ahi ko asinü I müyurü lümlong thsangnyangjüre!

¹²Arühnü singchang khüdu te thsayahiya tsingdhengre! Singchang tsünü arühnü müdhenyücho tsü yore! Arühnü Ih pehjüko. Khingkurü khüdu nahtrahnaxenglarü kangcho kyo, arühnü aparü tsingrang khyang khakhuchüjüko.

¹³Arühnü akhang chah Amüsa müdüm la tsü kangmübü jüre, ko akhümki tsü tsa ngucho dunü, arühnü akhang chah tsü singdong athseng pohki axümlichi tahre. “Hütsü khu nührü tsularütinü arüh afü ire, ko nührü tsunyahlarütinü nahtrahnaxengre.

¹⁴Ta Ihnü hütsü nengdang arüh mükhingchinung, tunüo nührübürü mii amübükuh la nahtranahxenglarü te würe ko arüh yola aparü tsingrang khyang kangmübü jüre. Choyoh yunü yocho kyo, ‘Lümlong müliba nyitsarülü changnung.’

¹⁵“Nührü Israelrünü I te yuje mücho nye, Judarülü hütsüta tüthsasoh. Gilgal mahkhang Bethaven la tümübü mahkhang hütsüla akang liba ABÜDONGBA nengla tu tünyengcho.

¹⁶Israelrü tsü kuri atrüh kyo hongzile. Zanu yola sanza kyo Ihnü khüta arüh kangnung?

¹⁷Israelrü tsü adelü kyothrinü müshülipehko. Arüh jangjang thsasohnung.

¹⁸Yongkha khütang yongpü, ashah rang nahtranahxeng la arühnü künyangre.

¹⁹Nyübongnü kyo arüh fotsinung, ko apa tsingrang kangmübü shulüm arüh ashah khyünung.