Read Sangtam Naga HOSEA 6 Bible Online

HOSEA 6 - Sangtam Naga bible

HOSEA 6

¹Müyurünü yore, “Ihsanü ABÜDONGBA yang ximülanung! Abinü Ihsa thsakehjüko, ta Abinü Ihsa kyangjünung; Abinü Ihsa lerohpehjüko, ta Abinü Ihsa mathsa rümjünung.

²Abinü nyümong anyüh asang la Ihsa kanglisohnung, ko Abi te Ihsa linung.

³Ihsanü ABÜDONGBA müdhenung müküpnung. Tsingsenung tsüpcho kyo, ko machimaki tsingnü alih thsangjücho kyo, Abi Ihsa yang ronung.”

⁴Ta ABÜDONGBAnü yore, “Israel ko Juda, Ihnü nührü te tu nguchinung? I te nührü amüi tsü anyangnyü yingthsa kyo changpehre; anyangnyü züchangba yingkih kyole.

⁵Hütsünü yukhaba ko achangba yusi hipü azikehrüti nührü yang rosohcho. Ihnü nührü chahnü khyünyüba tsü atsitsa hi du.

⁶Ihnü kanglungrü kangmübü mah, ta nührü amüthreba amüi khyünyüre. I khyang tah mübünung tenü I müyurü müdhesohnyüre.

⁷“Ta arühnü Adam lih chihyeng, azengtacho thsangnyangcho.

⁸Gilead yangdi tsü nyitsarü amütsa ko amapsehrü dunü jeng lile.

⁹Bebürü tsü thseh pümba fükhohrü du kyole, Shekem la Amüsa müdüm yang züduba lang la mii arühnü mapsehre. Hütsüta arühnü amütsa nguchi ahsa nguchire.

¹⁰Israel la Ihnü adrünung nguchi nguko: I müyurünü kyothri mübonü arüh jangjang amünyi shitpahre.

¹¹“Nührü Judarüsü, nührünü nguchiba nengdang khingchinung Ihnü bekhyah pathsa kyahcheh yohpüle.