Read Sangtam Naga HOSEA 8 Bible Online

HOSEA 8 - Sangtam Naga bible

HOSEA 8

¹ABÜDONGBAnü yore “Rühti tsü mehng! Arorühti I lih la müdi kyo thsücho jürole! I müyurütinü azengtacho thsangnyangko ko Ihnü docho nyümko.

²Arühnü Ih arüh Tsingrang ko arüh tsü I müyurü ko arühnü Ih müdhele nye,

³arühnü atsa tsü thsongliko. Hi nengdangnü arorühnü arüh iichinung.

⁴“I müyurünü Yangthsarüti throcho, ta hütsü arüh tsacho throcho. Arühnü anüchirü throcho, ta I chahnü amülaba mükhyü. Arühnü arüh hon ko taripi khyo arühbürü achangnung kyothri külüpcho.

⁵Samaria yangdi la lirünü mübüba hon misüpung tsü Ihnü thrünyire. Ih arüh te zichürore. Adesü khüdoi nyahli arühnü kyothri mübüba bichinung?

⁶Israelrü trüpthrirü khüdunü kyothri tsü külüpcho, ko hütsü tsingrangba mah! Samaria la mübüba hon misüpung tsü zangzang kengnahnung.

⁷Arühnü nyübong tsü shude, tsingxinyübong xanung. Fürü ashühnü khodesü hümthse kangsohnung mükoh. Ta hütsü kang nye, yangpirünü hütsü tsupehnung.

⁸Israel tsü apa yucho khüdu kyo kangko ko athsangnyangcho alihfüh khüdu kyole.

⁹Rangmü gadu kyo, Israelrünü arüh lümcho la du tsehre. Arühnü Assyriarü yang arüku chingnung küducho, ko aparü yucho khyang arüh akhüm tüpcho.

¹⁰Ta ade Ihnü arüh nübülungnung ko khingchinung. Tunyah mülipü Assyria yangthsabanü arüh sehchide, arüh thsa rühchinung.

¹¹“Israelrünü amünyi pehnung bholu alaa külüpli, amünyi shitpahnung müdüm alaa chürolire!

¹²Ihnü müyurü nengdang adoba mükhilong thrahbülungre, ta arühnü hütsü asi roh-i du mükhyüchore.

¹³Arühnü I khyang kangmübü mübüre ko mübücho shuh tsü tsure. Ta Ih ABÜDONGBA arüh te mükünyangre, hütsünü ade Ihnü arüh münyi lümcheh arüh khingchinung; Ihnü arüh Ijip lang thali müthehnung!

¹⁴“Israelrünü yangthsarü kuhlü thsako, ta abürü Akülüprülü nbüchüko. Judarünü yangditi lungnü tbüti külüpko. Ta Ihnü michang mütheh arüh yangthsarü kuh ko yangditi trüp-pehjünung.”