Read Sangtam Naga HOSEA 9 Bible Online

HOSEA 9 - Sangtam Naga bible

HOSEA 9

¹Israelrü, kyothri mübürü kyo thsüti mungba zahng. Nührünü nührü Tsingrang tenü zako ko abi te yuje mücho. Nahtrahnaxenglarü kyo limih apümlang nührü jangjang Baal tsingrang te iko ko hütsü ngang abinü jüchoepü lüm fürü tsü mükhyahko.

²Ta tunyah mülipü fürü, olive tuji ko yongkha kingkapehnung.

³ABÜDONGBA lih la Israelrü nying mülinung, ta thali Ijip lang wünung ko Assyria la amütsuba tsuyongnung tsunung.

⁴Shirü lih la arühnü ABÜDONGBA khyang amübü müjüchehlinung mahkhang arüh kangmübü jünung mükohnung. Me tsang kyo, arüh tsuyongnungnü atümung münyijünung. Hütsünü ayang du yatinung; hütsüri dusü amübükuh lang amübü hiwünung mütsanung.

⁵Ko ABÜDONGBA dhichinung athrochehcho thsüti chii rode arühnü tu nguchinung?

⁶Achangsohrü ro arüh shupishuzasohde, Ijiprünü Memfis la dhrürangnung du nübülungnung. Arüh taripi kuthri ko arüh liba müdüm la tsü za ko zengnü chitinung.

⁷Müyurü palu aleng akhingchi ngunung shikhe tsü roko. Hütsü tikehde, Israelrünü müdhenung. Nührünü “Hiba azikehrü” “hi adohrüe, hiba athrochecho nyitsarü hi amükyangrüepü yore.” Nührünü nührü münyi dirachonü Ih dira thrünyire.

⁸Tsingrangbanü amüyurü khyang müzahsohnung Ih müthehcho. Ta Ih wücho apümlang nührünü uza kyo Ih xohsohnung müküpre. Tsingrangba apu lih la müyurüti tsü azikehrü rorüh lile.

⁹Gibea la kyo, arüh nguchicho apüm amükhyu du lile. Tsingrangbanü arüh münyiti lümchehnung ko hütsü ngang arüh khingchinung.

¹⁰ABÜDONGBAnü yore, “Ihnü Israel akhudi ngude, lipilih la shükusishü kyo ngucho. Ihnü nührü jümürü akhudi ngude, akyang nyicho ayingsih ngurüsih kyo ngucho. Ta arüh ro Peor zong chihde, arühnü Baal mübünung dikehcho, ko zah arühnü müruba tsingrang thrünyicho kyo arüh thrünyipehcho.

¹¹Israel diba tsü uza kyo mongtsipehnung, ko adelü arüh khyang tsuzarü müsuropehnung, khingkurünü azarü müthroronung ko atsu müzehpehnung.

¹²Ta arühnü azarü nümüsuh nye, Ihnü arüh khyümüinung, ko süsü akang müpehjünung. Ihnü hiri nyitsarü thrüchahchüpehde, arüh chah adrünung tikehnung.”

¹³ABÜDONGBA, arüh tsuzarü iijowü kyüsehcho Ihnü ngure.

¹⁴Ihnü nü te hiri nyitsarü te tu nguchinung yonung? Khingkurüti pümdong sohng! Arüh tsurü nümüsunung amükohnung kangsohng!

¹⁵ABÜDONGBAnü yore, “Arüh amünyi nguchi apüm Gilgal la dikehcho. Hütsü tinü Ihnü arüh thrünyinung dikehcho. Ko arühnü amünyi nguchicho ngang, Ihnü I lih lanü arüh iipehnung. Adelü Ihnü arüh mümüinung; tunüo arüh anüchirü atümungnü Ih nyüm yako.

¹⁶Israelrü tsü ara kungpehba ko asih müsihba Singdong khüdu kyo kangko. Arüh tsuzarü mülinung, ta linye, arühnü khütang müiba tsuzarüti tsü Ihnü mapsehnung.”

¹⁷Ihnü dikehba Tsingrangnü arüh thsonglinung, tunüo arühnü Abi yocho münyi. Arüh limih la atsichi rümchirü kangnung.