Read Sangtam Naga JOEL 1 Bible Online

JOEL 1 - Sangtam Naga bible

JOEL 1

¹Pethuel tsurü Joel te ABÜDONGBA yusi tsü hi.

²Hi nyieng, nührü azirüti; nyieng, Juda la lirü atümung. Hi kyo nührü chichah mahkhang nührü tpurü chichah mütikehdhengo?

³Nührü tsuzarü te hi nengdang young; arühnü arüh tsuzarü te yonung, ko arühnü aronung shang te yomüchinung.

⁴Khengqu atii atii tsahma chah tsü pümcho; Tiionü nyingcho tsü, apa tiionü tsukhangcho.

⁵Jesung ko traang, nührü amücharüti; züdeing, nührü yongkha yongrüti; yongkha asi külüpba shükusih tsü thsangnyangpehko.

⁶Khengqu atiinü Ihsa lih betiko; arüh khütang re azeh ko mükhilong; arüh ha tsü kangdi ha kyo akoh.

⁷Arühnü Ihsa shükusiluh thsangnyangjüko ko ngurüsih dong münachehpehko. Arühnü ajengzati thru kangnü aküp müzahcheh tsuko.

⁸Lazarü khüdunü abükyü xengnung liba adhrerü khüdu sücho metracho kyo. nührünü traang.

⁹Amübükuh la amübü jünung fürü mahkhang shükusih müle; bebürütinü meshüre tunüo ABÜDONGBA khyang mübünung tu müle.

¹⁰Luh tsü adenge; Fürü thsangnyangchonü, Shükusih kungchehpehchonü ko olive singdongti mükupehchonü alihnü longrire.

¹¹Wahng, nührü luthsarüti; traang, nührü shükusiluh thsarüti, tunüo litoh, lüdi ko tsahma apüm thsangnyangko.

¹²Shükusih luh ko ngurüsih dong mükupehko; Singsilungsi apüm mükuseh süko. Nyitsarünü akünyang changpehko.

¹³Müyahshü lüpkehpü traang, nührü bebürüti bholu chah dikehrü! Amübükuh la züdu müyüp meshüng! Nührü Tsingrang khyang amübü jünung fürü mahkhang shükusih müle.

¹⁴Kongnung yuzeng jüng; Ashimükhong dsichoung! Azibarüti ko Judarüti atümung nührü Tsingrang ABÜDONGBA Amübükuh la shibülungsohng ko Abi te züdesohng.

¹⁵ABÜDONGBA nyümong tsü amünyethsa lile; Akohbongnü athsangnyang hiroba nyümong. Hütsüba nyümong tsü khüta adrünung thsanung!

¹⁶Ihsa tsahma thsangnyangde Ihsa alongdi müli dhengre. Ihsa Tsingrang Amübükuh la akünyang müle.

¹⁷Majühti tsü alih kungchonü süre. Akhyübülungnung fürü müle; Hütsünü shih adeng sütpah lile.

¹⁸Lamungchah mülichonü misünü longri khongre; santisü chongchare.

¹⁹Ihnü Nü te züdere, ABÜDONGBA, tunüo michangnü mürohcho kyo rangnu ko singdongti kungpehko.

²⁰Rangmü kanglungrünü mii Nü te züdere, tunüo kihnati kungchehpehko,