Read Sangtam Naga JOEL 3 Bible Online

JOEL 3 - Sangtam Naga bible

JOEL 3

¹ABÜDONGBAnü yore, “Hütsütade Ihnü Juda ko Jerusalem khyang pungrohirojünung.

²Ihnü yucho apüm nübülungnung ko Yukha Ngah yang noronung. Hütsüla arühnü I nyitsarü te nguchicho apüm nengdang Ihnü arüh yukhanung. Arühnü limih pa jeng Israelrü shupishuzasohcho, ko I lih, Israel changnahcho.

³Akümtsirü sü khyünung pü arühnü zii thsadhengcho. Mabomashi ko yongkha la pehnung nengdang arühnü adhrerüzarü ko khingkurüzarü ayurü kang icho.

⁴“Tyre, Sidon ko Filistia mükyah la lirü, nührünü I te tu nguchinyüro? Nührünü I khyang lango nengdang thali jünyürü mah-o? Nührünü jüekhang, Ihnü zah nührü khyang jülinung.

⁵Nührünü I yo taripi ko hon ko I thsidi kuthsi khyo nührü amübükuh la hiyohko.

⁶Nührünü Judarü ko Jerusalemrü arüh lih lanü ashu nowü Greekrü te iko.

⁷Ade nührünü iba müdümti lanü Ihnü arüh nüchehnung. Nührünü arüh te nguchicho kyo Ihnü nührü te nguchinung.

⁸Nührü tsurü ko tsularüti Judarü khyang isohnung; arühnü ashu la liba Sebearü khyang arüh imüchisohnung. Ih ABÜDONGBAnü choko.

⁹“Hi yuchoti te sobhoung: ‘Khatanung rungnüm; athrungrüti dsibülung; nührü rothsarüti atümung dsibülung ko shemüsung!

¹⁰Luhxüba idhse mühi tsünü nohsheng ko za xaba nohchang tsünü thsuh keng. Suhmüzehrünü mii Ih athrungrüepü yosohng.

¹¹Nührü mükangmüshü liba yuchoti, dhsüthsa rung ko angah la tsü shibülung.’ ” O ABÜDONGBA, arüh mahnung Nü rothsarü jürosohng.

¹²“Yuchotinü rungnümpü Yukha ngah la tsü rung. Hütsüla Ih, ABÜDONGBAnü mükangmüshü yuchoti apüm yukhanung.

¹³Arüh khura mütsa; Maxade kyo arüh kingthrüm; Anyehba la kih pohcheh shükusih nyehcho kyo arüh nyehkung nyehng.”

¹⁴Sühdinü sühdi Adhrongcheh Ngah la lile! Tunüo dhrongcheh ngah la ABÜDONGBArü nyümong tsü amünyeh lile.

¹⁵Nyü ko chonu marürah kangnung, ko chenghitinü adelü müvinung.

¹⁶ABÜDONGBAnü Zion zong lanü rengre; Jerusalem lanü Abinü mütiire; Ning ko alih dhridhrire. Ta Abinü amüyurü khümnung.

¹⁷“Hütsüde, Israel, Ih ABÜDONGBA nührü Tsingrangepü nührünü müdhenung. I yo Amüsa khang, Zion la lire. Jerusalem tsü Amüsa yangdi linung; yangpirünü hütsü khodesü mükochehnung.

¹⁸“Hütsütade azong tsü shüsinü shütinung, ko akhang müipi chah nyikih pohnung; Juda la yongkhi apüm la kih bholo pohnung. ABÜDONGBA Amübükuh lanü Yongkhi khüdu pohnung, ko hütsü Akacia Ngah züjengnung.

¹⁹“Ijip tsü lipilih kangnung, ko Edom apehcho yang kangnung, tunüo arühnü Juda lih mahcho ko achomükeh nyitsarü kyüsehcho.

²⁰Ihnü akyüsehrü rühyangnung; Ihnü athsamehrü tsü müpehjünung.

²¹Ta Juda ko Jerusalem la müchangka linung, ko, Ih, ABÜDONGBA, Zion Zong la linung.”