Read Sangtam Naga AMOS 1 Bible Online

AMOS 1 - Sangtam Naga bible

AMOS 1

¹Tekoa yang lanü san-nyahrü Amos, yu tsü hiri lile. Alihyo zingnung kang anyüh li, Juda la Uzzia ko Israel la Jehoash tsurü Jaroboamnü yangthsa thsade, Tsingrangbanü Israel nengdang hiri apüm Amos te mishacho.

²Amosnü yocho, “ABÜDONGBAnü Zion zong lanü rengre; abinü Jerusalem lanü mütiire. Zanulih kungpehre, ko Karmel zong la za mükure.”

³ABÜDONGBAnü yore, “Damaskasrünü thali-thali amünyi shitpahko, hütsü ngang Ihnü arüh khingchi riri. Arühnü Gileadrü khura mütsa bichiko.

⁴Hütsü ngang Ihnü michang mütheh yangthsarü Hazaelnü thsaba Yangthsaba ko Yangthsaba Benhadad roshengvi tahpehjünung.

⁵Ihnü Damaskas yangdi tbükhüm mapnahjünung ko Aven Ngah la lirü ko Betheden Yangthsaba khyümüipehjünung. Syriarü arangyohrü kang Kir lih lang nowünung.”

⁶ABÜDONGBAnü yore, “Gazarünü thali-thali amünyi shitpahko, hütsü ngang Ihnü arüh khingchi riri. Arühnü yucho shünü nowü Edomrü te ayurü kang iko.

⁷Hütsü ngang Ihnü michang mütheh Gaza tbü ko roshengvi tahpehjünung.

⁸Ihnü Ashdod ko Ashkelon yangdi yangthsarüti khyümüipehjünung. Ihnü Ekron yangdi khingchinung ko anyingcho Filistiarü atümung sünung.”

⁹ABÜDONGBAnü yore, “Tyrenü thali-thali amünyi shitpahko, hütsü ngang Ihnü arüh khingchi riri. Arühnü yucho shünü Edom lih lang yangtsirü thsa nowüko ko arühnü yangtsa külüpcho müyohpo.

¹⁰Hütsü ngang Ihnü michang mütheh Tyre yangdi tbü ko roshengvi tahpehjünung.”

¹¹ABÜDONGBAnü yore, “Edomrünü thali-thali amünyi shitpahko, hütsü ngang Ihnü arüh khingchi riri. Arühnü arüh jünirü Israelrü iijowücho ko yanglilüm müngusoh. Arüh zichüroba akihcheh müle, ko arühnü hütsü khodesü münyehlire.

¹²Hütsü ngang Teman yangdi chah Ihnü michang müthehnung ko Bozra roshengvi tahpehjünung.”

¹³ABÜDONGBAnü yore, “Amonrünü thali-thali amünyi shitpahko, hütsü ngang Ihnü arüh khingchi riri. Arüh luhrü alaa janung rothsade, arühnü Gilead la longla lirüti xaphohcho.

¹⁴Hütsü ngang Raba tbü chah michang mütheh roshengvi tahpehjünung. Rothsa nyümong khong mohnung, ko rothsa tsü tsingxinyübong rihlong kyo linung.

¹⁵Arüh Yangthsaba ko adirüti yangtsi lang nowünung.”