Read Sangtam Naga AMOS 2 Bible Online

AMOS 2 - Sangtam Naga bible

AMOS 2

¹ABÜDONGBAnü yore, “Moabrünü thali-thali amünyi shitpahko, hütsü ngang Ihnü arüh khingchi riri. Arühnü Edom Yangthsaba rüh mükhimüngu mitru kang trüp-pehcho.

²Ihnü Moab lih la michang mütheh Kerioth roshengvi tahpehjünung. Rothsarütinü moh tbhang müpcho yuva la Moabrü sünung.

³Ihnü Moab yangthsarü ko arüh langnürüti atümung kyüsehnung.”

⁴ABÜDONGBAnü yore, “Judarünü thali-thali amünyi shitpahko, hütsü ngang Ihnü arüh khingchi riri. Arühnü I adoba müthsamünyüko ko I yuzeng müyohbü. Arüh jümürünü dikehba arahkheh tsingrang tsünü arüh nümülako.

⁵Hütsü ngang Juda michah michang mütheh Jerusalem roshengvi tahpehjünung.”

⁶ABÜDONGBAnü yore, “Israelrünü thali-thali amünyi shitpahko, hütsü ngang Ihnü arüh khingchi riri. Arühnü thsite müsahchehrü yuje chorü, ko ailümrü, jingthri khüdu amii ngang mii müsahchehrü ayurü thsa ire.

⁷Arühnü suhmüzehrü dhrümchicho ko ailüm chongcharü mükhimüchocho. Au ko atsurü anyüdingnü ayularü khüdu te mükhongre. Hütsüta I Amüsa neng münyijüre.

⁸Mübüji müdüm müipi la arühnü ailümrü te thsite ngang khyücho shü la yüpre. Arüh Tsingrang amübükuh la arühnü thsite ngang khyücho yongkha yongre.

⁹“Ta, nührü I nyitsarü khyanglangnü Cedar sing kyo athseng ko langsing kyo azi Amor-rü Ihnü riri changsohcho.

¹⁰Ihnü Ijip lanü nührü nücheh lipilih la kang yüre khyo noro Amor-rü lih nührü khyang jücho.

¹¹Ihnü nührü tsurü yola khürü azikehrü ko khürü Nazirit thsanung throchehcho. Hi arahkheh mah-o, Israelrü? Ih ABÜDONGBAnü choko.

¹²Ta nührünü Nazirit khyang yongkha tiko ko azikehrüti te I yusi mühinung yuzeng jüko.

¹³Ade Ihnü nührü alih la dhrümtsunung, ko khe hiba misünü khongcho kyo nührünü khongnung.

¹⁴Atsayarü mii mütsichehnung; athrungrü re müzehpehnung, ko rothsarütinü arühbürü akang mii mükhümchochehnung.

¹⁵Singthsalu birünü müyachehnung, atsayarünü mütsichehnung, ko kuri chah pümrünü arühbürü akang mii mütsichehnung.

¹⁶Hütsü nyümong rezeh athrungrünü mii arüh thsunohrü pehpü tsinung.” ABÜDONGBA nü choko.