Read Sangtam Naga AMOS 3 Bible Online

AMOS 3 - Sangtam Naga bible

AMOS 3

¹Israelrü, Ijip lanü yucho shünü nüchehrütinü ABÜDONGBAnü nührü nengdang choba hi nyieng:

²“Limih yucho apüm yola Ihnü müdheba ko xükümba yucho tsü nüh du. Hütsünü nührü münyi tsü khütang adrünung kangre, ko hütsü ngang Ihnü nührü khingchinung.”

³Mükihtapü nyüh anyüh müjang rachinung do?

⁴Kihkhünyingnü mürong la kanglungrü müngupü rengnung do?

⁵Jingmünyüp müthsapüjükhang, uza tsü xohnung do? Tu mülahkhukhang jingmünyüp tsü kinganung do?

⁶Yangdi la rühti mehde müyurünü müdrürü do? ABÜDONGBAnü mümüthehpü yangdi la achangba ronung do?

⁷ABÜDONGBA Tsingrangnü ariwürü azikehrü te abi lümchung mümishapü tusü khodesü münguchire.

⁸Kihkhünyingnü rengde, sünü müdrüpü yachehnung? ABÜDONGBA Tsingrangnü chode, sünü müsobhopü lichehnung?

⁹Ijip ko Ashdod Yangthsaba kuhla lirü te young: “Samaria mükang liba akhang la tsü shibülung ko hütsüla mükehmükhuta kyüsetaba tsü dheng.”

¹⁰ABÜDONGBAnü yore, “Hiri nyitsarünü kengchocho ko shühkhatoh hirocho kohronü arüh kuh jengre. Arühnü khüta yuje chonung mümüdhe.

¹¹Hütsüeko arorühnü betinung, arüh tbü thsangnyangnung, ko arüh kuh tphüjünung.”

¹²ABÜDONGBAnü yore, “Kangdinü san mükahseh tsukhangpü ajing anyüh mahkhang anangku khüdu du throrocho roh-i; ade pümji atsau la kyahshang pümba Samariarü aikyah du nyingnung.

¹³Ade nyieng, Jakob hung te amüzahnung Amichahba Akohba ABÜDONGBAnü yore,”

¹⁴“Ihnü Israelrü arüh münyi ngang khingchi nyümong Bethel la bholuti thsangnyangjünung. Shujüh Bholu dong lohnahjünung ko alih la khülusohnung.

¹⁵Ihnü tsingkang kuh ko müyü kuh tphünahjünung. Thsüro-hanü külüpba kuh tsü dhrümnahnung; kuh adidi apüm thsangnyangjünung.”