Read Sangtam Naga JONA 1 Bible Online

JONA 1 - Sangtam Naga bible

JONA 1

¹Nyümong khüdu ABÜDONGBAnü Amittai tsurü Jona te yocho.

²Abinü yocho, “Nineve Yangdi lang wüng, ko hütsü nyüm choung; tunüo arüh mütsacho Ih chii küroko.”

³Ta, Jonanü Spain la Tarshish lang ABÜDONGBA tenü rangkhu tsinung shemüsucho. Abinü Joppa lang jowücho, hütsülanü Tarshish lang wünung kihkuh khüdu ngu; abinü pümngang jücho ko ABÜDONGBA tenü rangkhu linung shulüm abinü anüchirü yola Tarshish lang wünung züdu pümcho.

⁴Ta ABÜDONGBAnü tsingxinyübong arangcheh kihdi michah müthehcho, ko hütsü dirachonü kihkuh tsü dhsürü la licho.

⁵Kihkuh nürüh tsü drümüyangcho, ko palu tsingrang te arüku nengdang züdecho. Hütsüpü kihkuh tsü yingyasohnung, arühnü kihkuh lanü khe dhichehchüpehcho. Hütsütade Jonalü kihkuh jongnah lang züdu yüpsülah yüpjocho.

⁶Anüchibanü abi hütsüla ngu abi te yocho, “Nüh tuepü yüpseh yüpjoro? Shemüsu nü tsingrang te dangkhidangnang. Abinü Ihsa müinü müchangsohnung kohle.”

⁷Ko kihkuh nührü yola chotanü yocho, “Sü mülangnü Ihsa dhsürü hi mütohrünang zii thsadhengnung.” Achotsü arühnü zii thsadhengcho, ko hütsü Jona chah thsakehcho.

⁸Achotsü arühnü abi te yocho: “Khang ade ihrü te young! Hi nü mülang mah-o? Nüh tu nguchiro? Nüh tu lih lanü rocho? Nüh tu nyitsarüo?”

⁹Jonanü lalingcho, “Ih Ibrirü khüdue, Ihnü alih ko kihdi külüpbong ninglangrü Tsingrang, ABÜDONGBA mübüre.”

¹⁰Jonanü abi ABÜDONGBA tenü rangkhu tsirepü yocho. Hütsüde arüh drümüyang abi te yocho, “Nühnü hi tu nguchicho!”

¹¹Tsingxinyübong tsü khüsha amütsau kangchonü arühnü abi te yocho, “Tsingxinyübong zahsohnung nengdang nü chah ihrünü tu nguchinung?”

¹²Jonanü lalingcho, “Ih kih la dhiyohchüng, ko tsingxinyübong tsü nyehlinung. I mülang ngang nührü chah hiba tsingxinyübong hi tikehrepü Ihnü müdhele.”

¹³Tanye arühnü Kihkuh tsü kihbekhüm lang nüchehnung dee müküpcho, ta mükohcho. Ta tsingxinyübong tsü arüh yang alaa aziu fücho.

¹⁴Achotsü arühnü ABÜDONGBA te züdecho, “O ABÜDONGBA, ihrünü Nü te kihchire, hiba nyitsarü thsacholanü ihrü tüchangsoh! O ABÜDONGBA, hi apüm Nü nguchie.”

¹⁵Achotsü arühnü Jona rang kih la tsü dhiyohchücho, ko hütsüdenü kiloh tsü nyehlicho.

¹⁶Hi khu arühnü ABÜDONGBA dee drücho, ko arühnü kangmübü mübücho ko Abi dikehnung yuchümcho.

¹⁷ABÜDONGBAnü yuzeng jo ngu arangcheh khüdunü Jona münyücho, ko ngu mi la abi nyümong asang ko ronang asang licho.