Read Sangtam Naga JONA 4 Bible Online

JONA 4 - Sangtam Naga bible

JONA 4

¹Hi shulüm Jonanü khütang mükünyangcho ko zichürocho.

²Achotsü abinü yocho, “ABÜDONGBA, Nühnü hita nguchiririepü müshemüsuedenü Ihnü müyocho do? Hütsü khyanglangnü I nengdang Tarshish lang rangkhu tsinung tsü atsauba thsacho. Nü amüi ko yanglilüm Tsingrang, lede arangcho, lede atsa, ko lede lasih thsamüla, akhingchi müjüba Tsingrangepü Ihnü müdhele.

³ABÜDONGBA ade Ih süsohng. Ih akang linung tenü sücho atsaue.”

⁴ABÜDONGBAnü yocho, “Nüh wahnung tu licho?”

⁵Hütsüde Jonanü yangdi lanü nyüchüro lahpi chüdunü pümcho. Abinü mütpahvi khüdu kyühkeh, ko Nineve chah tu tikehnang pü hütsü khümki lanü dheng pümcho.

⁶Hütsüde ABÜDONGBA Tsingrangnü Jona khümki alaa tbachisohnung abi khu shinga-shü khüdu zisohcho. Hiba ashü nengdang Jona dee künyang licho.

⁷Ta nyangnyü khüu Tsingrangbanü mülajo kangzah khüdunü hiba singdong chah lehcho, ko hütsü sopehcho.

⁸Nyü chüroko khanglang, Tsingrangbanü nyü chüro lahpinü nyübong adhsa müthehcho, ko nyü tahba tsünü abi thah chah hekehde abi sümüphohcho. Hütsünü abinü sünyo lümcho. Abinü yocho, “Ih akang licho tenü sücho atsau.”

⁹Ta Tsingrangbanü abi te yocho, “Hiba singdong nengdang nüh wahnung tu licho?” Jonanü lalingcho, “Ih süto wahnung athsalang”

¹⁰ABÜDONGBAnü abi te yocho, “Hiba singdong romang khüdu lanü zicho ko nyümong khüu sopehcho: hütsü nengdang nühnü tu münguchi, nühnü hütsü müzisoh, ta müi lümre.

¹¹Khang, Nineve yangdi hütsütoh-i arangcheh, achomükeh müyurü lakh khüdupü hajar mükyü mihlang ko kanglungrü khütang liba tsü mümüinung do.”