Read Sangtam Naga KHIDHENGCHO 10 Bible Online

KHIDHENGCHO 10 - Sangtam Naga bible

KHIDHENGCHO 10

¹ABÜDONGBAnü yocho,

²“Amüdongchah tphünung nyitsarü dsitade bichinung taripinü du hamcheh külüpcho rühti anyüh külüpm.

³Khode rühti anyüdingnü anyahli mehnang, I Shükuh trahtri lanü mükang yucho shünü shibülungsohng.

⁴Ta khode rühti khüdu dunü mehnang, ahung müipi lanü langnürü dunü mükang shibülungsohng.

⁵Khode akhikyah du mehnang, nyüchürolang müdong liba yuchoti shemüsunung.

⁶Khode akhikyah mehba tsü anyüpiu mehnang, kihjing lahpi lirüti shemüsunung. Hütsüeko akhikyah mehba tsü müdongji tphünung shulüm linung,

⁷ta yucho müyurüti dsibülungnunglü asheng mehnung.

⁸Ko rühti tsü bebürüti, Aron tsurütinü mehnung. “Yuzeng hiri aronung shang apüm nengdang linung.

⁹Khode nührübürü lih la nührü rorüh te khatanang, khata amüdhethsa hiri rühtinü mehng. Ih, ABÜDONGBA, nührü Tsingrangnü nührü rorüh chahnü nührü tronung ko khümchonung.

¹⁰Akünyang shikhe lasü Choo Asi Thsüti la ko apa yangthsa mübü thsüti la nührünü trüp mübü ko akehta mübü jüde rühti tsü mehng. Hütsüde Ihnü nührü tronung. Ih nührü Tsingrang ABÜDONGBA.”

¹¹Israelrünü Ijip pehjüpü kang anyüh ko choo anyüh ko amükyüu nyümong, ABÜDONGBA Shükuh michahnü nyükhi tsü shüshocho,

¹²ko Israelrünü Sinai Lipilih lanü arühnü shitsehnung mütozah shemüsucho. Nyükhi tsü Paran akungaselih la ro müdongcho.

¹³Arühnü Mosa khu ABÜDONGBA yuzeng roh-i shemüsucho,

¹⁴ko arüh shemüsu müipi, arühnü achungcho roh-i du tsehcho. Sürü Juda hung Nisan pohki licho, arüh Aminadab tsurü Nashon te amülung-mülungnü akhu shemüsucho.

¹⁵Isakar hung tsü Zuar tsurü Nethanelnü nücho,

¹⁶ko Zebulun hung tsü Helon tsurü Eliabnü nücho.

¹⁷Hütsüpü Shükuh tsü lohnü hütsü dhirü Gershon ko Merarirü hung shemüsucho.

¹⁸Hütsü khangte sürü Reuben hung nisan pohki licho, arüh Shedeur tsurü Elizur te amülung-mülungnü shemüsucho.

¹⁹Simeon hung tsü Zurishadai tsurü Shelumelnü nücho,

²⁰ko Gad hung tsü Deuel tsurü Eliasafnü nücho.

²¹Hütsü khangte, Amüsa kohroti tsü hipü Kohat hung Levirü shemüsucho. Amülung tsü wü akhüuba müdongchah chihdelü, Shükuh tsü müdongpü licho.

²²Hütsü khangte, sürü Efraim hung nisan pohki licho, arüh Amihud tsurü Elishama te amülung-mülung shemüsucho.

²³Manase hung tsü Pedazur tsurü Gamalelnü nücho,

²⁴ko Benjamin hung tsü Gideoni tsurü Abidan-nü nücho.

²⁵Achangkathsa, apüm yola aka thsarü, sürü Dan hung nisan pohki licho, arüh Amishadai tsurü Ahiezernü nüpü amülung-mülung shemüsucho.

²⁶Asher hung tsü Okran tsurü Pagelnü nücho,

²⁷ko Naftali hung tsü Enan tsurü Ahiranü nücho.

²⁸Hütsüta khodederü Israelrünü arüh müdongchah lohmüi shemüsunang, amülung-mülung hiroh-i tsehcho.

²⁹Hütsüpü Mosanü Midianrü Jethro tsurü ajangnang Hobab te yocho, “ABÜDONGBAnü Ihsa khyang jünungeba lih lang tsü Ihsa shemüsunung thsako. Abinü Israelrü bholo müwajünung nyengchoko, hütsüeko rung ko ihrü amüwa tsü nü tesü changtanung.”

³⁰Hobabnü lalingcho, “Imoh, Ih ihrü lih lang thalire.”

³¹Mosanü yocho, “Yanglilüm ihrü pehjo tütsi. Akunglih la ihrü khüde müdongnung hütsü nühnü müdhele ko nüh tsü ihrü atrorü thsanung tsale.

³²Nühnü ihrü yola rokhang, ABÜDONGBAnü ihrü khyang jüba amüwa apüm lanü nü te changtanung.”

³³Müyurünü Amüsa Sinai zong pehjüpü, nyümong asang tsehcho. ABÜDONGBA Yuzeng Singdi tsü arüh müdongnung yangchi lede arüh bekhu wücho.

³⁴Arüh müdongchah müipi lanü arühnü shemüsu wüde, anyümong arüh michah ABÜDONGBA nyükhinü nücho.

³⁵Khodederü Yuzeng Singdi tsü shemüsunang Mosanü yocho, “Shemüsung, ABÜDONGBA; Nü thrünyirü Nü rorüti tsü dro shupishuza tsisohng!”

³⁶Ko khodederü hütsü nyehlinang, abinü yocho, “ABÜDONGBA, Israelrü kukhi hajar adrong yanglang thali rung.”