Read Sangtam Naga KHIDHENGCHO 11 Bible Online

KHIDHENGCHO 11 - Sangtam Naga bible

KHIDHENGCHO 11

¹Müyurünü arüh chongcha nengdang ABÜDONGBA te jümjüm-müsucho. Khode ABÜDONGBAnü hütsü yuchicho, Abinü rihlong chüro arüh michah michang müthehcho. Hütsünü arüh yola trüpcho ko arüh müdongchah nangolang thsangnyangcho.

²Müyurünü Mosa te troung pü züdecho; abinü ABÜDONGBA te dangkhidangnangcho ko michang tsü mehcho.

³Hütsünü hiba müdüm te Tabera dsicho, tunüo hütsüla arüh yola ABÜDONGBA michangnü trüpcho.

⁴Israelrü yola shuparüsü khürü shitseh la tsü zehcho. Arühnü shuh khütang mükhyahcho ko Israelrü arühbürünüsü jümjüm yocho: “Shuh aza dusü ngure langlü!

⁵Ijip lalü amükangnü ngu ihrü tsunyücho ngucho. Nushah, Shongshevi, alolasing, biaz ko laseng hiri lümchehre.

⁶Ta adelü ihrü re müzeh. Atsunung tusü müle, nyümong mükhu manna hidu!”

⁷(Manna tsü singtse aikyükyah kyo, adhengnung wala amüyeng)

⁸Hütsü aromang yingkih yola arüh müdongcho te longcho.

⁹Nyangnyü khüu müyurütinü hütsüri throbülung hüm kang dongpü ngüpnü hümthse külüpcho. Hütsü olive tuji la ruhcho hümthse kyo kyücho.

¹⁰Müyurünü Shükuh trahtriti la amülung-mülung yapü jümjümba apüm tsü Mosanü yuchicho.

¹¹ABÜDONGBAnü arüh te zichürocho müdhe abi mükünyangcho. Ko abinü ABÜDONGBA te yocho, “Tuepü Ih hidoi mütsa bichiro? Tuepü I te mükünyangro? Tuepü nyitsarü hidoi nengdang I khyang bhamüling hi jücho?

¹²Ihnü arüh mükülüp mahkhang münümüsu. Tuepü arükurü khüdu kyo I khehla akhungarü kyo wüpnü nühnü arüh jümürü te nyengchoba lih lang nowünung I te yoro?

¹³Ihnü khüdenü nyitsarü hidoi nengdang shuh ngunung? Arühnü mütozah tra shuh chingre.

¹⁴Nyitsarü hidoi I mülengnülü müxükümcheh; I nengdang dirale!

¹⁵Nühnü Ih hita bichiekhang, müipü Ih kyüsehpehng,” tunüo Nühnü khingchicho Ihnü mürangchore.

¹⁶ABÜDONGBAnü Mosa te yocho, “Müyurünü langnürüepü khyüchochehba azirü nyühre nübülung, arüh tsü I Shükuh la I yanglang norung ko hütsüla nü müshüm yasohng.

¹⁷Ih jüronung ko hütsüla Ihnü nü te chotanung ko Ihnü nü khyang jücho lanü anbüh khürü khyo arüh khyang jünung. Hütsükhang, nyitsarü hidoi bhamüling tsü nü mülengnü mühinung, ta arühnü tronung.

¹⁸Hütsüeko ade müyurü te young, ‘Atu nengdang nührü jangjang müsachehng; nührünü atsunung shuh ngunung. Nührünü shuh lilanglü, ko Ijip la lide atsauepü tranü chocho ABÜDONGBAnü yuchiko. Ade ABÜDONGBAnü nührü khyang shuh jünung ko nührünü hütsü tsunung.

¹⁹Ko hütsü nührünü nyümong khüdu anyüh, mahkhang münga mahkhang dhüre mahkhang mükyü nyümong du tsunungba mah,

²⁰ta nührü nabong lanü tavi tsucheh mümüthohde choo yungtsa tsunung. Hi tikehnung, tunüo nührü yola liba ABÜDONGBA te jümjüm Ijip müpehjüba thsako pü Abi nyümko!’ ”

²¹Mosanü ABÜDONGBA te yocho, “Ihnü hila nyüh hajar thsih dhüroh nole ko Nühnü arüh khyang choo khüdu shuh kükyo jünungepü yorü ang?

²²Arüh longxo misü ko san müpsehchehnung do? Kihdi la zehba ngu apümnü mii arüh kükyünung do?”

²³ABÜDONGBAnü lalingcho, “I zii akihzah lirü do?” “Ihnü yoba hi tikeh a mütikehnang nührünü zah ngunung!”

²⁴Achotsü Mosanü wü müyurüti te ABÜDONGBAnü yocho roh-i arüh te yocho. Abinü langnürü nyühre nübülung Shükuh mükang yasohcho.

²⁵Hütsüde ABÜDONGBA nyükhi la jürocho ko abi te chotacho. Abinü Mosa khyang jüba anbü lanü khürü khyo langnürü nyühre khyang tsü jücho. Khode arüh michah anbü tsü rocho, arühnü azikehrü kyo akhikyah chah choyohcho.

²⁶Langnürü nyühre yola nyüh anyüh Eldad ko Medad nyühnü Shükuh lang tsü müwüpü amüdongchah du pümcho. Hütsüla arüh michah anbü tsü rocho ko arühnüsü azikehrü kyo choyohmüsucho.

²⁷Dhrezarü khüdunü wü Mosa te Eldad e Medad nyüh nguchiba tsü yocho.

²⁸Hütsüde azadenü Mosa dro roba Nun tsurü Joshuanü Mosa te yocho, “Adirü, arüh tsü yatieng.”

²⁹Mosanü lalingcho, “I nguchi nengdang nühnü tülümxü. Ihnülü ABÜDONGBAnü Abi müyurü atümung khyang Abi anbü jo arüh atümungnü azikehrü kyo choyohsohnyüre.”

³⁰Hütsütpü Mosa ko langnürüti arüh nyühre tsü müdong lang thalicho.

³¹Dhrongyengnü ABÜDONGBAnü nyübong müthehnü Kihdi lanü mümüyüh alih tenü khehap anyüh mii müthsa mongchi rosohcho. Uzati tsü arüh müdongchah jeng apümlang lutri adrong mongyohsohcho.

³²Hütsüta mükhyang müyüp ko nyümong khüu mükhyang müyurünü mümüyüh tsü rangbülungcho; nyitsarü mükhu süreh hajar milang du rangcho. Arühnü arüh liba mükangmüla hütsüri kungcho.

³³Arüh shuh atsunung kükyo liyade, müyurü te ABÜDONGBA zichürocho ko arüh yola rümra chürosohcho.

³⁴Hütsüba müdüm te, “Shuhxangrü Kong”, pü dsicho, tunüo hütsüla arühnü shuxangrü dhrürangcho.

³⁵Hütsü lanü arühnü shehmüi wünü Hazeroth la müdongcho.