Read Sangtam Naga KHIDHENGCHO 14 Bible Online

KHIDHENGCHO 14 - Sangtam Naga bible

KHIDHENGCHO 14

¹Müyurünü müyüp longri tracho.

²Arühnü Mosa e Aron nyüm yocho, “Ijip la sücho atsau thsako mahkhang akungaselih hila nye.

³Tuepü ABÜDONGBAnü Ihsa hütsüba lih lang nowüro? Khata la tsü Ihsa sünung ko Ihsa tsuzarü nitpürü rang notsinung. Ijip lang thalicho atsauba müthsanung do?”

⁴Achotsü arüh khüdunü khüdu te yocho, “Ihsanü langnürü khüdu throchehnung ko Ijip lang thalinung!”

⁵Hütsüde Mosa e Aron nyühnü müyurü atümung bete alih la mükhukehcho.

⁶Ko Nun tsurü Joshua ko Jefune tsurü Kaleb, achehdhengrü yola nyüh anyüh tsünü longrichonü anyüh jengki rehnah

⁷müyurü te yocho, “Ihrünü jüchoba alih tsü akhacheh lile.

⁸ABÜDONGBAnü Ihsa te künyangkhang, abinü Ihsa hütsüla nowünung ko Ihsa khyang hütsüba azeh-azang lih tsü jünung.

⁹ABÜDONGBA tünyüm ko hütsüla lirü tüdrü.” Ihsanü arüh mülati kohnung. Ihsa te ABÜDONGBA zehle ko arüh tsingrangti abinü kohko, hütsüeko tüdrü.

¹⁰Amülung shünü anyüh tsü lungnü müpsehpehnung dhrongcho, ta dhrongyengnü Shükuh michah ABÜDONGBA ahechi rocho Müyurünü ngucho.

¹¹ABÜDONGBAnü Mosa te yocho, “Nyitsarü hirinü khüdoi nyahli Ih mükhyüchonung? Ihnü arüh yola thsayahiya nguchi hidoi nguchinye, hirinü khüdoi nyahli I chah long mülangnung?

¹²Ihnü rümra mütheh arüh changsohnung, ta Ihnü nühlü arüh tenü adiu ko re azeh-u yucho au kangsohnung.”

¹³Ta Mosanü ABÜDONGBA te yocho, “Hiri nyitsarü hi Nühnü Ijip lanü Nü ziinü norocho. Khode Nühnü Nü müyurü chah nguchicho Ijiprünü yuchinang,

¹⁴arühnü hiba lih la lirü te hütsü yonung. Hiri nyitsarünü, Nüh ABÜDONGBA, ihrü te lilepü yuchiko, Nüh nyükhi la ihrü michah nyehlide ko anyümong nyükhi dongdi la ihrü bete tsicho tsitsa nguko.

¹⁵Ade, Nühnü Nü müyurü atümung changsohde, Nü neng yuchi liba yuchotinü

¹⁶Nühnü Nü müyurü anyengchocho lih la münorochehcho khu akungaselih la kyüsehkhangko pü chonung.

¹⁷Hütsüeko ABÜDONGBA, Ihnü ade Nü te kihchire,

¹⁸Nühnü Ih ABÜDONGBA zii zah müchürore ko amüthreba amüi ko yuje choba ngusohre ko amünyi ko nyümcho mülang pehjürepü nyengchoba tsü nguching. Ta arüh tpurü münyi nengdang arüh tsurü shümtsurü shang asang-müyü chii mükhingchipü mülirepü nyengchoba Nü zii ko yanglilüm ihrü te ngusohng.

¹⁹Ko ade, ABÜDONGBA, Nüh mümülichiba amüi amülah shidüm arüh Ijip pehjükotinü mülang pehjo rocho kyo, hiri nyitsarü mülang pehjüng pü Ihnü kihchire.”

²⁰ABÜDONGBAnü lalingcho, “Nühnü kihchichonü Ihnü arüh mülangpehjünung.

²¹Ta I akang licho kyo ko I ahechinü alimih jeng licho kyo,

²²hiri nyitsarü süsü akang lii hütsüba lih la tsü müzüdunung. Arühnü I ahechi nguko, ko Ijip la ko akungaselih la I thsayahiya nguko, ta arühnü thali-thali Ih thsatsüko ko I yocho münyi.

²³Ihnü arüh jümürü te nyengchoba lih la tsü khodesü arüh müzüdunung. Ih mükhyüchorü süsü hütsüla tsü müzüdunung.

²⁴Ta I dikehrü Kaleb anbü pa lichonü ko I te yocho nyichonü, abinü jüchoba lih la tsü Ihnü abi noronung ko

²⁵abi trahnü ade Amalekrü ko Kananrü liyaba ngah tsü khyünung. Ade ximülang ko Amoh kihdi lang lahpi akungaselih lang tsü shemüsung.”

²⁶ABÜDONGBAnü Mosa e Aron nyüh te yocho,

²⁷“Hiri nyitsarünü khüdoi nyahli Ih nyüm jümjümnung? Hiri jümjümcho kükyo yuchiko.

²⁸Ade arüh khyang alalingba hi jüng: ‘Ih akang licho kyo nührünü chingcho kyo tsü Ihnü nguchinung yuchümre. Ih, ABÜDONGBAnü choko.

²⁹Nührü sünung ko nührü me tsü akungaselih hi jeng shupishuzapehnung. Nührünü Ih nyüm jümjümchonü, nührü kang mükyü amilangrü süsü hütsüba lih la müzüdunung.

³⁰Ihnü hütsüla nührü lisohnung nyengchocho, ta nührü yola Kaleb ko Joshua nyüh du hütsüla lisohnung.

³¹Nührü tsuzarüti rang tsinungepü nührünü choko, ta nührünü mükhyünyüba lih la tsü nührü tsuzarüti tsü noronung ko hütsü arüh lih kangnung.

³²Nühlü akungaselih hila sünung.

³³Nührü yuje müchocho ngang, nührü khüdusü münying müsükhangde, hiba akungaselih la kang yüre nührü tsuzarü chongcha rümchinung.

³⁴Nührü münyi ngang kang yüre thsanung, nyümong yüre alih jücho rachiba nyümong müipi kang khüdu-khüdu. Ihnü nührü nyümba tsü tunang nührünü müdhenung.

³⁵Nührü akhürahrüti shibülung I nyümrüti chah Ihnü hi nguchinung yuchümre. Hiba akungaselih la nührü atümung sünung. Ih, ABÜDONGBAnü choko.’ ”

³⁶Mosanü alih jüchonung müthehrüti tsünü arahkheh yusi hirocho khu Müyurünü ABÜDONGBA nyümnungthsa kangcho.

³⁷Hütsünü ABÜDONGBAnü dhsara khüdu arüh chah chihsohcho ko arüh sücho.

³⁸Füzathsarü arüh dhüre-anyüh yola Kaleb ko Joshua nyüh du nyingcho.

³⁹Khode Mosanü Israelrü te ABÜDONGBAnü yocho yu tsü yocho; arühnü dee longricho.

⁴⁰Nyangnyü khüu tsü mütoh arühnü hita cho azong la lirü tsü mahnung shemüsucho, “ABÜDONGBAnü yoba lih nengdang tsü wünung ade ihrü rungnüm lile. Ihrünü amünyi shitpahko pü ihrünü nyengchore.”

⁴¹Ta Mosanü yocho, “Khang tuepü nührünü ade ABÜDONGBA yu münyiro? Nührünü mükohnung.

⁴²Tüwü. ABÜDONGBA nührü te müzeh ko arorühnü nührü kohnung.

⁴³Khode nührünü Amalekrü ko Kananrü dhsükehnang, khata la tsü nührü sünung; nührü te ABÜDONGBA müzehnung, tunüo nührünü Abi khanglang mü-i.”

⁴⁴ABÜDONGBA Yuzeng Singdi ko Mosa müzehpü mii arühnü azong lih lang tsü tuwünung dhrongchehcho.

⁴⁵Hütsüde hütsüla lirü Amalekrü ko Kananrünü arüh mahcho ko kohcho ko Horma chii iirocho.