Read Sangtam Naga KHIDHENGCHO 15 Bible Online

KHIDHENGCHO 15 - Sangtam Naga bible

KHIDHENGCHO 15

¹ABÜDONGBAnü Mosa khyang

²abinü jünung liba lih la tsü Israelrünü bichinung yuzeng hiri jücho.

³Yuchüm tikehsohnung amüküp mübü mahkhang trüp mübü mahkhang kangmübü thsa misüpung khüdu, Sanpung khüdu, san khüdu mahkhang miza khüdu ABÜDONGBA khyang mübüng; hiri tsang mübü axümlichi tsünü ABÜDONGBA künyangsohre.

⁴Sünü trüp mübü nengdang san mahkhang miza hironang, abinü kanglungrü müipi te olive tuji liter khüdu la hüm süreh khüdu yohrütapü yongkha liter khüdu zeh tsang mübü thsa hirobae.

⁶Khode Sanpung khüdu mübonang olive tuji liter khüdu-pü achangsho la hüm süreh anyüh yohrütapü

⁷yongkha liter khüdu-pü achangsho zeh tsang mübü thsa hirung. Hiri kangmübü axümlichi tsünü ABÜDONGBA künyangsohre.

⁸Khode yuchüm tikehsoh mahkhang akehta mübü nengdang misüpung khüdu trüp mübü mahkhang kangmübü jonang,

⁹olive tuji liter anyüh la hüm süreh asang yohrütapü,

¹⁰yongkha liter anyüh zeh hirung. Hiri kangmübü axümlichi tsünü ABÜDONGBA künyangsohre.

¹¹Hütsü misüpung, sanpung, san mahkhang miza te yohrüta mübünungba lile.

¹²Khode kanglungrü khüdu chah alaa mübünang, hütsüri te zeh mübüba kohroti tsü kanglungrü aichi alaa linung.

¹³Abüdongrü Israelrü müipinü ABÜDONGBA khyang axümlichi tsang mübü jüde hita nguchibae.

¹⁴Ko khode nührü yola likhung lirü ko shitsehrü shuparü khürünü ABÜDONGBA künyangsohba axümlichi tsang mübü jünang, abinüsü yuzeng akyokyo tsü bichinung.

¹⁵Aronung shang apüm la nührü chah nye, nührü yola liba shuparü chah nye, akyokyo yuzeng tsünü rah lile. ABÜDONGBA jingte nührü ko arüh sako linung;

¹⁶nührü ko arüh chah yuzeng akyokyo du tsünü bichinung.

¹⁷ABÜDONGBAnü Mosa khyang

¹⁸anyengchocho lih la tsü Israelrünü bichinung yuzeng hiri jücho.

¹⁹Khode hütsü lanü chürocho lango tsunang, ABÜDONGBA khyang amübü pathsa khürü yohpübae.

²⁰Hümthse külüpde, tsangsinü akhu külüpba hümthse tsü ABÜDONGBA khyang yohpübae. Hi mübüde nührünü fürü akhu nyehde khüta mübüro hütsü kyo mübüng.

²¹Aronung shang apüm la, ABÜDONGBA khyang hiba pathsa jiyü hi nührünü külüpba hümthse lanü jüng.

²²Ta adüzünü ABÜDONGBAnü Mosa khyang jüba yuzeng hiri mümüdhepü khürü mübichinung kohle.

²³Ko adüzünü aronung la Mosa khyang jüba yuzeng hiri amülungnü sehseh mübichinung kohle.

²⁴Thsamehba tsü mümüdhechonü thsakhang, arühnü ABÜDONGBA künyangsohba axümlichi tsang mübü ko yongkha mübü misüpung khüdu khyo trüp mübü jübae. Hütsü chah lahkeh arühnü münyi mübü thsa mizapung khüdunü mübübae.

²⁵Bebürünü amülung nengdang tsü ayah müsachehba nguchinung ko arüh khyang mülangpehjünung, tunüo arühnü mümüdhepü thsamehcho ko ABÜDONGBA yang münyi mübü tsang mübü thsa hiroko.

²⁶Israel yucho shünü ko arüh yola liyaba shuparü atümung mülangpehjünung, tunüo thsameh la tsü atümung zehko.

²⁷Nehbi khüdunü mümüdhepü amünyi shitpahkhang, abinü kang khüdu za miza atrüh khyo münyi mübü jübae.

²⁸Bholu chah tsü bebürü tsünü ayah müsachehba nguchi nguchi nyitsarüba tsü münyi lanü müsacheh jünung ko abi mülangpehjünung.

²⁹Abüdongrü Israel thsanye, likhungrü shuparü thsanye sünü mümüdhepü thsamehnang hütsü roh-i du nguchinung.

³⁰Ta khürünü ahsa thsangnyangkhang, abüdongrü nye shuparü nye, ABÜDONGBA mükhimüngucho mülang thsanung, ko abilü süsohnung,

³¹tunüo abinü ABÜDONGBAnü yocho thsongli abi yuzeng khüdu ahsa thsangnyangko. Abi süba tsü apu bha thsanung.

³²Israelrü akungaselih la lide, khüdupi nyüh khüdunü Sabath nyümong singyucho rangchehcho.

³³Achotsü abi tsü Mosa, Aron ko Israelrü yanglang nowücho,

³⁴ko arangyoh la yohpücho, tunüo abi chah tu nguchinungnang mütsüpcho.

³⁵Hütsüde ABÜDONGBAnü Mosa te yocho, “Nyitsarüba tsü süsohbae; abi tsü dongkhu nowü amülungnü lungnü kengseh süsohng.”

³⁶Achotsü ABÜDONGBAnü mülacho kyo, amülung tsünü dongkhu no chüdu kengseh süsohcho.

³⁷ABÜDONGBAnü Israelrü te

³⁸yosohnung Mosa khyang yuzeng jücho: “Nührü shü ananglang ayo külüpm ko ayo müipi chah tsü ayo apulu müthsühkehng. Nührünü hi aronung shang apüm la bichieng.

³⁹Nührünü shüyo tsü ngu müipi I yuzeng apüm lümcheh bichinung; hütsükhang nührünü I tenü ximüla nührü lümcho ko khyünyücho münguchinung.

⁴⁰Shüyo tsünü nührü khyang I yuzeng apüm bichisohnung lümkehsohnung ko nührü tsü I müleng yo thsanung.

⁴¹Ih ABÜDONGBA nührü Tsingrang; Ih nührü Tsingrang thsanung Ihnü nührü Ijip lanü nüchehcho. Ih ABÜDONGBA.”