Read Sangtam Naga KHIDHENGCHO 19 Bible Online

KHIDHENGCHO 19 - Sangtam Naga bible

KHIDHENGCHO 19

¹ABÜDONGBAnü Mosa e Aron nyüh te

²Israelrü khyang yuzeng hiri jünung yuzeng jücho. Misü amoh khüdu lapha mükeh ko khodesü münguchidhengsohcho hiro

³bebüba Eleazar khyang jüng. Ko hütsü no chüdu dongkhu abi betenü müpsehng.

⁴Hütsüpü Eleazarnü ashüh tsü khürü khyo Shükuh lahpi tsü amüyungzanü dhünyehpi xahng.

⁵Ko kanglungrü tsü üpümshünü bebüba betenü aküp, ashutsa, ashüh ko axü zeh trüpm.

⁶Hütsüpü abinü Cedar sing, hyssop rangshü amoh khyonü michang la tsü yohnung.

⁷Hütsüpü abinü ashü thsonü afü chah kih tungkeh mütsahpehpü du müdongchah züdunung; ta abi ayahnü münyüzehde mümüsa linung.

⁸Sünü misü tsü trüpcho abisü ashü thsünung ko apu chah kih tungkehnung, ko abisü nyüzeh yingcheh mümüsa linung.

⁹Ko ayahnü müsa lirü nyüh khüdunü misü mihtru tsü khyübülungnung ko dongkhu amüsa müdüm khüdu la Israel yucho ayahnü amümüsa pehnung nengdang kih la bichinung yohpünung. Hiba hi amünyi pehnung ayah nguchi linung.

¹⁰Mihtru khyübülungba nyitsarü tsüsü ashü thsünung, ko abisü nyüzeh yingcheh mümüsa linung. Hiba hi Israelrü ko shuparü atümung nengdang ko aronung shang apüm la bichinung yuzeng linung.

¹¹Sünü me chah thahpünang ayahnü abi nyümong dhünyeh mümüsa linung.

¹²Abinü müsachehba kihnü asang nyümong ko dhünyeh nyümong apu jangjang müsachehbae, hütsüpü du abi müsa linung. Ta abinü asang ko dhünyeh nyümong tsü mümüsachehkhang, abi mümüsa linung.

¹³Sünü me chah thapüpü apu jangjang mümüsachehnang abi amümüsa linung, müsachehba kih tsünü abi mümüsacheh. Abinü ABÜDONGBA Shükuh münyijüko, ko adelü abi Tsingrangba tsurü yola mükhiyohnung.

¹⁴Nyüh khüdu Shükuh lanü sükhang, abi süde hütsüla sü licho mahkhang sü akhu züducho abi tsü nyümong dhünyeh ayahnü mümüsa linung.

¹⁵Shükuh la tsü alüptising mülipü licho füh ko shinga apüm mümüsa kangnung.

¹⁶Akyühsehcho mahkhang jungchah ayahnü sücho chah thahpükhang ko khürünü nyitsarü rüh ko kong chah thahpükhang, abi tsü nyümong dhünyeh nengdang amümüsa kangnung.

¹⁷Amümüsa tsü pehnung nengdang, misü amoh münyi nengdang trüpba mihtru tsü aza khyo füh la yohnung ko kih amüthseng yohnung.

¹⁸Akhudiba ayahnü müsa liba nyüh khüdunü hyssop müphung-o hiro kih la thsangnung ko Shükuh ko hütsüla zehba lüpcho ko nyitsarü mii zeh xahkehjünung. Anyüu la, müsa liba nyüh khüdunü nyitsarü rüh, me ko kong chah thahpüba chah tsü kih tsünü xahkehjünung.

¹⁹Asangu mahkhang dhünyeh nyümong tsü ayahnü müsa liba nyüh khüdunü mümüsa liba chah tsü kihnü xahkehjünung. Adhünyeh nyümong tsü, sü shü thsüthoh ko kihnü tungkeh tsehkhu liro, abi tsü nyü züdude ayahnü müsa kangnung.

²⁰Sü ayahnü mümüsa kangcho ko mümüsachehcho, tunüo müsachehba kih tsü abi chah mütungkehcho, abi tsü mümüsa linung. Abinü ABÜDONGBA Shükuh münyijüre ko adelü abi tsü Tsingrangba tsurü yola mükhiyohnung.

²¹Nührünü hiba yuzeng hi aronung shang apüm la bichieng. Sünü müsachehnung kih xahro, abisü ajengki thsübae; sünü kih chah thahpüro abisü nyüzeh yingcheh mümüsa linung.

²²Mümüsa lirünü tuturü chah thahpüro hütsü mümüsa linung ko sünü hütsü thahpüro abisü nyüzeh yingcheh mümüsa linung.