Read Sangtam Naga KHIDHENGCHO 21 Bible Online

KHIDHENGCHO 21 - Sangtam Naga bible

KHIDHENGCHO 21

¹Khode kihjinglang lahpi liba Kananrü Arad Yangthsabanü Israelrü tsü Atharim lang lanü rolepü yuchicho, abinü arüh mahcho ko khürü rangcho.

²Hütsüde Israelrünü ABÜDONGBA te yuchüm khüdu külüpcho: “Nühnü ihrü khyang hiri kohsohkhang, ihrünü arüh ko arüh yangditi Nü khyang khakhuchüjünung ko arüh changsohnung.”

³ABÜDONGBAnü arüh yu yuchicho ko Kananrü kohsohnung trocho. Achotsü Israelrünü arüh yangditi riri kohcheh changjücho ko hütsüba müdüm te Horma pü dsicho.

⁴Israelrünü Hor Zong pehjüpü Amoh Kihdi lang Edom lih mükang wücho. Ta langwüm la Müyurünü mürangchopü

⁵Tsingrangba ko Mosa nyüm chocho. Arühnü yocho, “Lipilih hila tsuyongnung ko kih mülicho la süsohnung tuepü ihrü Ijip lanü nüchehcho? Adelü hiba tsuyongnungnü ihrü müthohpehko!”

⁶Achotsü ABÜDONGBAnü müyurü yola müyüh kehba mürü müthehcho ko Israelrü adrong hütsünü mükyühcho ko sücho.

⁷Hütsüde Müyurünü Mosa yang ro yocho, “Ihrünü ABÜDONGBA ko nüh nyüm amünyi shitpahko. Ade ABÜDONGBA te hiri khyükhujüng pü kihchijüng.” Achotsü Mosanü arüh nengdang kihchijücho.

⁸Achotsü ABÜDONGBAnü Mosa te yocho, idhsenü Mürü khüdu külüpm ko tbütphü chah dhimüsu yohpüng; ko sü mürünü mükyühcho, abinü hütsü chah kehchü dhengkhang abi kyangnung.

⁹Achotsü Mosanü imüyengnü mürü khüdu külüpcho ko tbütphü chah dhimüsu yohpücho. Sürü mükyühcho, arühnü hütsü chah kehchü dhengcho ko kyangcho.

¹⁰Israelrünü Shehmüi Oboth la licho.

¹¹Hütsü pehjüpü khanglang, arühnü Moabrü lih nyüchürolang achangcho Abarim la licho.

¹²Hütsüpü arühnü Zered Ngah la licho.

¹³Hütsü lanü adesü arühnü Amor-rü lih chii wüba Arnon Yongkhi kihkulang lahpi licho. (Arnon tsü Moabrü ko Amor-rü kahla luhrü licho.)

¹⁴Hütsünü ABÜDONGBA khata Vakhanü hita yore. “Sufa lih la Wahed yangdiba ko angah;

¹⁵Arnon Yongkhi, Ar yangdi chii wüba angah la ko Moab luhrü lahpi.”

¹⁶Hütsü lanü müdüm khüdu Kihkong ko dsiba khüiba ABÜDONGBAnü Mosa te, “Müyurü shibülungsohng, Ihnü arüh khyang kih jünung pü yoba müdüm tsü yang wücho.”

¹⁷Hütsüde Israelrünü khi hi thsacho: “Kihkong, kih chürosohng; Ko ihrünü khi thsa khyüchonung,

¹⁸Yangthsarünü juba kihkong, Ko müyurü langnürütinü, Yangthsaba yukha Janü Jucho, Ko arüh Janü.” Arühnü akungaselih la tsünü Mattana yang shehmüicho,

¹⁹ko hütsü lanü Nahaliel, ko Nahaliel lanü Bamoth,

²⁰ko Bamoth lanü Pisga zong pohki lipilih chahchü nguba Moabrü lih chii wücho.

²¹Hütsüpü Israelrünü Amor-rü Yangthsaba Sihon yang yu hi yonung müthehcho:

²²“Nü lih khu ihrü tsisohng. Ihrü ko ihrü kanglungrünü lang müpehjünung ko nührü luh ko shükusiluh la müzüdunung ko nührü kihkong lanü kihsü müyongjünung; nührü lih mükhudelü ihrünü tungte la du tsehnung.”

²³Ta Sihon-nü abi lih khu tsinung mümülacho. Abinü rothsarüti dsibülung akungaselih la Jahaz lang würü Israelrü mahcho.

²⁴Ta Israelrünü khata la tsü arüh rorüti adrong kyüsehcho ko arüh lih Arnon Yongkhi lanü kihkulang Jabbok chii khyücho, tunüo Amonrü luhrü tsü dee khümkhüm tbütipü licho.

²⁵Hütsüta Israelrünü Heshbon yangdi ko mükangmüshü yangditi zeh Amor-rü yangditi apüm khyücho ko hütsüri la licho.

²⁶Heshbon tsü Amor-rü Yangthsaba Sihon yangdiba licho, abinü Moab Yangthsaba te khata Arnon Yongkhi chii abi lih apüm khyüjücho.

²⁷Hütsünü khi tangrünü hita thsacho, “Heshbon lang rung, Yangthsaba Sihon yangdi! Ihrünü hütsü thsachicho ngunyüre.

²⁸Khüdupi hiba Heshbon yangdi lanü Sihon rothsarüti michang kyo tsicho; Hütsünü Moab la Ar yangdi thsangnyangjücho Ko athahlang Arnon changjücho.

²⁹Nührü khüdoi adrünung, Moabrü! Nührü Khemosh mübürü changjüko! Nührü tsingrangnü müyurü atsichirümchirü kangsohko, Ko khingkurüti Amor-rü Yangthsaba khehla arangyohrü kangko.

³⁰Ta ade arüh trah changko, Heshbon lanü Dibon chii. Noshim lanü Nofa, Medeba Shündhün chiinü.”

³¹Hütsüta Israelrü tsü Amor-rü lih la licho,

³²ko Mosanü Jazer yangdi mahnung dhengyohnung nyitsarü müthehcho. Israelrünü hütsü ko mükangmüshü liba yangditi mahchehcho ko hütsüla lirü Amor-rü iipehcho.

³³Hütsüpü Israelrünü ximüla Bashan lang wücho ko Yangthsaba Ognü Edrei la Israelrü te khatanung shemüsucho.

³⁴ABÜDONGBAnü Mosa te yocho, “Abi tüdrü. Ihnü abi, abi nyitsarüti ko abi lih apüm michah akoh jünung. Nühnü Heshbon la Amor-rü Yangthsaba Sihon te nguchicho kyo abi tesü nguching.”

³⁵Achotsü Israelrünü Og, atsurüti ko abi müyurüti süsü münyingpü kyüsehcho ko arühnü abi lih tsü khyücho.