Read Sangtam Naga KHIDHENGCHO 24 Bible Online

KHIDHENGCHO 24 - Sangtam Naga bible

KHIDHENGCHO 24

¹Adelü Balaamnü ABÜDONGBAnü abi khyang Israelrü müwajüsohnyürepü müdhecho, hütsünü akhudi kyo abinü müchehnung müwücho.

²Abinü lipilih lang tsü dhengde Israelrü ahung-ahung müdong liyacho ngucho. Tsingrangba anbü abi chah rocho

³ko abinü yu hiri choyohcho: “Beor tsurü Balaam yusi. Tsitsa ngunung kohba nyitsarü yu,

⁴Tsingrangbanü yoba tsü sünü yuchinung kohro. Nah trahpü Ihnü ngure Akohba Tsingrang chahnü müngucheh khüdu.

⁵Israelrü Shükuh tsü atsah atsa,

⁶Se achungnü yacho kyo Mahkhang yongkhi shündhün tbü kyo, ABÜDONGBAnü khyümcho aloes kyo mahkhang kih shündhün Cedar sing kyo.

⁷Arüh tsing thangchi ngunung ko arüh majüh kih thangchi licho luh la khyümnung. Arüh Yangthsaba tsü Agag tenü adiu, Ko abi Yangthsathsaba ashu ko müza linung.

⁸Tsingrangbanü arüh Ijip lanü nüchehcho; Abinü arüh nengdang rangmü misüpung kyo khatacho. Arühnü arüh rorüh münyücho, Arüh rüh nyehnahjücho, arüh tbüdeng khyahnahjücho.

⁹Yucho tsü akurah kihkangdi kyole; Abi yüpjode, sünüsü mükoh khamüsuchehre. Sünü Israel müwajonang abi müwajünung. Sünü Israel chokehcholanang abi chokehcholanung.”

¹⁰Balaknü rihlong chüro Balaam te yocho. “Ihnü nüh I rorüh chokehcholasohnung dsicho, ta hinü asangpiu nühnü arüh uthring müwajüre.

¹¹Hütsüeko ade thali tsipehng! Ihnü nü khyang jiyünung nyengchocho, ta ABÜDONGBAnü yatiko.”

¹²Balaamnü lalingcho. “Nühnü I yanglang rosohrü yusi hirüti te Ihnü yojungko.

¹³Yangthsaba kuhla licho hon ko taripi apüm jünye, I lümchonü Ihnü ABÜDONGBA yuzeng münyinung mükoh. ABÜDONGBAnü tu youngrünang, Ihnü hütsü du yonung.”

¹⁴Balaamnü Balak te yocho, “Ade Ih I müyurü yanglang thalire, ta Ih mütside, aronung la Israelrünü nü müyurü te tu nguchinung nü te yojungre.”

¹⁵Hütsüpü abinü yu hi cho choyohcho: “Beor tsurü Balaam yusi, Tsitsa ngunung kohba nyitsarü yu,

¹⁶Tsingrangbanü yoba tsü sünü yuchinung kohro, Ko Amichahba chahnü roba lümlong tsü sünü khyüchonung. Nah trahpü Ihnü ngure, Akohba Tsingrangba chahnü müngucheh khüdu.

¹⁷Ihnü aronung nengdang dhengcho, Ko Ihnü Israel yucho ngucho. Yangthsarü khüdu, avisa püti kyo, hütsüba yucho lanü chüronung. Komet kyo abi Israel lanü ronung. Abinü Moab langnürüti chah xüpnung Ko Seth-rü atümung xüptsunung.

¹⁸Abinü Edom la abi rorüh kohnung Ko arüh lih abi kuthsi kangnung, Israelrünü mütozah kohnung.

¹⁹“Israel yuchonü arüh dhrümchinung, Ko anyingchoti changjünung.”

²⁰Hütsüpü abi müngucheh la, Balaamnü Amalekrü ngu choyoh yu hi chocho: “Amalek tsü apüm tenü rezeh-u yucho, Ta achangka la lede nengdang abi changnung.”

²¹Abi müngucheh la abinü Kenrü ngu hita choyohcho: “Nü liba müdüm tsü adrünung müle, lungrah athseng la asüp shücho kyo khümcho lile.

²²Ta nührü Kenrü changnung Ko Assyriarünü nührü rang tsinung.”

²³Balaamnü hi choyohcho: “Kihkulang lahpi shimükhong liba hi sürüo?

²⁴Amahrüti Cyprus lanü kih khu ronung; Arühnü Assyria ko Eber kohchehnung, Ta arühbürü lede nengdang changpehnung.”

²⁵Hütsüpü Balaam abi kuh lang thalicho ko Balaksü abi langlang tsicho.