Read Sangtam Naga KHIDHENGCHO 27 Bible Online

KHIDHENGCHO 27 - Sangtam Naga bible

KHIDHENGCHO 27

¹Mahlah, Noa, Hogla, Milka ko Tirza hiri tsü Josef tsurü Manase, abi tsurü Makir, abi tsurü Gilead, abi tsurü Hefer ko abi tsurü Zelofehad tsularüti licho.

²Arühnü wü ABÜDONGBA Shükuh trahtri la Mosa, bebüba Eleazar langnürüti ko amülung apüm bete yapü yocho,

³“Uwa chahnü adhrerü khüdusü mülipü lipilih la abi süko. Abi ABÜDONGBA nyümba Kora mülung la müzeh; abi apu münyinü sücho.

⁴Abi chahnü atsurü adhrerü mülicho nganglangnü, tuepü abi neng Israel lanü chahnung? Uwarü jünirü yola ihrü khyangsü kuthsi khülo!”

⁵Mosanü hiba khiyu tsü ABÜDONGBA yanglang hiwücho

⁶ko ABÜDONGBAnü abi te yocho,

⁷“Zelofehad tsularütinü kihchiba tsü athsalang; aurü jünirü yola arüh khyangsü kuthsi tsü jüng. Abi thsiking tsü arüh khyangsü jüng.

⁸Khode nyüh khüdu atsurü adhrerü mülipü sonang, abi thsiking tsü abi tsularünü khyünungepü Israelrü te young.

⁹Abi atsularü mii mülikhang, amung aninü thsiking tsü khyünung.

¹⁰Abi amung ani mii mülikhang, abi aurü jünirünü thsiking tsü khyünung.

¹¹Abi jünirü mahkhang au azabarü mülikhang, abi te amünyeh-u jünirünü thsiking tsü khyünung ko abi yo kangnung. Ko Ih, ABÜDONGBAnü yuzeng jücho kyo Israelrünü hiba hi yuzeng kang bichinung.”

¹²ABÜDONGBAnü Mosa te yocho, “Abarim Zong lang tsü küdung ko Ihnü Israelrü khyang jüba lih tsü dheng.

¹³Ko nü mung Aron kyo, nühnü hütsü ngupü du nüh sünung,

¹⁴tunüo nühjüdingnü Zin akungaselih la I yuzeng nyümcho. Meriba la ayucho shünü Ih nyümde, arüh bete nühnü I Amüsa zii chah müdümpicho.” (Meriba tsü Zin akungaselih la Kadesh la kinatung tsü lile.)

¹⁵Mosanü kihchicho,

¹⁶“Akang jüba ABÜDONGBA Tsingrang, müyurü nünung ko Nü yucho tsü san nyahrü müliba san mükyopü

¹⁷khata lasü nünung nengdang nyüh khüdu throcheh jüng.”

¹⁸ABÜDONGBAnü Mosa te yocho, “Nun tsurü Joshua, süchah anbü kehro, nühnü abi nowüng ko abi thah chah nü khehnü nyümkehjüng.

¹⁹Abi tsü bebüba Eliazar ko amülung bete yasohng, ko hütsüla atümung bete abi tsü nü mülih-epü arüh khyang müdhesohng.

²⁰Israelrü atümungnü abi yocho nyinungthsa nühnü abi khyang nü tase khürü jüng,

²¹bebüba Eleazarnü Urim ko Thummim bichi I lümcho müdhenung ko Joshuanü abi chah dümpinung. Hütsüta Eleazarnü Joshua ko Israelrü apüm arüh nguchi apüm la hütsü roh-i thongu nünung.”

²²ABÜDONGBAnü mülacho kyo Mosanü nguchicho. Abinü Joshua tsü bebüba Eleazar ko amülung apüm bete yasohcho.

²³ABÜDONGBAnü yuzeng jücho kyo, Mosanü Joshua thah chah akhehnü nyümkeh abinü Mosa mülihrepü sobhocho.