Read Sangtam Naga KHIDHENGCHO 28 Bible Online

KHIDHENGCHO 28 - Sangtam Naga bible

KHIDHENGCHO 28

¹ABÜDONGBAnü Mosa te

²Israelrünü athrochehcho bekhyah la abi künyangsohba tsang mübü jünung athülaba arüh te yocho.

³ABÜDONGBA khyang mübünung tsang mübü tsü hiri thsacho: nyümong mükhu trüp mübü nengdang, lapha mükeh kang khüdu za sanpung anyüh.

⁴Khüdu anyangnyü ko khüdu anyüzehlang,

⁵olive tuji atsauba liter khüdu la yohrütacho hüm süreh khüdu zeh mübünung.

⁶Hiba hi Sinai zong la akhudiba tsang mübü ABÜDONGBA künyangsohba axümlichi ko apüm trüpba nyümong mükhu jüba lile.

⁷Akhudiba san te yongkha amübü tsü liter khüdu Bholu chah tsü tungkehng.

⁸Anyüzehlang tsü anyangnyü mübüba roh-i tsü yongkha mübü zeh anyüuba san tsü khyo mübüng. Hiba hisü ABÜDONGBA künyangsohba tsang mübü tsü linung.

⁹Sabath nyümong tsü lapha mükeh kang khüdu za sanpung anyüh, tsang mübü thsa olive tuji la hüm süreh anyüh ko yongkha amübü zeh jüng.

¹⁰Hiba trüp mübü hi nyümong mükhu yongkha amübü zeh mübüba chah lahkeh, Sabath nyümong mübüba lile.

¹¹Choo mükhu adikeh nyümong tsü ABÜDONGBA khyang trüp mübü jüng: Misüpung aza anyüh, mizapung khüdu, kang khüdu za sanpung dhünyeh apüm lapha mükehcho.

¹²Tsang mübü thsa, olive tuji la hüm mübüng: misüpung khüdu la hüm süreh asang; mizapung khüdu la hüm süreh anyüh;

¹³ko San khüdu la hüm süreh khüdu yohnung. Hiri trüp mübü tsü tsang mübü ABÜDONGBA künyangsohba tsü lile.

¹⁴Yongkha mübü tsü misüpung khüdu la yongkha liter anyüh, mizapung la liter khüdu-pü achangsho ko san khüdu la liter khüdu. Hiba hi kang ayung choo müipi akhudiba nyümong trüp mübü nengdang yuzeng lile.

¹⁵Ko nyümong mükhu trüp mübü chah tsü lahkeh mizapung khüdu münyi mübü thsa mübüng.

¹⁶ABÜDONGBA nengla Phungkhu Thsüti tsü akhudiba choo dhüre-müyüu nyümong mungnung.

¹⁷Dhüre müngau nyümong tsü yangthsa thsüti tsü nyümong dhünyeh nengdang dikehre ko hiba shikhe ayung bhüpza müyohpü külüpcho hümthse du tsunung.

¹⁸Thsüti akhudiba nyümong tsü nührünü mübünung shibülung ko tusü tünguchi.

¹⁹ABÜDONGBA khyang trüp mübü tsang mübü thsa jüng: misü za apung anyüh, mizapung khüdu, ko Sanpung kang khüdu za dhünyeh lapha mükehcho mübüng.

²⁰Tsang mübü ajeng olive tuji la müxühcho hüm mübüng: misüpung khüdu la süreh asang mizapung khüdu la süreh anyüh,

²¹ko san khüdu la süreh khüdu.

²²Adesü mizapung khüdu münyi mübü jüng, hütsüta müyurü nengdang ayah müsachehba tsü nguching.

²³Hiri tsü lede anyangnyü trüp mübü chah lahkeh jüng.

²⁴Hütsüta, nyümong dhünyeh ABÜDONGBA khyang axümlichi tsang mübü tsü jüng. Hiba hi nyümong mükhu trüp mübü ko yongkha mübü chah lahkeh mübüng.

²⁵Adhünyeh nyümong tsü mübünung shibülung ko tu tünguchi.

²⁶Maxa Thsüti akhudiba nyümong, khode nührünü ABÜDONGBA khyang fürü asi lanü amübü jünang, nührünü mübünung shibülung ko tu tünguchi.

²⁷ABÜDONGBA khyang axümlichi trüp mübü jüng: misüpung aza anyüh, mizapung khüdu ko tu lapha mükehcho kang khüdu za sanpung dhünyeh.

²⁸Tsang mübü olive tuji te müxührütacho hüm: misüpung khüdu la süreh asang, mizapung la süreh anyüh

²⁹ko san khüdu la süreh khüdu jüng.

³⁰Adesü mizapung khüdu münyi mübü nengdang jüng ko hütsüta müyurü nengdang ayah müsachehba nguching.

³¹Hiba mübü ko yongkha mübü tsü nyümong mükhu trüp mübü ko tsang mübü chah lahkeh linung.