Read Sangtam Naga KHIDHENGCHO 31 Bible Online

KHIDHENGCHO 31 - Sangtam Naga bible

KHIDHENGCHO 31

²“Israelrü chah tu nguchicho hütsü ngang Midianrü tsü khingching. Nühnü hütsü nguchipü, nüh sünung.”

³Achotsü Mosanü müyurü te yocho, “Midianrünü ABÜDONGBA te tu nguchicho hütsü nengdang nührünü arüh mahnü khingchinung nengdang khatanung rungnüm.

⁴Israelrü hung müipi lanü nyüh hajar khüdu-khüdu müthehchüng.”

⁵Achotsü ahung müipi lanü nyüh hajar khüdu-khüdu atümungnü hajar dhüre-anyüh throcheh khatanung rungnümcho.

⁶Ko Mosanü arüh bebüba Eleazar tsurü Finehas, sünü Amüsa kohro ko rühti xükümcho abinü nüpü khata lang tsü wüsohcho.

⁷ABÜDONGBAnü mülacho roh-i, arühnü Midianrü mahcho ko

⁸Midianrü yangthsarü münga zeh nyitsarü apüm kyüsehcho: arüh münga tsü Evi, Rekem, Zur, Hur ko Reba licho. Arühnü Beor tsurü Balaamsü kyüsehcho.

⁹Israelrünü Midianrü khingkurü azarü apüm rangcho, arüh misü ko kanglungrü apüm khyücho, arüh kuthsi apüm zühcho,

¹⁰ko arüh yangdi ko yang apüm trüp-pehjücho.

¹¹Arühnü arohchocho apüm arangyohrü ko kanglungrü zeh,

¹²Jeriko lanü Jordan keh Israelrü liyaba Moab ngah yang Mosa ko Eleazar yanglang norocho.

¹³Mosa, Eleazar ko yucho la langnürü atümungnü rothsarü tsü mütohnung wücho.

¹⁴Khata lanü rorüh rothsarü langnürü hajar michah ko thsih michah anüchirü atümung te Mosanü mükünyangcho.

¹⁵Abinü arüh te tsingdhengcho, “Tuepü khingkurü atümung akang yohpücho?”

¹⁶Balaam athülaba nyirü tsü khingkurüti ko Peor la ABÜDONGBA te yuje müchosoh müyurüti nümülaba tsü lümchehng. Hütsü khu ABÜDONGBA müyurü chah rümra hirocho.

¹⁷Hütsüeko ade nahtrahnaxengba dhrezarü ko khingkurü atümung kyüsehng,

¹⁸ta amüthsengcheh khingkurü atümung nührübürü nengdang yohpüng.

¹⁹Ade akyühsehrü ko me chah thahpürü atümung nyümong dhünyeh tbükhüm milang lieng. Asangu nyümong ko dhünyeh nyümong nührübürü ko nührünü rang rorüh khingkurüti tsü müsachehng.

²⁰Nührünü shü apüm ko shuküpnü külüpcho, miza nbühnü mahkhang singnü külüpcho lüpcho müsachehng.

²¹Bebüba Eleazarnü rothsa langnü thalirüti te yocho, “ABÜDONGBAnü Mosa khyang jüba yuzeng tsü hiri lile.

²²Mütahba kohro adüzünü hon, taripi, imüyeng, idhse mahkhang imüluh hiri apüm michang la mürechi müsachehnung. Apa lüpcho kihnü müsachehnung.

²³

²⁴Adhünyeh nyümong nührünü jengki thsüng; hütsüpü du nührü ayahnü müsa kangnung ko yang la nüyohnung.”

²⁵ABÜDONGBAnü Mosa te yocho,

²⁶“Nüh ko Eleazar ko yucho la langnürüti zehnü arohchocho kohro lüpcho arangyohrü ko kanglungrü zeh khieng.

²⁷Hütsü nohlüm anyüh kang changnahng ko nohlüm-o rothsarü nengdang ko nohlüm-o tsü anyengchocho müyurü nengdang linung.

²⁸Rothsarüti nohlüm la tsünü ABÜDONGBA khyang amüthsüh roh-i arangyohnü thsih münga la khüdu ko misü, gadu, san ko mizasü hütsü roh-i throcheh yohpüng.

²⁹Hütsüri tsü bebüba Eleazar khyang ABÜDONGBA khyang jiyü khüdu roh-i jüng.

³⁰Müyurü nohlüm lanü arangyohrü dhünyang müipi khüdu-khüdu ko misü, gadu, san ko mizasü hütsü roh-i throcheh yohpüng. Hütsüri tsü ABÜDONGBA Shükuh xükümrü Levirü khyang jüng.”

³¹Mosa e Eleazar nyühnü ABÜDONGBAnü mülacho roh-i nguchicho.

³²Hiri hi rothsarütinü rohchocho arühbürü khyünung yohpüba müzehpü san ko miza lakh dhüroh hajar nyürepü münga, misü hajar nyürepü anyüh, gadu hajar rohrepü khüdu ko amüthsengcheh lazalarü hajar sangrepü ayüh.

³³

³⁴

³⁵

³⁶Rothsarü nohlüm achangsho tsü san ko miza lakh asang hajar sangrepü dhünyeh thsih münga, hütsü lanü ABÜDONGBA khyang amüthsüh 675; rothsarüti nengdang misü hajar sangrepü dhüroh, hütsü lanü ABÜDONGBA khyang amüthsüh 72; gadu hajar sangre thsih münga, hütsü lanü ABÜDONGBA khyang amüthsüh 61; ko rothsarüti nengdang lazalarü hajar dhüre-dhüroh, hütsü lanü ABÜDONGBA khyang amüthsüh 32.

³⁷

³⁸

³⁹

⁴⁰

⁴¹Hütsüta Mosanü Eleazar khyang ABÜDONGBAnü mülacho kyo amüthsüh roh-i pathsa amübü jücho.

⁴²Müyurü nohlüm tsü rothsarü nohlüm doi thsacho: San ko miza lakh asang hajar sangrepü dhünyeh thsih münga, misü hajar sangrepü dhüroh, gadu hajar sangre thsih münga ko nyitsarü hajar dhüre-dhüroh.

⁴³

⁴⁴

⁴⁵

⁴⁶

⁴⁷Hiba nohlüm lanü ABÜDONGBAnü mülacho kyo arangyohrü ko kanglungrü yolanü dhünyang la khüdu khyücheh, ABÜDONGBA Shükuh xükümrü Levirü khyang jücho.

⁴⁸Hütsüde rothsarü yola anüchirütinü

⁴⁹Mosa yang wünü yocho, “Adirü, ihrü mülung la khidhengko ko rothsarü khüdusü müchah.

⁵⁰Hütsünü ihrü müipinü khyücho hon-nü külüpcho kohro, bikhüm, khehmüyang, imüshi, nangmüshi ko lah hirore. Ihrü tsungtisohnung ihrünü ABÜDONGBA khyang ihrü akang mülih amübü jüre.”

⁵¹Mosa ko Eleazarnü hon tsü khyüchocho ko apüm tsü lahjengki thsacho.

⁵²Anüchirünü jücho dunü süreh thsih anyüh-o shi thsacho.

⁵³Aparünü khyücho tsü arühbürü nengdang yohpücho.

⁵⁴Hütsüta ABÜDONGBAnü müyurüti tsungtisohnung, Mosa ko Eleazar nyühnü hon tsü Shükuh lang hiwücho.