Read Sangtam Naga KHIDHENGCHO 32 Bible Online

KHIDHENGCHO 32 - Sangtam Naga bible

KHIDHENGCHO 32

¹Reuben ko Gad nyüh hung akang kuthsi khütang licho. Khode arühnü Jazer ko Gilead limih tsü kanglungrü nengdang dee phishu ngucho,

²arühnü wü Mosa, Eleazar ko yucho langnürüti te yocho,

³“Hiba mükyah ABÜDONGBAnü tro Israelrü khyang ngusohcho-Ataroth, Dibon, Jazer, Nimra, Heshbon, Elealeh, Sibma, Nebo ko Beon yangdi lih hi kanglungrü nengdang atsa lile ko ihrü akang kuthsi khütang lile.

⁵Yanglilüm ihrü khyang alih hi khülo ko ihrü Jordan yongkhi keh tüwüsoh ta hila lisohng.”

⁶Mosanü lalingcho, “Nührü nyitsarü Israelrü khatanung wüde nührü hila linyürü do?

⁷Tuepü nührünü Jordan keh ABÜDONGBAnü arüh khyang jücho lih la züdunung müyurü suhzahsohro?

⁸Kadesh Barnea lanü limih dhengnung müthehde nührü tpurünüsü hütsüta nguchicho.

⁹Arühnü Eshkol Ngah chii wü alih tsü ngucho, ta arüh thalide, arühnü hütsüba lih la züdunung suhzahsohcho.

¹⁰Hütsü nyümong ABÜDONGBAnü zichüro yuchümcho:

¹¹Arühnü I te yuje müchochonü, Ijip lanü chürorü kang mükyü ko amilangrü süsü Ihnü Abraham, Isak ko Jakobrü te nyengchoba lih la müzüdunung Ihnü yuchümcho.

¹²Hütsüla Jefune tsurü Kaleb ko Nun tsurü Joshua nyüh du müzehcho; tunüo arühnü ABÜDONGBA te yuje chocho.

¹³ABÜDONGBAnü müyurü te zichürocho ko Abi mükünyangsohba shang tsü müsükhangde, Abinü arüh akungaselih la tsü kang yüre rümchisohcho.

¹⁴Ko ade nührünü nührü tpurü jingkih la züduchonü, Israelrü michah amünyirü shang asi khüdunü ABÜDONGBA rihlong hironung rungnüm lile.

¹⁵Ade nührü Reuben ko Gad hungnü abi yocho münyikhang, apüm adesü hiri müyurü apüm akungaselih la thrüchahchüpehnung ko arüh changba tsü nührü bha thsanung.”

¹⁶Arühnü Mosa yang ro yocho, “Akhudi, ihrünü San nengdang lungtbü ko khingkurü azarü nengdang tbütinü yangdi külüpsohng.

¹⁷Hütsüpü ihrünü khata lang tsü wünung ko mahcheh alih tsü arüh yo kangsoh mülisohde ihrünü wünung rungnümnung. Hütsütade ihrü khingkurü azarü tsü hiba atbüticho yangdi la hiba lih nyitsarü kheh lanü khümcho liyanung.

¹⁸Aparü Israelrü apüm arüh khyang lümcho jücho la tsü jücho müjüde, ihrünü ihrü kuh lang müthalinung.

¹⁹Ihrünü Jordan khüulang tsü arüh te tu kuthsi müchingnung, tunüo ihrü nohlüm hila Jordan nyüchürolang nguko.”

²⁰Mosanü lalingcho, “Nührünü choba tsü yuje thsakhang, hila ABÜDONGBA bete khata wünung rungnüm.

²¹Nührü rothsarü atümungnü Jordan tsü kehnung ko ABÜDONGBAnü nücho la, arorüh tsü mükohde ko alih tsü müjüchode, nührünü arüh tsü mahnungbae.

²²Hütsüpü khanglang nührü thalinung kohle, tunüo ABÜDONGBA ko nührü nyitsarü Israelrü te nührü anyengchocho tikehko. Hütsüde Jordan nyüchürolang lih hi nührü yoepü ABÜDONGBAnü müdhenung.

²³Ta nührünü anyengchocho müyohpükhang, nührünü ABÜDONGBA nyüm amünyi shitpahrü thsanung hütsü müdheing. Hütsü nyichehng; nührü münyi nengdang nührü akhingchi ngunung.

²⁴Hütsüeko nührü yangdi ko lungtbü külüpm, ta nührünü tu nyengchocho hütsü nguching.”

²⁵Hütsüde Gad ko Reubenrünü yocho, “Adirü, nühnü yocho roh-i ihrünü nguchinung.

²⁶Ihrü nitpürü ko tsuzarü ko kanglungrü hila Gilead yangdi la liyanung.

²⁷Ta ihrü atümung ABÜDONGBAnü nücho pohki khatanung wünung rungnüm lile. Nühnü yocho kyo, ihrünü Jordan keh wünü khatanung.”

²⁸Achotsü Mosanü yuzeng hiri Eleazar, Joshua ko Israel la langnürüti khyang jücho.

²⁹“Gad ko Reubenrünü ABÜDONGBAnü mülacho la Jordan keh wünü khatanung rungnüm likhang ko arüh khu nührünü alih tsü kengchochehkhang, arüh khyang arüh yo thsanung Gilead tsü jüng.

³⁰Ta arühnü nührü yola Jordan tsü keh wünü khata lang müwükhang, arühsü nührü te müjang Kanan la du arüh nohlüm ngunung.”

³¹Gad ko Reubenrünü lalingcho, “Adirü, ABÜDONGBAnü yocho kyo ihrünü nguchinung.

³²Abinü nücho pohki, ihrünü hila Jordan nyüchürolang kuthsi hi ngunungthsa, ihrünü Kanan la tsü züdu khatanung.”

³³Achotsü Mosanü Gad ko Reuben hung khyang ko Manase hung achangsho khyang Amor-rü Yangthsaba Sihon ko Bashan Yangthsaba Og lih apüm ko hütsü mükangmüshü yangditi apüm zeh jücho.

³⁴Gad hungnü tbüti liba Dibon, Ataroth, Aroer,

³⁵Atroth Shofan, Jazer, Jogbeha,

³⁶Beth Nimra ko Bet Haran yangditi külüpchicho.

³⁷Reuben hungnü Heshbon, Elealeh, Kiriathaim,

³⁸Nebo, Baal Meon (hiba neng hi müliko) ko Sibma yangditi külüpchicho. Arühnü külüpchicho yangditi aneng asi dsicho.

³⁹Manase tsurü Makir tsutpunü Gilead lih mahcho ko hütsü khyücho ko hütsüla hiba Amor-rü tsü iipehcho.

⁴⁰Hütsünü Mosanü Gilead tsü Makir tsutpu khyang jücho ko arüh hütsüla licho.

⁴¹Manase hung la Jairnü yang khürü mahcho ko “Jair yangdongti,” pü dsicho.

⁴²Nobanü Kenath ko yangdongti mahcho ko abinü aneng la Noba pü dsicho.