Read Sangtam Naga KHIDHENGCHO 33 Bible Online

KHIDHENGCHO 33 - Sangtam Naga bible

KHIDHENGCHO 33

¹Mosa ko Aron nyühnü nüpü Israelrü Ijip lanü rode arüh licho müdümti hiri linung.

²ABÜDONGBAnü yuzengjo, bekhyah papa la arüh licho Mosanü thrahbülungcho.

³Israelrünü Ijip tsü kang la akhudiba choo, akhudiba Phungkhu Thsüti nyümong khüu dhüre-müngau nyümong pehjücho.

⁴ABÜDONGBAnü tsungti, ABÜDONGBAnü kyüsehcho aukhurüti merangrü Ijiprünü ngu, Rameses lanü shemüsucho. Hinü Ijiprü tsingrangti tenü ABÜDONGBA tsü re alaa azeh-u epü ngusohre.

⁵Israelrünü Rameses lanü shemüsu ro Sukot la licho.

⁶Anyüu tsü lipilih bekhüm Etham la licho.

⁷Hütsü lanü arühnü Baal Zefon nyüchürolang, Pi-Hahiroth lang ro Migdol te licho.

⁸Arühnü Pi-Hahiroth pehjo Amoh kihdi khu Shur akungaselih la rocho; ko nyümong asang tseh ropü Mara la licho.

⁹Hütsü lanü arühnü wü Elim la licho, tunüo hütsüla kihna dhüre-anyüh ko sedong nyühre licho.

¹⁰Arühnü Elim pehjüpü ro Amoh kihdi shündhün licho.

¹¹Anyüuba Sin akungaselih la licho.

¹²Hütsüpü arühnü Dofkah la licho,

¹³hütsüpü ro Alush la licho.

¹⁴Hütsü lanü ro ayongnung kih müli la Refidim la licho.

¹⁵Refidim lanü Hor zong kahla arühnü müdüm hiri la li rocho: Sinai lipilih Kibroth Hatavah (mahkhang “Shuhxangrü kong”) Hazeroth, Rithma, Rimon Perez, Libna, Rissah, Kehelatha, Shefer zong, Haradah, Makheloth, Tahath, Tera, Mithka, Hashmona, Moserot, Bene Jaakan, Hor Haggidgad, Jotbatha, Abronah, Eziongeber, Zin akungaselih (Hütsü Kadesh) ko Edom lih te Hor Zong.

³⁸ABÜDONGBAnü yuzeng jücho khu, bebüba Aron tsü Hor zong lang tuwücho. Abi kang 123 thsade, Israelrü Ijip pehjüpü kang yüreuba, choo münga la akhudiba nyümong, abi hütsüla sücho.

⁴⁰Kanan kihjinglang lahpi Arad Yangthsabanü Israelrü rolepü yuchicho.

⁴¹Hor Zong lanü Moab ngah tashi la müdüm hiri la Israelrü li rocho: Zalmona, Punon, Oboth, Moab luhrü la Abarim thsangnyangcho la, Dibon Gad, Almon Diblathaim, Nebo Zong amünyeh Abarim Zong ko Jeriko lanü Jordan Yongkhi keh wüpü Moab ngah la, Bet Jeshimoth ko lung ko idhsenü külüpcho Akacia Ngah nyüh kahla li rocho.

⁵⁰Hütsüla Jeriko lanü Jordan keh wüpü Moab ngah la,

⁵¹ABÜDONGBAnü Mosa khyang Israelrü nengdang athülaba hiri jücho: “Khode nührünü Jordan keh Kanan lih la tsü züdunang,

⁵²nührünü hütsüla lirü atümung iipehbae. Nührünü arüh lung ko idhsenü külüpcho kyothriti ko arüh mübüba müdümti apüm thsangnyang pehjüng.

⁵³Alih tsü mükuhng ko hütsüla lieng, tunüo hütsü Ihnü nührü khyang jüre.

⁵⁴Alih tsü ahung ko tsutpu papa, amülah ko aikyah aichi zii thsadheng changtaang.

⁵⁵Ta hütsüla lirü nührünü mü-iipehchehkhang, arüh tsü nührü nengdang nahla anyah zehcho kyo ko thringxang la zeng zehcho kyo linung, ko arühnü nührü nyüm khatanung.

⁵⁶Nührünü arüh mü-iipehkhang, Ihnü arüh changsohnung lümba kyo, nührü changsohnung.”