Read Sangtam Naga KHIDHENGCHO 34 Bible Online

KHIDHENGCHO 34 - Sangtam Naga bible

KHIDHENGCHO 34

¹ABÜDONGBAnü Mosa khyang

²Israelrü nengdang athülaba hiri jücho: “Khode nührünü anyengchocho Kanan lih la tsü züdunang, nührü luhrü tsü hiroh-i linung.

³Kihjing lahpi tsü Zin akungaselih lanü Edom luhrü chii linung; nyüchürolang tsü Asü kihdi kihjing lahpi achangka chii linung.

⁴Hütsü lanü Akrabbim Lang kihjing lahpi ximülang ko mütozah Zin khu Kadesh Barnea kihjing lahpi chii linung. Hütsü lanü kihku-nyüzüdu lahpi Hazer Addar ko Azmon chii

⁵khüi lanü ximüla Ijip luhrü ngah lang ronung ko Mediteranean la changkanung.”

⁶“Nyüzüdulang lahpi luhrü tsü Mediteranean kihdi thsanung.

⁷“Kihkulang lahpi luhrü tsü Mediteranean kihdi lanü Hor Zong chii

⁸ko hütsü lanü Hamath lang chii linung.

⁹Hütsü lanü mütozah Zedad ko Zifron chii linung ko hütsü Hazar Enan la changkanung.

¹⁰“Nyüchürolang luhrü tsü Hazar Enan lanü Shefam chii linung.

¹¹Hütsü lanü Ain nyüchüro langthring Harbel chii linung ko hütsü lanü azong lih lang wü Galil kihting nyüchüro langthring kihbekhüm chii linung,

¹²ko kihjinglang Jordan Yongkhi jüpnü jowü Asü Kihdi chii linung. “Hiri müyü hi nührü luhrü linung.”

¹³Achotsü Mosanü Israelrü te yocho, “Nührünü Zii thsadheng ngunung liba lih tsü hi lile, hiba lih hi ABÜDONGBAnü hung düku pü achangsho khyang jo lile.

¹⁴Reuben ko Gad ko nyüchüro langthring Manase hung achangsho abürü nohlüm nguko.

¹⁵Jeriko dükehlang Jordan nyüchüro langthring, palu kukhi aichi arüh kuthsi nguko.”

¹⁶ABÜDONGBAnü Mosa te yocho,

¹⁷“Bebüba Eleazar ko Nun tsurü Joshua nyühnü alih tsü changnahnung.

¹⁸Anyüh tronung hung müipi lanü azirü nyüh khüdu-khüdu zehsohng.”

¹⁹ABÜDONGBAnü throba nyitsarüti tsü hiri: [Ahung] — [Langnürü] Juda — Jefune tsurü Kaleb Simeon — Amihud tsurü Shelumel Benjamin — Kislon tsurü Elidad Dan — Jogli tsurü Bukki Manase — Efod tsurü Hamiel Efraim — Shifthan tsurü Kemuel Zebulun — Parnak tsurü Elizafan Isakar — Azzan tsurü Paltiel Asher — Shelomi tsurü Ahihud Naftali — Amihud tsurü Pedahel

²⁹Hiri nyitsarüti hi ABÜDONGBAnü Kanan lih la Israelrü khyang kuthsi changnah jünung nyümkehjücho.