Read Sangtam Naga KHIDHENGCHO 5 Bible Online

KHIDHENGCHO 5 - Sangtam Naga bible

KHIDHENGCHO 5

¹ABÜDONGBAnü Mosa te yocho,

²“Israelrü te sürü mübhira kehro, mahkhang fü lanü sho likhang ko me chah thahpücho khu mümüsa lirü tsü amüdong chahnü iipehnung yuzeng jüng.

³Müyurü yola I liba amüdongchah tsü mümünyinung nengdang, hiri mümüsarü atümung pehng.”

⁴Israelrünü hütsü nyinü arüh atümung müdong chahnü iipehcho.

⁵ABÜDONGBAnü Mosa khyang

⁶Israelrü nengdang athülaba hiri jücho. Nyüh khüdunü ABÜDONGBA te yuje müchode ko khürü nyüm münyi shitpahde,

⁷abinü mülang nyengchoung ko thsakehba khyang ajeng sahpü dunü alaa mii thsih la mükyü zeh jüng.

⁸Ta hütsüvi tsü sopehkhang ko tsutpurü mülikhang, hütsü bebürü nengdang ABÜDONGBA khyang jüng. Hiba sahba hi thsamehba müsachehnung miza khüdu khyücho chah, alahkeh linung.

⁹Adesü Israelrünü ABÜDONGBA khyang pathsa amübü jüba tsü bebüba sü jingte hütsü hiroro, abi yo thsanung.

¹⁰Bebürü müipinü abi khyang jiyüba tsü khyünung.

¹¹ABÜDONGBAnü Mosa te

¹²Israel khyang athülaba hi jünung yuzeng jücho. Nyüh khüdunü anitpünü abi te yuje müchocho ko aparü adhrerü te mükhong münyicho longmülang tikehnung kohle. Ta aniinü hütsü mütsitsa, tunüo anitpünü hütsü müyümchinung kohle ko yuzi müli, ko khehnü mürang. Mahkhang abükyünü yujecho lipü aniinü longmülangnung kohle.

¹⁵Khüi khüi nengdang thsanye abinü anitpü tsü bebürü yanglang nowünung. Abinü amübü jünung lüdi hüm süreh khüdu hironung, ta abinü hütsüla olive tuji mahkhang müchiji tusü müyohnung, tunüo hi longmülangba anii khüdu chahnü yuje tsü rangchehnung nengdang lile.

¹⁶Bebüba tsünü khingkutpü tsü noro bholu bete yasohnung.

¹⁷Abinü Amüsa kih aza alih tbhü la tungyohnung ko ABÜDONGBA Shükuh alih lanü alih aza kangchehnung ko kih la tsü yoh khasohnung.

¹⁸Hütsüpü abinü khingkutpü kuva tsü lehchehnung ko akheh la amübü hüm tsü yohjünung. Bebübanü apu khehla chokehchola hiroba kih akha tbhü tsü binung.

¹⁹Hütsüpü bebüba tsünü khingkutpü khyang tsü abi khanglang yuchüm hi chosohnung: “Nühnü nahtrahnaxeng müthsakhang, hiba kihnü hiroba chokehchola tsü nü chah müküdunung.

²⁰Ta nühnü nahtrahnaxengpü likhang,

²¹ABÜDONGBAnü nü neng tsü nührü nyitsarü yola chokehcholaang. Abinü nübükyü yo tsü zümsohng ko nü mi bümsehsohng.

²²Kih hi nü mi la züdusohng ko hütsünü nü mi bümsohng ko nü yo tsü zümsohng.” Khingkutpü tsünü lalingnung, “Ihnü nyengchore, ABÜDONGBAnü hütsüta thsasohng.”

²³Hütsüpü bebüba tsünü hiba chokehchola tsü thrahnung ko hütsü kih akha tbhü la tsü thsüthohpehnung.

²⁴Abinü khingkutpü khyang kih khüinü adhsa chürosohnung kohro hütsü mütih-ede,

²⁵bebüba tsünü abükyü kheh lanü amübü jünung liba hüm tsü khyo abinü hütsü ABÜDONGBA khyang müsachehjo bholu chah yohpünung.

²⁶Hütsüpü abinü amübü thsa müyo-o khyüchehnung ko bholu chah trüpnung. Achangkathsa, abinü khingkutpü khyang kih tsü yongsohnung.

²⁷Abükyünü nahtrahnaxengpü likhang, kih tsünü abükyü fü la dee thsasohnung; ami bümnung ko abükyü yo tsü zümsohnung. Ko nyitsarü yola abükyü neng tsü chokehchola kangnung.

²⁸Ta abükyü tsü müsacheh likhang, abükyü chah müküdunung ko tsuzarü lichehnung.

²⁹Adhrerü khürünü anitpünü nahtrahnaxengkopü longmülangde hiba yuzeng hi bichinung.

³⁰Khingkutpü tsü bholu bete yasohnung ko bebürünü hütsüta ayah tsü nguchinung.

³¹Anii tsü mülang mülinung, ta khingkutpü tsü thsamehpü likhang, hiba mülang tsü hinung.