Read Sangtam Naga KHIDHENGCHO 6 Bible Online

KHIDHENGCHO 6 - Sangtam Naga bible

KHIDHENGCHO 6

¹ABÜDONGBAnü Mosa te,

²Israelrü khyang athülaba jünung yuzeng jücho. Khingkurü nye adhrerü nye sünü Nazirit, kangnung yuchümnang ko ABÜDONGBA khyang müsachehjürünang abinü yongkha tenü za lieng.

³Abinü shükusih lanü külüpcho tu müyongbae mahkhang shükusih ko akungcho tu mütsunung.

⁴Abi Nazirit thsa lizah, shükusih lanü rocho mahkhang shükusih atse mahkhang aküp mii mütsunung.

⁵Abi Nazirit yuchüm la lizah, abinü akuva ko benbüh mühehbae. Abi tsü ABÜDONGBA khyang müsacheh ajeng jücho yuchümba pohki rah lile ko abinü akuva ko benbüh vieng.

⁶Abi kuva tsünü ABÜDONGBA khyang müsachehcho amüdhethsa linung ko hütsünü abinü au, atpa, amung ko anirü me te mii shündhün wünü ajangjang mümünyibae.

⁸Abi Nazirit thsa lizah, abi tsü ABÜDONGBA khyang khakhuchüjücho lile.

⁹Amüsachehcho Nazirit-rü kuva khüdu abi müshüm dhrongyengnü sücho khu münyikhang, abinü nyümong dhünyeh ying ko akuva ko benbüh tsü hehpehng; hütsüta abi ayah lanü müsa kangnung.

¹⁰Akeh-u nyümong abinü bebürü yang ABÜDONGBA Shükuh trahtri la mümüdhrü anyüh mahkhang kuh-mümüdhrü anyüh hirung.

¹¹Ko abinü me ngucho nengdang müsachehnung, bebürünü khüdu münyi mübü ko akhüu tsü trüp mübü jünung.

¹²Hütsü nyümong tsü abi kuva ko bekhyah müsacheh abi Nazirit tsü thali müsachehchinung. Atsicho la dikeh roba bekhyah tsü mükhinung, tunüo akuva amüsachehcho tsü münyipehko. Sahliba amübü nengdang abinü san kang khüdu za hironung.

¹³Khode Nazirit yuchüm nyümong tsü pisanang, abinü ayah tsü nguchinung.

¹⁴Abinü Shükuh trahtri la tsü wünung ko achomükeh kanglungrü asang ABÜDONGBA khyang jünung: trüp mübü shulüm san kang khüdu za apung khüdu münyi mübü shulüm sanpung khüdu hiro mübünung.

¹⁵Adesü abinü bhüpza müyohpü külüpcho hümthse loh khüdu: hüm la tuji yoh külüpcho hümthse acheh ko tuji yoh jengpa külüpcho hümthse ko hütsü chah lahkeh tsang ko yongkha mübü jünung.

¹⁶Bebübanü hiri apüm ABÜDONGBA khyang jünung ko trüp mübü ko münyi mübü mübünung.

¹⁷Abinü ABÜDONGBA khyang sanpung tsü akehta amübü thsa hümthse loh-o zeh jünung; ko abinü tsang ko yongkhasü jünung.

¹⁸Shükuh trahtri la tsü Naziritba tsünü akuva tsü hehnung ko akehta mübü trüp yaba michang la tsü yohnung.

¹⁹Hütsüpü, sanpung apüh tsü chongpü bebüba tsünü hütsü khyo hümthse acheh khüdu loh la tsünü apa hümthse khüdu khyo Naziritba khehla tsü yohjünung.

²⁰Hütsüpü bebübanü hütsüri khyo ABÜDONGBA khyang pathsa jiyü jünung; hütsüri tsü yuzengnü bebürü yo sanpung adreng ko ajing chah lahkeh, bebürü nengdang Amüsa mübü linung. Hütsüpü du, Naziritba tsünü yongkha tsü yongnung.

²¹Hiri tsü Nazirit-rü nengdang yuzeng linung; ta Nazirit-rü khüdunü yuzengnü khangba chah alaa jünung nyengchokhang, abinü nyengchocho kyo tsü nguchinung.

²²ABÜDONGBAnü Mosa te,

²³Aron ko atsurütinü Israelrü müwajüde yu hiri bichinung yocho:

²⁴ABÜDONGBAnü nüh müwajüng ko xüküm;

²⁵ABÜDONGBAnü nüh müing ko chomang;

²⁶ABÜDONGBAnü nüh phikhüm ko atbachi jüsohng.

²⁷Ko ABÜDONGBAnü yocho, “Arühnü Israelrü michah I neng tsü amüwa thsa bichikhang, Ihnü arüh müwajünung.”