Read Sangtam Naga KHIDHENGCHO 8 Bible Online

KHIDHENGCHO 8 - Sangtam Naga bible

KHIDHENGCHO 8

¹ABÜDONGBAnü Mosa te yocho,

²“Aron-nü dsimüdongsing chah tsü dsi dhünyeh tsü müdongde, bekhu lang tsü vinungthsa müdongnung abi te young.”

³Aron-nü hütsü nyinü dsi tsü belangthring pinü müdongcho.

⁴Dsimüdongsing tsü athahlangnü ajinglang chii ABÜDONGBAnü Mosa te ngusohcho kyo hon amüthsengnü hamcheh külüpcho.

⁵ABÜDONGBAnü Mosa te yocho,

⁶“Levirü tsü Israelrü aparü tenü throsah

⁷hiroh-i müsachehng: müsachehba kih tsünü arüh chah xahkehjüng ko arüh te arüh afü apüm hehpehnung ko arüh jengki thsopehnung young. Hütsükhang arüh ayah kyo müsa linung.

⁸Hütsüpü arühnü misü bongtho khüdu khyo ko tuji la hüm müsurüta tsang mübü hieng; ko nührünü münyi mübü nengdang misüpung apa khüdu khyüng.

⁹Hütsüpü Israelrü yucho apüm shimükhongsohng ko Levirü tsü I Shükuh bete yasohng.

¹⁰Ko Israelrü khehnü Levirü thah chah nyümkehnung,

¹¹ko arühnü Ih dikehnung shulüm Israelrü yolanü Levirü tsü pathsa I khyang jiyü kang Aron-nü müsachehsohng.

¹²Hütsüde Levirünü misüpung anyüh thah chah tsü arüh khehnü nyümkehnung; khüdu münyi mübü ko akhüu tsü trüp mübüthsa, hütsü Levirü nengdang ayah müsahchehba linung.

¹³“Levirü tsü I khyang pathsa jiyü khüdu kang müsachehjüng, ko arüh Aron ko atsurüti khyang xükumsohng;

¹⁴Levirü tsü I yo thsanung aparü Israelrü tenü hütsüta pathsa changsahng.

¹⁵Levirü tsü hütsüta nührünü müsacheh khakhuchüjüpü khanglang du, I Shükuh la dikehnung dekhengnung.

¹⁶Ihnü arüh Israelrü aukhurü apüm mülih chingko, arüh tsü I yo du thsanung.

¹⁷Khode Ihnü Ijip la aukhurü atümung kyüsehcho, Ihnü Israelrü kukhi müipi la aukhurü ko akhu mütrücho kanglungrü apüm Ipu yo kang müsachehcho.

¹⁸Hütsünü Ihnü ade Israelrü aukhurü mülih Levirü khyüre,

¹⁹ko Israelrü yolanü Jiyü pathsa khüdu roh-i, Israelrü nengdang Shükuh la nguchinung ko arühnü Amüsa Müdüm te shündhün-ra rode achongcha küdude tsungtinung, Levirü tsü Aron ko abi tsurü khehla yohpüjüre.”

²⁰Hütsüta ABÜDONGBAnü Mosa te yuzeng jücho kyo, Mosa, Aron ko Israelrünü Levirü tsü müsachehcho.

²¹Levirünü arüh jangjang müsachehcho ko arüh jengki thsüthohcho ko Aron-nü pathsa jiyü kang ABÜDONGBA khyang müsachehjücho. Abinü arüh nengdang ayah müsachehbasü nguchicho.

²²ABÜDONGBAnü Levirü nengdang yuzeng jücho lüpcho müyurütinü nguchicho. Hütsüta Shükuh la Aron ko abi tsurüti pohki nguchinung Levirü tsü dekheng kangcho.

²³ABÜDONGBAnü Mosa te yocho,

²⁴“Levirü khüdu kang mükyüpü münga tinü I Shükuh la dikehnung,

²⁵ko kang dhünyang pide zahnung.

²⁶Hütsükolü, abinü müjang dikehrü arüh nguchi la tronung kohle, ta apu jangjang tu münguchinung. Hütsüta nührünü Levirü nguchi tsü changnahjüng.”