Read Sangtam Naga KHIDHENGCHO 9 Bible Online

KHIDHENGCHO 9 - Sangtam Naga bible

KHIDHENGCHO 9

¹ABÜDONGBAnü Mosa te Israelrü Ijip pehjüpü kang anyüu akhudiba choo la Sinai lipilih la chotacho. Abinü yocho,

²“Hiba choo nyümong dhüre-müyüu nyü züdu tinü dikeh, Israelrünü Phungkhu Thsüti yuzeng apüm bichi mungnung dikehng.”

⁴Achotsü Mosanü müyurü te Phungkhu Thsüti mungnung yocho,

⁵ko hütsüba akhudiba choo nyümong dhüre-müyüu la tsü arühnü Sinai lipilih la hütsüta nguchicho. ABÜDONGBAnü Mosa te yuzeng jücho kyo Müyurünü lüpcho nguchicho.

⁶Ta hütsüla nyitsarü khürü ayahnü mümüsa licho, tunüo arühnü me chah thahpücho. Hütsünü arühnü hütsü nyümong tsü Phungkhu Thsüti tsü mümungchehcho. Arühnü wü Mosa e Aron nyüh te yocho.

⁷“Ihrü mümüsa tunüo ihrünü me chah thahpüko, ta ABÜDONGBA khyang amübü jüba Israelrü yolanü ihrü khüta pehnung?”

⁸Mosanü lalingcho, “ABÜDONGBA chahnü Ihnü athülaba müngude ying.”

⁹ABÜDONGBAnü Mosa te yocho

¹⁰Israelrü te young, “Khode nührü mahkhang nührü trah khürü me chah thahpücho khu mümüsa mahkhang ashu la shitseh lang likhang, ta Phungkhu Thsüti mungnyükhang,

¹¹nührünü choo khüdu khanglang choo anyüu la nyümong dhüre-müyüu anyüzehlang dikehnung mülare. Hütsü Bhüpza müyohcho hümthse ko rangva akha bichi müzehng.

¹²Nyangnyü khüu yingcheh tsuyongnung tusü tünying mahkhang shurüh tükhyahnah. Ko Phungkhu Thsüti tsü yuzeng apüm bichi mung.

¹³Ta sü müsa lipü ko shitseh müwüpü Phungkhu Thsüti mümungro, abilü I müyurü yola mükhiyohnung, tunüo athrochehcho bekhyah la abinü I khyang amübü müjü. Hütsü münyi nengdang abi khingchinung.

¹⁴“Nührü yola lirü shuparü khürünü Phungkhu Thsüti mungnyükhang, abinü yuzeng apüm bichi mung. Hiba yuzeng tsü abüdongrü mahkhang shuparü apüm nengdang linung.”

¹⁵ABÜDONGBA Shükuh müdong nyümong, nyükhi khüdunü ro hütsü shüticho. Amala nyükhi tsü michang kyo licho.

¹⁷Khodederü nyükhi tsü shüshonang, Israelrünü kuh tsü tphüpü nyükhi jüroba müdüm la tsü thsaticho.

¹⁸ABÜDONGBA yu nyi arühnü tphücho ko thsachilicho. Shükuh michah tsü nyükhi litizah arühnü hütsüla licho.

¹⁹Khode Shükuh michah tsü nyükhi tsü anyahli linang, ABÜDONGBA yochonyi arühnü müshehchicho.

²⁰Khüpilü Shükuh michah nyükhi tsü nyümong azachah du licho; arühnü müdong nye mahkhang shehmüi nye, ABÜDONGBAnü yuzeng jücho roh-i du nguchicho.

²¹Khüpilü nyükhi tsü anyüzehlangnü nyangnyü khüu du chii licho ko nyükhi tsü shüshoyeng arühnü shehmüicho. Khode nyükhi tsü shüshonang, arühnü shehmüicho.

²²Nyümong anyüh nye, choo khüdu nye, kang khüdu nye mahkhang alaa nye, Shükuh michah nyükhi tsü lidelü arühnü müshehmüicho; ta hütsü shüshopü du shehmüicho.

²³Arühnü amüdongchah nye ko tphüh nye, ABÜDONGBAnü Mosa khu yuzeng jücho nyi nguchicho.