Read Sangtam Naga MIKA 4 Bible Online

MIKA 4 - Sangtam Naga bible

MIKA 4

¹Aronung nyümongla Amübükuh yaba zong tsü akhangti apüm yola apüm tenü athsenguba thsanung. Yucho adrong hütsü yang shibülungnung,

²ko arüh nyitsarünü yonung, “Ihsanü ABÜDONGBA khang chah küdunung, Israel Tsingrang Amübükuh yang. Tunüo Abinü nguchisohnyücho Ihsa te yonung; Ihsanü Abi lang la tsehnung. Tunüo ABÜDONGBA adoba Jerusalem lanü rore; Zion lanü Abinü müyurü te chotare.”

³Abinü yuchoti kahla yukhajünung, ashu amünyeh la liba rezeh yanglihti kahla. Arüh nohshengnü fühjeng, thsuhnü mükheh kang kengnung. Yanglihtinü khodesü chita müwünung, Chita nengdang khodesü müküdangnung.

⁴Atümung yangtsa la linung palu shükusih yo ko ngurüsih yola, ko sünüsü abi münehsohnung. Akohba ABÜDONGBAnü hi nyengchoko.

⁵Yucho müipinü palu Tsingrang mübo yocho nyire, ta ihrü nülü ihrü Tsingrang ABÜDONGBA müchangkapü mübo Abi yu nyinung.

⁶“Yangtsi la sürü Ihnü khingchicho, arüh atümung nübülungnung becho chihkopü ABÜDONGBAnü yore.

⁷Arüh jahloh-hilohko ko kuh lanü ashu za lile, ta amütrühti chahnü Ihnü asi dikehnung, ko arüh yucho arangcheh kangnung. Hütsü bekhyah lanü dikeh lede Ihnü Zion Khang lanü arüh michah yangthsanung.”

⁸Ko nüh, Jerusalem, khüde San-nyahrü kyo Tsingrangbanü abi müyurüti nyah liro, akhudi kyo thali yanglih la yangdiba kangnung.

⁹Tuepü hidoi zii traro? Tuepü khingkurü mikhung thsade kyo chongcharo? Hütsü yangthsarü mülichonü mahkhang lümlong jürü süchonü do?

¹⁰Jerusalemrü, khingkurü azarü surode kyo mülachi traang, tunüo ade nührü yangdi pehjünung ko jungchah linung. Nührü Babylon lang wünung, ta hütsüla ABÜDONGBAnü arorüh kheh lanü nührü khümchonung.

¹¹Nührü mahnung yucho adrong shibülungko. Arühnü yore, “Jerusalem tsü changjünung! Ihrünü hiba yangdi hi thsangnyang ngunung!”

¹²Ta hiri yuchotinü ABÜDONGBA lüm la tu lirünang mümüdhe. Tsesu amapnung zangbülungcho kyo arüh khingchinung nübülungrepü arühnü mümüdhe.

¹³ABÜDONGBAnü yore, “Jerusalemrü, wüng ko nührü rorüh khingching! Ihnü nührü idhse jüh ko imüyeng müzi kehba misüpung kyo müküp kangsohnung. Nührünü yucho adrong sehchinung ko arühnü kengchocho kuthsi tsü nührünü lihküp ABÜDONGBA I khyang hirojünung.”