Read Sangtam Naga NAHUM 1 Bible Online

NAHUM 1 - Sangtam Naga bible

NAHUM 1

¹Hiba yusi hi Nineve nengdang, Elkoshrü Nahumnü ngucho müngucheh.

²ABÜDONGBA tsü nahmoh ko rühyangba Tsingrang lile; Abi nyümrü Abinü khingchire. Abinü zichüro rühyangre.

³ABÜDONGBA zii mülakhüti müchürore, ta Abi re azeh ko thsamehrü mükhingchipü khodesü müpehjüre. ABÜDONGBA tsehcho la tsingxinyübong chürore; Nyükhi tsü Abi tsehde chürocho asongsong lile.

⁴Abinü kihdi te yuzeng jüre, ko hütsü kungpehre! Abinü yongkhiti kungchehsohre. Bashan ngah mükusohre, Karmel zong müyengsohre ko Lebanon yungpi yülasohre.

⁵ABÜDONGBA bete azongti zingchire; akhangti Abi bete shenahre. ABÜDONGBA ngude alihnü shühchire; Limih ko nyitsarüti atümung dhridhrire.

⁶Abi zichürode sünü yachehnung? Abi rihlong sünü rangnung? Abi michang rihlong chürode; lung mii asongsong kangre.

⁷ABÜDONGBA tsü atsa; Abinü müyurü thsangthsi la trore, Abi yang rorüh Abinü xükümre.

⁸Athotho kihmülüm kyo Abinü arorühti changjüre; Abi nyümrüti süsohre.

⁹ABÜDONGBA nyüm tu rah külüpro? Abinü nüh changjünung. Sünüsü khüdupi chah khu Abi münyümre.

¹⁰Abhümpücho zeng ko manying akung kyo, nührü trüp-pehnung.

¹¹Nineve, nü chahnü arah amütsanü jengpü ABÜDONGBA nyüm nyüh khüdu chüroko.

¹²ABÜDONGBAnü Abi müyurü Israelrü te hi yore: “Assyriarü tsü re azeh ko mükhilong nye, arüh changpehjünung. I müyurüti; Ihnü nührü chongchasohko, ta Ihnü thali münguchinung.

¹³Ihnü nührü michah Assyriarü tase changkajünung ko nührü rahba ixilih tohnahjünung.”

¹⁴Assyria shulüm ABÜDONGBAnü yuzeng jüba tsü hi: “Arüh neng himüchinung arüh chahnü mütrahchonung. Arüh amübükuh la kyothri Ihnü thsangnyangjünung. Ihnü Assyriarü khyang kong khüdu külüpyale, arüh akang linung müleng!”

¹⁵Dheng, azong la yusi atsa hipü yuhirü khüdu tsehle. Abi akoh sobhonung rore. Judarüti, nührü thsüti müzehng ko Tsingrangba khyang nührü anyengchocho jüng. Amütsarünü anyüpiu khodesü nührü lih mümahnung. Arüh sehchi changjüko!