Read Sangtam Naga NAHUM 2 Bible Online

NAHUM 2 - Sangtam Naga bible

NAHUM 2

¹Nineve, nührü betiko! Nüh shühchijünung tase tsü roko. Athsehnung nyitsarü wüsohng! Lang nyahtisohng! Khata nengdang rungnüm!

²(Arorühnü mükohcheh-ede hiba Israel ahechi, ABÜDONGBAnü thali jünung thsako.)

³Rothsarü arorüh tsünü tsung amoh bire. ko jengki amoh khyüre. Arühnü benung rungnümre! Arüh kari michang kyo tehre. Arüh kuriti khyachire!

⁴Kuri karinü yanglong la tsohnah rachire, Yangdi yanglong la wüli roli shangchire. Arühnü dsibhong kyo tehre ko tsingchi kyo mülakehre.

⁵Anüchirüti dsimükhongre; arühnü bekhu wüde müthikehre. Arühnü tbü lang tsü tsohkhuta würe, ko tsung tsü müdongre.

⁶Tbükhüm shündhün yongkhi tsü tsohphohre; Yangthsaba pümji adrünü jengre.

⁷Yangthsalatpü rang hitsire; kulirütinü mümüdhrü kyo meshüre. ko awahchonü arüh dreng la hamchire.

⁸Kihting rohphohde kyo, Nineve lanü nyitsarü tsohkhutare. arühnü züdere; “Nyehlieng! Nyehlieng!” ta sünüsü müximülare.

⁹Taripi tsü kengchoung! Hon tsü kengchoung! Yangdi tsü kuthsinü jeng lile.

¹⁰Nineve khüluko, tsishoko, nayingko! Adrüchonü lasih shenahre; Mükhong dhridhrire, tase kingkare; romih pha-a kangre.

¹¹Kihkhünying kuh, kihkhünyingza mükhichehchah, Apung ko atpa müli nye aza khümcho lichah kyoba yangdisü ade khülo-o?

¹²Kihkhünyingnü atrüh ko aza nengdang kanglungrü mükahseh zangzang rehnah akuh jengsohcho.

¹³Akohba ABÜDONGBAnü yore, “Ih nü rorüh!” “Ihnü nü kari tahpehjünung. Nü rothsarüti khata la süsohnung, ko nühnü bürü yo rohchocho apüm Ihnü khyünung. Limih la nü tase müyuchipehnung.”