Read Sangtam Naga HABAKUK 1 Bible Online

HABAKUK 1 - Sangtam Naga bible

HABAKUK 1

¹Hiba hi ABÜDONGBAnü azikehrü Habakuk te mishacho yusi.

²O ABÜDONGBA, Nühnü müyuchiede ko shühkhatoh lanü ihrü mükhümchoede, khüdoi nyahli Ihnü kihchinung?

³Tuepü hitari chongcha I khyang ngusohro? Amüthsalang hitari Nühnü khüta rangchoro? Athsangnyang ko shühthrehnü Ih mükangti lile, ko apümlang khatamüna ko yubejarong lile.

⁴Yuzeng tsü suh müzeh ko amükang, ko yuje tsü khodesü münguchi. Amünyirünü amüsarü tenü atsau ngure, hütsüta yuje tsü thsamülare.

⁵Hütsüde ABÜDONGBAnü anyitsarü te yocho, “Nü mükang yuchoti tsü dhingdheng, ko hütsü nühnü ngude nyemüyangnung. Nühnü yuchide müyudsinungthsa Ihnü lango nguchinung.

⁶Ihnü adrünung ko amürangcho Babylonrü khyang tase jünung. Aparü limih mahnung limih bong arüh shemüsure.

⁷Arühnü adrünung shure, ko künyangküshi tsü arühbürü yuzeng.

⁸“Arüh kuri tsü khünying tenü atsayaba, ko yangseh liba rangfü tenü amütsau. Arüh kuri chah pümrü nyitsarü ashu lanü rore; arüh kuriti alih la khyachire. Müdi roh-i thsücho jüro arüh rorüh rangre.

⁹“Arüh rothsarünü shühkhatohnung rore ko arüh ro chihde atümung drümüyangre. Arühnü rang hitsirü tsü lihpi roh-i mükhilong.

¹⁰Arühnü yangthsarü müthsamünyüre ko aying thsarü münyüjüre. Tu tbükhümnü arüh müyaticheh, arühnü alih süh küdupü kohchehre.

¹¹Hütsüpü arühnü nyübong kyo iiwüre ko tsire, arüh tase tsü arüh tsingrang.”

¹²ABÜDONGBA! adikehdinü Nüh Tsingrangba. Nüh I Tsingrang, Amüsa ko achangka müle. ABÜDONGBA, I Tsingrang ko I tsungtibong. Ihrü khingchisohnung nengdang Nühnü Babylonrü throchehcho ko arüh rezehsohcho.

¹³Ta Nühnü khüta thsüyohchürü ko amütsarü hiri te rangchoro? Amünyi chah dhengnung Nü nah khura Amüsa, ko amütsa nguchirü Nühnü mükoh dhengre. Hütsükhang, arüh tenü amüsaba nyitsarü changjüde, tuepü Nü sahmüthsaro?

¹⁴Anüchirü müliba nguh mahkhang kangzah khüdu kyo Nühnü nyitsarü bichire.

¹⁵Babylonrünü nguh roh-i nyitsarü axohsingnü xohre. Arühnü yojeh la arüh tphahcheh akünyangnü züdere!

¹⁶Arühnü arüh yojeh mübüre ko kangmübü mii jüre, tunüo arüh yojehnü arüh khyang apüm tenü atsau hirojüre.

¹⁷Arühnü lede nohsheng bichi yanglilüm müli yuchoti thsangnyangjünung do?